ကျွန်တော်တို့ နေ့စဉ်စားနေတဲ့ အစားအစာတွေထဲမှာ ယေဘုယျအားဖြင့် သကြားဓာတ် များစွာ ပါဝင်နေပါတယ်။ ပေါင်မုန့် ၊ ဒိုးနတ် ၊ ကိတ် ၊ သကြားလုံး ၊ ရေခဲမုန့် ၊ အချိုရည် စသဖြင့် အစားအစာ တော်တော်များများမှာ သကြားပါဝင်ပါတယ်။ အံ့ဩစရာကောင်းတာတစ်ခုက လတ် ဆတ်တဲ့ အသီးအနှံ တွေမှာပါ သကြားဓာတ် ပါဝင်နေတာ ဖြစ်ပါတယ်။ အသီးအနှံ့တွေက ရတဲ့ သကြားကိုတော့ သဘာဝ အသီးအနှံ သကြားဓာတ် Fructose လို့ခေါ်ပါတယ်။ ဒီသကြားဓာတ်ကို ပျားရည် ၊ သကြား မုန်လာဥ ၊ ကြံနဲ့ တခြားသော ဟင်းသီးဟင်းရွက်တွေမှာ တွေ့နိုင်ပါတယ်။
သကြားဓာတ်ဟာ ခန္ဓာကိုယ်စွမ်းအင်တည်ဆောက်ရာမှာ အဓိကအရေးပါတဲ့ အာဟာရဓာတ်တစ်ခု ဖြစ်ပေမယ့် ကျန်းမာရေးအရ ကြည့်မယ်ဆိုရင် သကြားဓာတ် များများစားသုံးတာက ခန္ဓာကိုယ်အတွက် ဆိုးကျိုးသက်ရောက်မှုကို ဖြစ်စေပါတယ်။ သကြားဓာတ် အလွန်အကျွံ စားသုံးခြင်းဟာ အဝလွန်ခြင်း ၊ သွေးတိုး ၊ ဆီးချို စတဲ့ နာတာရှည်ရောဂါတွေကိုလည်း ဦးတည်နေတာ ဖြစ်ပါတယ်။
ကာဗိုဟိုက်ဒရိတ်များများပါတဲ့ အစားအစာတွေ စားခြင်းဟာ ခန္ဓာကိုယ်တွင်းမှာ သကြားဓာတ်အဖြစ် မြန်မြန်ပြိုကွဲသွားတာကြောင့် သွေးတွင်း သကြားဓာတ်ကို မြင့်တက်လာစေပါတယ်။ အမျိုးအစား (၁) ဆီးချို နဲ့ အမျိုးအစား (၂) ဆီးချို နှစ်မျိုးစလုံးဟာ Glycemic Index (GI) လို့ခေါ်တဲ့ သကြား ဓာတ်ညွှန်းကိန်း များတဲ့ အစားအစာတွေကို ရှောင်ကြဉ်ဖို့ လိုပါတယ်။ Glycemic Index (GI) များတဲ့ အစား အစာတွေဟာ သကြားဓာတ် ပြိုကွဲမှု မြန်စေတဲ့ အတွက် သွေးတွင်းသကြားဓာတ်ပမာဏကို မြင့်တက်စေမှာ ဖြစ်ပါတယ်။
တချို့သော လတ်ဆတ်ပြီး ချိုမြိန်တဲ့ အသီးအနှံ တွေမှာလည်း Glycemic Index (GI) အမြင့်ဆုံး ပါဝင်တဲ့ အစားအစာတွေရှိပါတယ်။ ဥပမာ ဖရဲသီး ၊ ဆွန်ပလွန်သီး ၊ နာနတ်သီးနဲ့ ငှက်ပျောသီးတွေ ဖြစ်ပါတယ်။ အကယ်၍ ဆီးချို ရောဂါရှိသူတွေအနေနဲ့တော့ ဒီလိုအစားအစာတွေကို တက်နိုင်သလောက် ရှောင်ကြဉ်ပေးသင့်ပါတယ်။ သကြား ဓာတ်ညွှန်းကိန်း Glycemic Index (GI) တိုင်းတာမှုဟာ ၀ ကနေ ၁၀၀ အထိရှိပြီး Glycemic Index နည်းလေလေ သွေးတွင်းသကြားဓာတ် ပမာဏအပေါ် သက်ရောက်မှု နည်းလေလေဘဲ ဖြစ်ပါတယ်။ ဒါကြောင့် ဒီတစ်ခေါက်မှာတော့ ဆီးချို ရောဂါရှင်တွေ စိတ်ချလက်ချစားနိုင်မယ့် Glycemic ပါဝင်မှုနည်းတဲ့ အသီးအနှံ ၇ မျိုးကို ပြောပြပေးချင်ပါတယ်။
