လိင်မှတဆင့် ကူးစက်တတ်တဲ့ ရောဂါတွေနဲ့ ကြိုတင်မျှော်လင့်မထားတဲ့ ကိုယ်ဝန်တို့လို ကွိုင် အကြီးကြီးတွေကို ရှောင်ရှားဖို့ လိင်ဆက်ဆံတဲ့အခါ ကွန်ဒုံးအကာအကွယ်တွေ အသုံးပြုကြရပါတယ်။ ဒါပေမယ့် ကွန်ဒုံးတွေ အသုံးပြုချိန်မှာ အဆင်မပြေတာ ၊ သက်တောင့်သက်သာ မဖြစ်တာ ၊ ကွန်ဒုံးပေါက်ပြဲတာ စတဲ့ ပြဿနာတွေလည်း ကြုံရတတ်ပါတယ်။ ဒါကြောင့် ဒီတစ်ခေါက် ဆောင်းပါးမှာတော့ ကွိုင်သုံးပေမယ့် ကွိုင်တွေ တက်နေတာ ၊ ကွန်ဒုံးသုံးချိန်မှာ အဆင်ပြေချောမွေ့မှု မရှိတာ စတဲ့ အခြေအနေတွေကို ဖြစ်စေတဲ့ အကြောင်းအရင်း အချို့ကို ပြောပြပေးပါမယ်။
(၁) ကွန်ဒုံး ဝတ်ထားရင် သက်တောင့်သက်သာ မရှိတာ
Photo : STD Rapid Test Kits
လိင်ဆက်ဆံချိန်မှာ ကွိုင် ကြောင့် သက်တောင့်သက်သာ မရှိရခြင်းရဲ့ အဓိက အကြောင်းအရင်းကတော့ ဆိုဒ်အရွယ်အစား မှားယွင်းနေလို့ပါ။ ကိုယ့်ရဲ့ ဖွားဖက်တော်နဲ့ မှန်ကန်တဲ့ ကွန်ဒုံးဆိုဒ်ကို မရွေးပဲ ကြပ်လွန်း ၊ ချောင်လွန်းနေရင် ဝတ်ဆင်ရတာ အခက်အခဲရှိနိုင်သလို ဆက်ဆံနေစဉ်အတွင်းမှာလည်း ကွန်ဒုံးပေါက်ပြဲတဲ့ ပြဿနာ ဖြစ်နိုင်ခြေ များပါတယ်။
(၂) ခြောက်သွေ့ပြီး ပူစပ်ပူလောင် ခံစားရတာ
Photo : CBC
ချောဆီထည့်သွင်းထားတဲ့ Lubricated ကွန်ဒုံးတွေ ဖြစ်နေပါစေ ၊ ဆက်ဆံချိန်မှာ ပြင်ပချောဆီ ထပ်ထည့်အသုံးပြုပေးဖို့ လိုအပ်ပါတယ်။ များသောအားဖြင့် အော်ရီဂျင်နယ် ချောဆီ ပါဝင်ပြီးသား Lubricated ကွန်ဒုံးတွေဟာ အတူနေစဉ်အတွင်းမှာ အလျင်အမြန် ခြောက်သွေ့သွားတတ်တာကြောင့် ပူစပ်ပူလောင် ခံစားရတာ ၊ တင်းကြပ်ပြီး အဝင်အထွက် ချောမွေ့မှုမရှိတာ စတဲ့ အခြေအနေတွေ ကြုံတွေ့ရနိုင်ပါတယ်။
(၃) ကွိုင် တစ်ခုထက်ပိုပြီး တစ်ပြိုင်နက်တည်း အသုံးပြုတာ
Photo : Concordia University
ကွန်ဒုံးတွေက လိင်မှတဆင့် ကူးစက်တတ်တဲ့ ရောဂါတွေနဲ့ ကြိုတင်မျှော်လင့်မထားတဲ့ ကိုယ်ဝန်တို့ ၉၈ ရာခိုင်နှုန်းအထိ ကာကွယ်မှုပေးနိုင်ပါတယ်။ ဒါပေမယ့် နည်းစနစ်မှန်ကန်စွာ အသုံးပြုဖို့တော့ မဖြစ်မနေ လိုအပ်ပါတယ်။ ပိုစိတ်ချရအောင် ကွန်ဒုံးကို ၂ ထပ် ဝတ်ဆင်ပြီး အသုံးပြုမယ်လို့ တွေးရင်တော့ ကွီးတို့ ကွိုင်အကြီးအကြီး တက်မှာပါ။ ကွန်ဒုံးတွေကို ၂ ထပ်ဝတ်ဆင်ပြီး အသုံးပြုတဲ့အခါ ရော်ဘာသားအချင်းချင်း ပွတ်တိုက်မှုကြောင့် အလွယ်တကူ ပေါက်ပြဲနိုင်ပြီး ရောဂါကူးစက်မှုနဲ့ ကိုယ်ဝန်ရနိုင်ခြေကို တိုးစေပါလိမ့်မယ်။
(၄) သက်တမ်းကုန်ဆုံးရက် ၊ ပျက်စီးမှုရှိမရှိ မစစ်ဆေးပဲ အသုံးပြုတာ
Photo : Healthline
ကွန်ဒုံးတစ်ခုက အနည်းဆုံး သုံးနှစ်ကနေ ငါးနှစ်ကြား ကာလရှည် သက်တမ်းအထားခံအောင် ထုတ်ထားကြတာပါ။ ဒါပေမယ့် နှစ်ကြာလေ ယို့ယွင်းပျက်စီးမှု ရာခိုင်နှုန်းဟာ တိုးလာနိုင်ပြီး ကွန်ဒုံးတွေရဲ့ အာနိသင်ဟာ လျှော့ကျသွားတတ်ပါတယ်။ ဒါကြောင့် ကွိုင် မသုံးမီမှာ အိတ်ခွံပေါ်က သက်တမ်းကုန်ဆုံးရက်ကို စစ်ဆေးဖို့ လိုသလို ယို့ယွင်းပျက်စီးမှု ၊ ပေါက်ပြဲမှု ရှိမရှိကိုလည်း စစ်ဆေးကြည့်ဖို့ မဖြစ်မနေ လိုအပ်ပါတယ်။
Source : Men’s Health
Featured Photo : Greatist
