အများစုကတော့ အသားအရေထိန်းသိမ်းဖို့ အာရုံစိုက်ကြပေမယ့် ဆံပင်နဲ့ ဆံသားကျန်းမာရေးကိုတော့ လျစ်လျူရှု့မိတက်ကြပါတယ်။ ဆံပင်ဆိုတာလည်း အသားအရေ ကဲ့သို့ပင် စိတ်ဖိစီးမှုများခြင်း ၊ အာဟာရမလုံလောက်ခြင်း နဲ့ ဟော်မုန်းမညီမျှခြင်းစတဲ့ အကြောင်းအရင်းတွေကြောင့် ပျက်စီးစေနိုင်သလို သတိမပြုမိတဲ့ မှားယွင်းတဲ့ အလေ့အထတွေကြောင့်လည်း ပျက်စီးစေနိုင်ပါတယ်။ ဒီတစ်ခေါက်မှာတော့ လူတိုင်းသတိမထားမိပဲ အိပ်ရာဝင်ချိန်မှာ လုပ်မိတက်တဲ့ ဆံပင်ပျက်စီးစေတဲ့ အလေ့အထ အမှားတွေကို ပြောပြပေးချင်ပါတယ်။
(၁) မသန့်တဲ့ ခေါင်းအုံးစွပ်နဲ့ အိပ်တာ
Photo : iStock
တစ်ကိုယ်ရေ သန့်ရှင်းမှုက ခန္ဓာကိုယ်အလုံးစုံ ကျန်းမာရေးအတွက် အရေးကြီးပါတယ်။ လူတစ်ယောက်ရဲ့ အိပ်စက်ချိန်ဟာ ပျှမ်းမျှအားဖြင့် အနည်းဆုံး ၅ နာရီကနေ ၈ နာရီကြားရှိပါတယ်။ ခေါင်းအုံးစွပ်တွေက အိပ်စက်ချိန်မှာ နာရီနဲ့ ချီပြီးတိုက်ရိုက်ထိတွေ့ရတာကြောင့် သန့်ရှင်းမှုရှိနေဖို့ အရေးကြီးပါတယ်။ ခေါင်းအုံးစွပ်တွေကို အနည်းဆုံး တစ်ပတ် ၁ ကြိမ်ခန့် လျှော်ဖွတ်သန့်စင်ပါ။
(၂) ရေစိုနေတဲ့ ဆံပင်နဲ့ အိပ်တာ
Photo : iStock
ဆံပင်ရေစိုနဲ့ အိပ်ရာဝင်တာက ဆံသားကျန်းမာရေးကို ထိခိုက်ပျက်စီးစေတဲ့ အကြီးမားဆုံး အမှားတစ်ခု ဖြစ်ပါတယ်။ ဆံသားတွေက ရေစိုနေချိန်မှာ သာမန်ထက် ပျော့ပျောင်းနေတာကြောင့် အိပ်ရာခင်း ၊ ခေါင်းအုံးစွပ်တွေနဲ့ ပွတ်တိုက်တဲ့အခါ အလွယ်တကူပဲ ကြမ်းတမ်းခြောက်သွေ့ပြီး ပျက်စီးသွားစေမှာ ဖြစ်ပါတယ်။ ဒါကြောင့် ခေါင်းလျော်ပြီးချိန်မှာ ရေကိုခြောက်အောင် သုတ်ပြီးမှ အိပ်ရာဝင်ပါ။
(၃) ဆံပင်ထုတ်ကုန် ပစ္စည်းတွေ အသုံးပြုပြီး အိပ်စက်တာ
Photo : iStock
အမျိုးသားအများစုကတော့ ဘယ်အချိန်မဆို ဆံပင်စတိုင် သပ်သပ်ရပ်ရပ်နဲ့ ပုံကျနေတာကို သဘောကျ ကြပါတယ်။ ဒါပေမယ့် ညဘက်တွေမှာတော့ Hair Sprays တွေ ၊ ခေါင်းလိမ်းဆီတွေ အများကြီးသုံးပြီး ဆံပင်ကို ပုံသွင်းတာမျိုး မလုပ်ပါနဲ့။ ဆံပင်ထုတ်ကုန် ပစ္စည်းတွေ အသုံးပြုပြီး အိပ်စက်တာက ဆံသားကို ခြောက်သွေ့ပျက်စီးစေပြီး ကျိုးကြေလွယ်စေပါတယ်။
(၄) အိပ်ရာမဝင်ခင် ခေါင်းဖြီးဖို့ မေ့လျော့တာ
Photo : iStock
ဆံပင်ခပ်တိုတို ခပ်ပါးပါး အမျိုးသားတွေအတွက်ကတော့ ဒီအချက်က အရေးမကြီးပေမယ့် ဆံပင်အရှည်ထားတဲ့ ကွီးတို့အနေနဲ့ အိပ်ရာမဝင်ခင်မှာ ခေါင်းပုံမှန် ဖြီးပေးဖို့ လိုအပ်ပါတယ်။ ဦးရေပြားဟာ Sebum လို့ခေါ်တဲ့ ဆံပင်ကို သဘာဝအတိုင်း အစိုဓာတ်ထိန်းပေးတဲ့ အဆီတစ်မျိုး ထုတ်ပေးပါတယ်။ အိပ်ရာမဝင်ခင်မှာ ဆံပင်ပုံမှန်ဖြီးပေးတာက ဆံသားတစ်ချောင်းချင်းဆီကို Sebum ဖြန့်ဝေပေးနိုင်မှာ ဖြစ်တာကြောင့်ဆံပင်ကျွတ်ခြင်း ၊ ဆံသားရှုပ်ထွေး ပျက်စီးခြင်းတွေကို လျော့ချပေးနိုင်ပါတယ်။
Featured Photo : DiStefano Hair Restoration Center
