ကွီးတို့အတွက် အမိုက်စား မိုဘိုင်းလ်ဂိမ်းတွေကို အမြဲတမ်း တင်ဆက်ပေးနေတဲ့ အစီအစဉ်လေးက ဒီနေ့မှာလည်း ရောက်ရှိလို့လာပြန်ပါပြီ။ ပိတ်ရက်တွေမှာ မိုဘိုင်းလ်ဂိမ်းကစားရင်း အပန်းဖြေချင်လို့ပဲ ဖြစ်ဖြစ်၊ ညစ်နေတာတွေ ဝဲပစ်လိုက် ဖို့ပဲဖြစ်ဖြစ် အလန်းစားဂိမ်းတွေ ရှာနေရင်တော့ ဒီဆောင်းပါးလေးက ကွီးတို့အတွက်ပါပဲ။ ဆက်လက်ပြီး ဖုန်းနဲ့ ကစားလို့ကောင်းတဲ့ အမိုက်စားဂိမ်း ကြည့်လိုက်ရအောင်ဗျာ။

Idle Bank Tycoon: Money Empire

Source : Gameplay Channel

ကွီးတို့အတွက် စိတ်ကျေနပ်ဖို့ ကောင်းပြီး ပေါ့ပေါ့ပါးပါး ကစားလို့ကောင်းတဲ့ ဂိမ်းလေးကို အရင်ဆုံးဖော်ပြပေးချင်ပါတယ်။ ဒါကတော့ Idle Bank Tycoon: Money Empire ဖြစ်ပါတယ်။ ဒီဂိမ်းမှာ ကွီးတို့အနေနဲ့ ကိုယ်ပိုင်ဘဏ်အင်ပါယာကို တည်ဆောက်ခြင်း၊ တည်နေရာများကို အဆင့်မြှင့်တင်ခြင်းနှင့် ချဲ့ထွင်ခြင်း စတာတွေကို ပြုလုပ်ရမှာ ဖြစ်ပါတယ်။ ဒီဂိမ်းမှာ ကစားသမားက ဘဏ်လုပ်ငန်းရှင်တစ်ဦးရဲ့ အခန်းကဏ္ဍမှာ ပါဝင်ရမှာ ဖြစ်ပါတယ်။ စိတ်ဝင်စားစရာကောင်းတဲ့ ဂိမ်းလေးဖြစ်လို့ ညစ်နေတာတွေကို‌ လျော့ပါးစေမှာတော့ အသေအချာပါပဲ။

Pokémon GO

Source : Pokémon GO

ဒီဂိမ်းလေးကတော့ ထွေထွေထူးထူး ပြောစရာမလိုတော့ဘဲ ကွီးတို့သိပြီးသား ဖြစ်မှာပါ။ တစ်ချိန်က တော်တော်လေးကို ရေပန်းစားခဲ့ပြီး ကစားလို့ကောင်းတဲ့ ဂိမ်းလေး ဖြစ်ပါတယ်။ အခုလည်း Pokémon လေးတွေကို လိုက်ဖမ်းရင်းနဲ့ ကွီးတို့ စိတ်ညစ်စရာတွေကို ဝဲပစ်လိုက်ပါ။

CSR Racing 2

Source : CSR Racing

စိတ်လှုပ်ရှားမှုအပြည့်နဲ့ တတ်တတ်ကြွကြွကစားချင်ရင်တော့ Racing ဂိမ်းတွေက အကောင်းဆုံးပါပဲ။ ဒီဂိမ်းက ကွီးတို့အနေနဲ့ Drag Racing သဘောတရားကို ကြိုက်နှစ်သက်ပါက ပေါ့ပေါ့ပါးပါးနှင့် အပြိုင်အဆိုင်ချင်တဲ့ ကစားသမားများအတွက် စိတ်လှုပ်ရှားဖွယ် ကောင်းမွန်သော အတွေ့အကြုံကို ပေးစွမ်းနိုင်တဲ့ ဂိမ်းတစ်ခု ဖြစ်ပါတယ်။ ဒါ့အပြင် ဒီဂိမ်းကို Graphics အမိုက်စားတွေနဲ့ ဖန်တီးထားပါတယ်။

League of Legends: Wild Rift

Source : League of Legends: Wild Rift

ဒီဂိမ်းကတော့ Multiplayer ကစားနိုင်တဲ့ စိတ်ဝင်စားဖွယ် အွန်လိုင်းတိုက်ပွဲဂိမ်း ဖြစ်ပါတယ်။ ဒီဂိမ်းကို Android ရော iOS မှာပါ အခမဲ့ ကစားနိုင်ပြီး PC ဂိမ်း League of Legends ရဲ့ ပြုပြင်ထားသော ဗားရှင်းဖြစ်ပါတယ်။ ဘော်ဒါတွေနဲ့ ပိတ်ရက်မှာ ဂိမ်းကစားချင်ရင်တော့ ဒီဂိမ်းလေးကို Try ကြည့်ပါ။

Honkai Star Rail

Source : Hokai Star Rail

ဒီဂိမ်းမှာ စူးစမ်းလေ့လာရန် စိတ်လှုပ်ရှားဖွယ်နေရာများ၊ အနိုင်ယူရန် ခက်ခဲသောရန်သူများနှင့် မိမိအဖွဲ့မှာ ပါဝင်နိုင်တဲ့ ထူးခြားသောဇာတ်ကောင်များ ပါရှိပါတယ်။ အမိုက်စား Graphics တွေနဲ့ တတ်တတ်ကြွကြွ ကစားချင်ရင် ဒီဂိမ်းလေးကို စမ်းကြည့်ပါ၊

Sniper 3D

Source : Touch Game Play

ကွီးတို့က အမိုက်စား Sniper သမားတစ်ယောက်အဖြစ် ကစားချင်ပါသလား။ ဒါဆိုရင်တော့ Sniper 3D ဆိုတဲ့ မိုဘိုင်းဂိမ်းလေး ရှိပါတယ်။ ဒီဂိမ်းမှာ ကွီးတို့ကိုယ်တိုင် အလန်းစား Sniper သမားတစ်ယောက်အဖြစ် ကစားနိုင်ပြီး Sniper ရိုင်ဖယ်မျိုးစုံ ကိုလည်း ရွေးချယ်နိုင်ပါတယ်။

ကွီးတို့ရေ ညစ်နေတာတွေ ဝဲပစ်လိုက် ဖို့ ဒီဂိမ်းတွေကို အခုပဲကစားကြည့်လိုက်တော့ဗျာ။ ကွီးတို့ ကစားနေကျ အမိုက်စား မိုဘိုင်းဂိမ်းလေးတွေရှိရင်လည်း ဝေမျှခဲ့ပါဦး။

Source : Pocket Tactics

Featured Photo : Pexels