ကွီးတို့ရဲ့ ခန္ဓာကိုယ်ဟာ အင်ဂျင်တစ်လုံးလို အလုပ်လုပ်ပါတယ်။ ခန္ဓာကိုယ်မှာ ယို့ယွင်းမှု တစ်စုံတစ်ခု ရှိနေတဲ့အခါ အဆိုပါ ကျန်းမာရေး အခြေအနေကို ကွီးတို့ သတိထားမိနိုင်စေဖို့ သဘာဝအလျောက် ဖော်ပြပေးတဲ့ စနစ်ပါပါတယ်။ ဖွားဖက်တော်နဲ့ လိင်မှုကျန်းမာရေးမှာလည်း ထို့နည်းတူပါပဲ။ ဒီဆောင်းပါးမှာတော့ ကွီးတို့ လိင်မှုဆိုင်ရာ ကျန်းမာရေးမှာ ပြဿနာတစ်စုံတစ်ရာ ရှိနေတယ်ဆိုတာကို ဖော်ပြပေးနေတဲ့ လက္ခဏာအချို့ကို ပြောပြပေးပါမယ်။
(၁) လိင်အင်္ဂါတဝိုက်မှာ အဖုအပိန့်တွေ ထွက်ခြင်း
Photo : MensXP
ပုံမှန်အားဖြင့် ကွီးတို့ရဲ့ လိင်တံနဲ့ ကပ်ပယ်အိတ် ဧရိယာတဝိုက်မှာ အဖုအပိန့်တွေ ရှိမနေရပါဘူး။ လိင်အင်္ဂါတဝိုက်က အရေပြား ဧရိယာဟာ ထိရှလွယ်တဲ့အတွက် တစ်ခါတစ်ရံမှာ အမွှေးအမျှင် ရိတ်ခြင်းကနေတဆင့် Ingrown Hair အဖုအပိန့်တွေ ထွက်တက်တာမျိုး ရှိပါတယ်။ သို့သော် အဖုအပိန့်တွေဟာ ကြီးထွားလာတယ် ၊ ပွားလာတယ်ဆိုရင် လိင်အင်္ဂါကြွက်နို့ရောဂါ သို့မဟုတ် ရောဂါပိုး Infection ဝင်နေတယ်ဆိုတာကို ဖော်ပြနေတဲ့ လက္ခဏာတစ်ခုဖြစ်နိုင်ပါတယ်။
(၂) ပုံမှန်မဟုတ်တဲ့ အရည်တွေ ထွက်ခြင်း
Photo : Verywell Health
လိင်တံ သို့မဟုတ် စအို အပါအဝင် ကွီးတို့ ရဲ့ မျိုးပွားအင်္ဂါတွေကနေ ပုံမှန်မဟုတ်တဲ့ အရည်တွေထွက်နေတယ် ဆိုရင်တော့ လိင်မှုကျန်းမာရေး မှာ ပြဿနာတစ်ခုခု ရှိနေတာ ဖြစ်နိုင်ပါတယ်။ အစိမ်းပုပ်ရောင် သို့မဟုတ် ဝါဖန့်ဖန့်အရောင်ရှိတဲ့ အရည်တွေဟာ ဆီးပူညောင်းကျရောဂါရဲ့ ရှေ့ပြေးလက္ခဏာတစ်ခု ဖြစ်နိုင်ပြီး အဖြူရောင်အရည်တွေ ထွက်နေတယ်ဆိုရင်တော့ ကပ်ပါးကောင်ကြောင့် ဖြစ်ရတဲ့ လိင်ကတဆင့်ကူးစက်ရောဂါ Trichomoniasis ဖြစ်နိုင်ပါတယ်။ အကယ်၍ အဖြူရောင်အရည်ဟာ အနံ့မရှိပဲ အနည်းငယ် ပြစ်ခဲနေတယ်ဆိုရင် ဒါဟာ လိင်အင်္ဂါပိုးဝင်နေတယ်ဆိုတာကို ဖော်ပြနေတာ ဖြစ်နိုင်ပါတယ်။
(၃) ဆီးသွားချိန်မှာ ပူစပ်ပူလောင် ခံစားရခြင်း
Photo : MensXP
လိင်မှုကျန်းမာရေး နဲ့ ပတ်သတ်ပြီး တစ်ခုခုမှားယွင်းနေတယ် ဆိုတာကို ဖော်ပြနေတဲ့နောက်ထပ် အရိပ်အမြွက်ပြ လက္ခဏာတစ်ခုကတော့ ဆီးသွားချိန်မှာ ပူစပ်ပူလောင် ခံစားရတာပါ။ များသောအားဖြင့်တော့ ဒါဟာ ဆီးလမ်းကြောင်းပိုးဝင်နေတယ်ဆိုတာ ဖော်ပြနေတဲ့ အချက်ပြလက္ခဏာဖြစ်ပြီး ကြီးကြီးမားမား စိုးရိမ်စရာမရှိပေမယ့်လည်း ပေါ့ပေါ့ဆဆတော့ မနေသင့်ပါဘူး။ ဘာကြောင့်လဲဆိုရင် ကလက်မိုင်ဒီးယား (Chlamydia) ၊ ဆီးပူညောင်းကျရောဂါ စတဲ့ လိင်မှတဆင့် ကူးစက်တက်တဲ့ ရောဂါတွေဟာလည်း ထို့နည်းတူစွာ ဆီးသွားချိန်မှာ ပူစပ်ပူလောင် ခံစားရစေတက်ပါတယ်။
(၄) လိင်အင်္ဂါတဝိုက် နာကျင်မှုခံစားရခြင်း
Photo : MensXP
ခန္ဓာကိုယ်ရဲ့ ဘယ်နေရာမဆို နာကျင်ကိုက်ခဲမှု ဝေဒနာခံစားရရင် သတိထားရပါမယ်။ လိင်အင်္ဂါ သို့မဟုတ် ဝမ်းဗိုက်အောက်ပိုင်း တဝိုက်ဆိုရင် ပိုပြီးတော့ ဂရုစိုက်ဖို့ လိုပါတယ်။ ဒီလို လိင်အင်္ဂါတဝိုက် နေရာတွေမှာ နာကျင်မှုခံစားရတာဟာ တစ်စုံတစ်ခု မှားယွင်းနေတယ်ဆိုတာကို ဖော်ပြနေတဲ့ လက္ခဏာပါ။ ဒါဟာ လိင်ဆက်ဆံစဉ်မှာ ထိခိုက်ဒဏ်ရာရခြင်း ၊ ဝှေးစေ့ရောင်ရမ်းခြင်းတွေကြောင့် ဖြစ်နိုင်သလို လိင်မှတဆင့် ကူးစက်တက်တဲ့ ရောဂါတစ်ခုခု ကူးစက်ခံရတာကြောင့်လည်း ဖြစ်တက်ပါတယ်။
Source : MensXP
Featured Photo : MensXP
