ယောက်ျားပီသမှု ဆိုတာကို ကွီးတို့ ဘယ်လိုနားလည်ထားပါသလဲ။ သတ္တိကောင်းတာ ၊ လုပ်ရဲကိုင်ရဲ ပြောရဲဆိုရဲ ရှိတာ ၊ လူတိုင်းနဲ့ အံဝင်ခွင်ကျဖြစ်အောင် ပေါင်းနိုင်တာ ၊ စိတ်ပိုင်း/ရုပ်ပိုင်းသန်မာကြံ့ခိုင်တာ စသည်ဖြင့် ဒါတွေဟာ ယောကျာ်းပီသတဲ့ အမျိုးသားတစ်ယောက်မှာ မြင်ရမယ့် လက္ခဏာတွေလို့ ယေဘုယျအားဖြင့် ထင်မှတ်ကြပါတယ်။ တကယ်တော့ စစ်မှန်တဲ့ ယောကျာ်းတစ်ယောက်ရဲ့ စံချိန်စံနှုန်းတွေဟာ ဒီထက်အများကြီး ပိုပါတယ်။ ဒီဆောင်းပါးလေးမှာတော့ မိမိကိုယ်ကို ယောကျာ်းပီသပြီး စစ်မှန်တဲ့ ယောကျာ်း ကောင်းတစ်ယောက် ဖြစ်အောင် ပြုစုပျိုးထောင်နိုင်မယ့် လမ်းညွှန်ချက် တချို့ကို ပြောပြပေးချင်ပါတယ်။
(၁) စကားတည်ပါ
Photo : Pexels
စစ်မှန်တဲ့ ယောကျာ်း ပီသသူတစ်ယောက်ဖြစ်ဖို့ အခြေခံအကျဆုံး စည်းမျဉ်းတစ်ခုက ကိုယ့်စကားကိုယ် တာဝန်ယူမှု အပြည့်ရှိတာပါပဲ။ မပေးနိုင်တဲ့ ကတိတွေကို အစကတည်းက မပေးပါနဲ့။ ကတိတစ်ခုပေးပြီးရင် ပေးထားတဲ့ကတိအတိုင်း တည်အောင်ကြိုးစားပါ။
(၂) အပြန်အလှန်လေးစားမှုရှိပါ
Photo : Pexels
လူတစ်ယောက်ဆီက လေးစားမှုကို လိုချင်ရင် သင်ကိုယ်တိုင်က အဲ့ဒီလူအပေါ် လေးစားမှုပေးရပါမယ်။ ဒါဟာ အပြန်အလှန်လေးစားမှုရဲ့ သဘောတရား ပါပဲ။ ယောကျာ်း ပီသသူတစ်ယောက်ဖြစ်ချင်ရင် အဆင့်အတန်းအနိမ့်အမြင့်မရွေး လူတိုင်းအပေါ် လူသားဆန်စွာနဲ့အပြန်အလှန်လေးစားမှု ရှိရှိပြောဆို ဆက်ဆံတက်ဖို့ အရေးကြီးပါတယ်။
(၃) ကိုယ့်ကိုယ်ကိုယ် နှိမ့်ချပါ
Photo : Pexels
ကိုယ့်ကိုယ်ကိုယ် နှိမ့်ချတက်ခြင်းဟာ ကောင်းမွန်တဲ့ အမူအကျင့်တစ်ခု ဖြစ်သလို စစ်မှန်တဲ့ ယောကျာ်း ပီသသူတို့ရဲ့ သွင်ပြင်လက္ခဏာတစ်ရပ်လည်း ဖြစ်ပါတယ်။ ဘဝဆိုတာ အသက်ရှင်နေသ၍ လေ့လာသင်ယူစရာတွေနဲ့ ပြည့်နှက်နေတာပါ။ အဘက်ဘက်က ပြီးပြည့်စုံနေတဲ့ လူရယ်ဆိုတာ မရှိနိုင်ဘူး မဟုတ်လား။
(၄) ကိုယ့်ဘဝကိုယ် ထိန်းချုပ်ပါ
Photo : Pexels
ယောကျာ်းပီသသူ တစ်ယောက်ဟာ ကိုယ့်ဘဝကိုယ် အပြည့်အဝ ထိန်းချုပ်နိုင်စွမ်း ရှိဖို့လိုပါတယ်။ ကိုယ့်ဘဝရဲ့ အစီအစဉ်တွေ ၊ ဆုံးဖြတ်ချက်တွေ ၊ လုပ်ရပ်တိုင်းရဲ့ အကျိုးဆက်တွေ အားလုံးကို မိမိကိုယ်တိုင်ပဲ စီမံခန့်ခွဲ ထိန်းချုပ်နိုင်စွမ်း ရှိရပါမယ်။ ဘာတွေက ကိုယ့်ဘဝရဲ့ ဦးစားပေးလဲ ၊ နံပါတ် ၁ အရေးကြီးဆုံးလဲဆိုတာကို ကွဲကွဲပြားပြား သိအောင်လုပ်ပါ။ ခံစားမှုနောက် မလိုက်မိအောင် ထိန်းပါ။ လမ်းမှားပေါ်ရောက်သွားရင် ကိုယ်တိုင်လမ်းမှန် ပြန်တည့်မတ်နိုင်စွမ်း ရှိရပါမယ်။
(၅) စကားနဲ့လုပ်ရပ် ထပ်တူကျအောင် ကြိုးစားပါ
Photo : Pexels
ကိုယ်ပြောတဲ့စကားအတိုင်း အလုပ်နဲ့သက်သေပြနိုင်ရင် စစ်မှန်တဲ့ ယောကျာ်း တစ်ယောက်ဖြစ်ပါပြီ။ လူတစ်ယောက်မှာ ဆန္ဒနဲ့ စိတ်ကူးအိပ်မက်တွေကို နှုတ်ကထုတ်ဖော် ကြွေးကြော်ရုံနဲ့မပြီးပါဘူး။ တကယ်လက်တွေ့ကျကျ အောင်မြင်အောင် လုပ်ဖို့ ၊ အကောင်အထည်ဖော်နိုင်ဖို့ အရေးကြီးပါတယ်။ အဓိကပြောချင်တာကတော့ လေထဲတိုက်မဆောက်မိအောင် ကိုယ့်ကိုယ်ကိုယ် သွန်သင်ထားပါ။
Featured Photo : Pexels
