ဆံပင် ပျက်စီးစေတဲ့ အကြောင်းအရင်းတွေ အများကြီး ရှိပါတယ်။ ဥပမာအားဖြင့် ရာသီဥတုနဲ့ နေရောင်ခြည်ဒဏ်ကြောင့် ပျက်စီးတတ်သလို Hair Care ကောင်းကောင်း မလုပ်တာကြောင့်လည်း ပျက်စီးတတ်ပါတယ်။ ဒီလို ဆံပင် ပျက်စီး စေတဲ့ အကြောင်းအရင်း များစွာရှိတဲ့အထဲကမှ အဓိက အကြောင်းအရင်း ၅ ချက်ကို ပြောပြပေးချင်ပါတယ်။
(၁) အာဟာရ မပြည့်ခြင်း
Photo : Men’s Health
ဗီတာမင်နဲ့ အာဟာရဓာတ်တွေဟာ ကျန်းမာတဲ့ ကိုယ်ခန္ဓာအတွက်မရှိမဖြစ် အရေးပါသလို ဆံပင်သန်စွမ်းမှုအတွက်ပါ အကျိုးကျေးဇူးများပါတယ်။ အကြော်အလှော်တွေ စားတာ လျှော့ပြီး အသားဓာတ် ၊ သံဓာတ် ၊ သတ္ထုဓာတ်နဲ့ Biotin ဓာတ်တွေ ပြည့်ဝတဲ့ ဥ ၊ ပဲ ၊ ငါး နဲ့အသီးအနှံတွေ ပုံမှန် စားသင့်ပါတယ်။
(၂) မကြာခဏ ခေါင်းလျှော်ခြင်း
Photo : VistaCreate
ဆံပင်ဟာ ရေအထိ များရင် ဆံပင်နှစ်ခွဖြစ်တာ ၊ ဆံပင်အဆီတွေ ခန်းတာ ဖြစ်စေနိုင်ပါတယ်။ ဦးရေပြားက ထုတ်တဲ့ သဘာဝအဆီဟာ ဆံပင်ကို မပျက်စီးအောင် ကာကွယ်ပေးပြီး တောက်ပ သန်စွမ်းစေပါတယ်။ ခေါင်းလျှော်မယ်ဆိုရင်လည်း တစ်ပတ်မှာမှ ၃ ရက်ထက် ပိုပြီး မလျှော်သင့်ဘူးလို့ အလှအပကျွမ်းကျင်သူတွေက အကြံပြုထားပါတယ်။
(၃) ရေပြောင်အောင် မသုတ်ခြင်း
Photo : Freepik
အလုပ်နောက်ကျမှာစိုးလို့ ရေကို မြန်မြန်ချိုးပြီး ခေါင်းပေါ်က ဆံပင်ကို ရေ ပြောင်စင်အောင် မသုတ်ဖြစ်ရင်လည်း ဆံပင်ပျက်စီးနိုင်ပါတယ်။ ရေစိုနေတဲ့ ဆံပင်ဟာ အားနည်းနေပြီး ဆံပင်ရေစိုချိန်မှာ ခေါင်းဖြီးလိုက်ရင် ဆံသား ပျက်စီးနိုင်ခြေ ပိုများပါတယ်။ အလားတူပဲ ချည်သားကြမ်းကြမ်း Towel နဲ့ခေါင်းပေါ်က ရေကို အားနဲ့ဖိသုတ်မယ်ဆိုရင်လည်း ဆံပင်ထိခိုက်ပျက်စီး နိုင်ပါတယ်။
(၄) နေရောင်အထိ များခြင်း
Photo : iStock
အပြင်မှာ အထွက်များတဲ့ သူတွေအနေနဲ့ ထီး ၊ ဦးထုပ်စတဲ့ နေရောင်ခြည်ကာ ပစ္စည်းတစ်ခုခု ဆောင်းပြီးမှ ထွက်သင့်ပါတယ်။ နေရောင်ကြောင့် UV အထိများရင် အသားအရေအပြင် ဆံပင်လည်း ပျက်စီးတတ်ပါတယ်။ အပြင်ထွက်ချိန်မှာ UV ခရမ်တစ်ခုခု လိမ်းပြီး အသားအရေ ထိန်းသိမ်းသလို နေရောင်အောက် အကြာကြီး နေရတဲ့ အလုပ်လုပ်သူတွေမှာလည်း ဆံပင်ကို ပိုပြီး ဂရုစိုက်ဖို့လိုပါတယ်။
(၅) ခေါင်းလိမ်းဆီ အသုံးများခြင်း
Photo : Urban Oak
Gel လို Hair Styling Product တွေ အများကြီး သုံးဖြစ်ရင်လည်း ဆံပင်ကျွတ်တာ ၊ ဆံသားပျက်စီးတာ ဖြစ်နိုင်ပါတယ်။ ခေါင်းလိမ်းဆီကို အသင့်အတင့်ပဲ သုံးသင့်ပြီး တစ်နေရာတည်းမှာ အပုံလိုက်ကြီး ဖြစ်မနေစေဖို့ သတိထားသင့်ပါတယ်။
Featured Photo : Hims