(၁) ခရမ်းချဉ်သီး
Photo : MyRecipes
အလတ်စား ခရမ်းချဉ်သီးတစ်လုံးမှာ ကယ်လိုရီ ၂၂ ၊ သကြား ၃ ဂရမ် နဲ့ အမျှင်ဓာတ် ၁.၅ ဂရမ် ပါဝင်ပါတယ်။ ခရမ်းချဉ်သီးတွေဟာ သကြား ဓာတ်ညွှန်းကိန်း Glycemic Index တိုင်းတာမှုအရ ၁၀၀ မှာ အဆင့် ၁၅ နေရာမှာ ရှိနေပါတယ်။
(၂) ချယ်ရီသီး
Photo : Daily Sabah
ချယ်ရီသီးတစ်ခွက်မှာ ၇၇ ကယ်လိုရီ ၊ သကြား ၁၃ ဂရမ် နဲ့ အမျှင်ဓာတ် ၂.၅ ဂရမ် ပါဝင်ပါတယ်။ ချယ်ရီသီးတွေဟာ သကြား ဓာတ်ညွှန်းကိန်း Glycemic Index တိုင်းတာမှုအရ ၁၀၀ မှာ အဆင့် ၂၂ နေရာမှာ ရှိနေပါတယ်။
(၃) ဘလက်ဘယ်ရီ
Photo : Medical News Today
ဘလက်ဘယ်ရီသီးတစ်ခွက်မှာ ကယ်လိုရီ ၆၀ ၊ သကြား ၇ ဂရမ်နဲ့ အမျှင်ဓာတ် ၈ ဂရမ် အများဆုံး ပါဝင်ပါတယ်။ ဘလက်ဘယ်ရီသီးတွေဟာ သကြား ဓာတ်ညွှန်းကိန်း Glycemic Index တိုင်းတာမှုအရ ၁၀၀ မှာ အဆင့် ၂၅ နေရာမှာ ရှိနေပါတယ်။
(၄) ဂရိတ်ဖရုသီး
Photo : Simply Healthy Family
ဘရိတ်ဖရုသီးတစ်ခြမ်းမှာ ၅၂ ကယ်လိုရီ ၊ သကြား ၈ ဂရမ် နဲ့ အမျှင်ဓာတ် ၂ ဂရမ် ပါဝင်ပါတယ်။ ဂရိတ်ဖရုသီးဟာလည်း သကြား ဓာတ်ညွှန်းကိန်း Glycemic Index တိုင်းတာမှုအရ ၁၀၀ မှာ အဆင့် ၂၅ နေရာမှာ ရှိနေပါတယ်။
(၅) ပန်းသီး
Photo : HealthifyMe
ပန်းသီးတစ်လုံးမှာ ကယ်လိုရီ ၉၅ ၊ သကြား ၁၉ ဂရမ် နဲ့ အမျှင်ဓာတ် ၄.၄ ဂရမ် ပါဝင်ပါတယ်။ ပန်းသီးဟာ သကြား ဓာတ်ညွှန်းကိန်း Glycemic Index တိုင်းတာမှုအရ ၁၀၀ မှာ အဆင့် ၃၈ နေရာမှာ ရှိနေပါတယ်။
(၆) ဇီးသီး
Photo : Minnetonka Orchards
ဇီးသီးတစ်လုံးမှာ ကယ်လိုရီ ၃၀ ၊ သကြား ၇ ဂရမ်နဲ့ အမျှင်ဓာတ် ၁ ဂရမ် ပါဝင်ပါတယ်။ ဇီးသီးတွေဟာ သကြား ဓာတ်ညွှန်းကိန်း Glycemic Index တိုင်းတာမှုအရ ၁၀၀ မှာ အဆင့် ၄၀ နေရာမှာ ရှိနေပါတယ်။
(၇) လိမ္မော်သီး
Photo : Fine Dining Lovers
အလတ်စား လိမ္မော်သီးတစ်လုံးမှာ ၄၇ ကယ်လိုရီ ၊ သကြား ၉ ဂရမ်နဲ့ အမျှင်ဓာတ် ၁.၆ ဂရမ် ပါဝင်ပါတယ်။ လိမ္မော်သီးဟာ သကြား ဓာတ်ညွှန်းကိန်း Glycemic Index တိုင်းတာမှုအရ ၁၀၀ မှာ အဆင့် ၄၀ နေရာမှာ ရှိနေပါတယ်။
သကြား ဓာတ်ညွှန်းကိန်း Glycemic Index ၅၀ အောက် အသီးအနှံ တွေဟာ စားသုံးဖို့ အသင့်တော်ဆုံး ဖြစ်ပြီး ၇၀ နဲ့ ၇၀ အထက် အသီးအနှံ တွေကတော့ ရှောင်ကြဉ်သင့်တဲ့ အစားအစာ စာရင်းထဲမှာ ပါဝင်ပါတယ်။
Featured Photo : Simply Healthy Family
