၄ ကြိမ်ဆက် ပရီးမီးယားလိဂ် ချန်ပီယံ နို့ဘူးတို့ကတော့ ဒီရာသီမှာ ဖလားကိုင်မြှောက်ရမယ့် အခွင့်အရေးနဲ့ ဝေးခဲ့ပြီး ထိပ်ဆုံး ၄ သင်း ဝင်ဖို့ကိုပဲ မျှော်လင့်ရတော့မှာပါ။ လက်ရှိ ပွဲစဉ် ၃၀ ကစားပြီးချိန်အထိ ပရီးမီးယားလိဂ် အမှတ်ပေးဇယားရဲ့ အဆင့် ၅ နေရာမှာ ရမှတ် ၅၁ မှတ်နဲ့ ရပ်တည်နေတဲ့ နို့ဘူးတို့ကတော့ လာမယ့် Sunday မှာ အိုးထရက်ဖို့ဒ်ကို သွားရောက်ပြီး ယူနိုက်တက်နဲ့ မန်ချက်စတာဒါဘီပွဲစဉ် ကို ကစားသွားရမှာ ဖြစ်ပါတယ်။
Photo : AOL.com
ပြီးခဲ့တဲ့ ဒီဇင်ဘာတုန်းက သူတို့ ၂ သင်း ထိပ်တိုက်တွေ့ဆုံခဲ့မှုမှာ ဒီယာလိုရဲ့နောက်ကျ သွင်းဂိုးနဲ့ နို့ဘူးတို့ အိမ်ကွင်းမှာ အရှက်တကွဲ ရှုံးနိမ့်ခဲ့ရပါတယ်။ နို့ဘူးတို့က ဒီရာသီမှာ ဂွါဒီယိုလာရဲ့ နည်းပြသက်တမ်းတလျှောက် အံ့ဩစရာကောင်းလောက်အောင် ခြေစွမ်းပိုင်းကျဆင်းနေပြီး နောက်တန်း အားနည်းချက်များစွာနဲ့ သွင်းဂိုးတွေ ခွင့်ပြုနေရတဲ့ အခြေအနေပါ။
တစ်ဖက်မှာ သရဲနီတို့ကလည်း အိမ်ကွင်း ရလဒ်ဆိုးတွေနဲ့ ရုန်းကန်နေရဆဲ အခြေအနေကို ဖြတ်ကျော်နေရပြီး လက်ရှိ အမှတ်ပေးဇယားရဲ့ အဆင့် ၁၃ နေရာမှာ ရပ်တည်နေပါတယ်။ သရဲနီတို့ကတော့ ဒီရာသီမှာ ကစားဖို့ လက်ကျန်ပွဲစဉ် အနည်းငယ်သာ ကျန်ရှိတော့ပြီး ယူရိုပါလိဂ်ဝင်ခွင့်အတွက် အာရုံစိုက်နေပါတယ်။ ပြောစရာ တစ်ချက်ရှိတာကတော့ အခုနောက်ပိုင်း ယူနိုက်တက်ရဲ့ တိုက်စစ်အစုအဖွဲ့က သိသာတဲ့ ပြောင်းလဲမှုတွေကို လုပ်ဆောင်လာနိုင်ပြီး သွင်းဂိုးတွေ ထိထိရောက်ရောက် စွမ်းဆောင်လာနိုင်တာပါ။
Photo : Reuters
သရဲနီတို့ ကစားခဲ့တဲ့ နောက်ဆုံး ပရီးမီးယားလိဂ် ၅ ပွဲဟာဆိုရင်လည်း ၂ ပွဲနိုင် ၂ ပွဲသရေ ၁ ပွဲရှုံး ရလဒ်ထွက်ပေါ် ထားပါတယ်။ နည်းပြ အာမိုရင်လက်ထပ် အိမ်ကွင်းအရှုံးရလဒ်တွေ များနေပေမယ့် နို့ဘူးနဲ့ တွေ့ဆုံခဲ့တဲ့ နောက်ဆုံး ၃ ပွဲကတော့ ၂ ပွဲနိုင် ၁ ပွဲသရေ ရလဒ်ကို ထွက်ပေါ်ထားတာ ဖြစ်ပါတယ်။ နို့ဘူးတို့အနေနဲ့ သရဲနီအိမ်ကွင်းမှာ သွားရောက် ကစားရမှာဆိုပေမယ့် တိုက်စစ်ပိုင်း အားသာချက်တွေ ရှိနေသလို ပထမအကျော့က ရှုံးကြွေးကို မဖြစ်မနေ ပြန်ဆပ်ဖို့လည်း လိုနေတာကြောင့် ဂိုးရဖို့ အခွင့်အရေး များပါတယ်။ ဒါကြောင့် ဒီပွဲက ၂ ဖက်အသင်း အပြန်အလှန် သွင်းဂိုးတွေ မြိုင်မြိုင်ဆိုင်ဆိုင်နဲ့ အကြိတ်အနယ် ယှဉ်ပြိုင်သွားကြမယ့် မန်ချက်စတာဒါဘီ ပွဲကောင်းတစ်ပွဲ ဖြစ်မှာတော့ အသေအချာပါပဲ။ ကွီးပရိသတ်တွေရော ဒီပွဲနဲ့ ပတ်သတ်ပြီး ဘယ်လိုရလဒ်တွေ ထွက်ပေါ်လာနိုင်မလဲဆိုတာ ကွန်းမန့်မှာ သုံးသပ်ပေးခဲ့ပါဦး။
Featured Photo : Sports JOE
