Insomnia လို့ခေါ်တဲ့ ညဘက်အိပ်မပျော် တဲ့ရောဂါ ဟာ ဒီနေ့ခေတ် လူငယ်လူကြီးမရွေး ရင်ဆိုင်ကြုံတွေ့နေရတဲ့ အကြီးမားဆုံး ပြဿနာတွေထဲက တစ်ခုလို့ပြောရင် မမှားနိုင်ပါဘူး။ ညဘက်မှာ နှစ်နှစ်ခြိုက်ခြိုက် အိပ်မပျော်တာ ၊ အိပ်ရေးပျက်တာတွေဟာ ကျွန်တော်တို့ရဲ့ စိတ်နဲ့ခန္ဓာကိုယ်ကျန်းမာရေးကို အဆိုးဆုံးအခြေနေသို့ ရောက်စေတဲ့ အဓိက အကြောင်းအရင်းတစ်ခု ဖြစ်ပါတယ်။ ဒီတစ်ခေါက်တော့ ညဘက်အိပ်မပျော် တာနဲ့ ပတ်သတ်ပြီး သိထားသင့်တဲ့ အမှန်အမှား အချို့ကို ဆွေးနွေးပေးချင်ပါတယ်။
(၁) အယ်လ်ကိုဟောက အိပ်ပျော်စေဖို့ ကူညီပေးနိုင်လား
Photo : Live Bold and Bloom
အယ်လ်ကိုဟောပါတဲ့ Drinks တွေ သောက်ထားရင် အိပ်ပျော်သွားစေတယ်လို့ လူတွေသိထားကြပါတယ်။ တကယ်ရော အိပ်ရာမဝင်ခင် အရက်သောက်တာဟာ အိပ်မပျော်တဲ့ ပြဿနာကိုသက်သာရာရစေမယ်လို့ ထင်ပါသလား။ ဒီမေးခွန်းကို ဖြေရမယ်ဆိုရင်တော့ အယ်လ်ကိုဟောဟာ ကွီးတို့ကို အိပ်ပျော်ကောင်း အိပ်ပျော်သွားစေနိုင်ပေမယ့် အိပ်ပျော်နေစဉ် ခန္ဓာကိုယ်က လှုပ်ရှားနေတဲ့အတွက် မကြာခဏနိုးတာ ၊ နှစ်နှစ်ခြိုက်ခြိုက် အိပ်မပျော်တာမျိုး ဖြစ်နိုင်ပါတယ်။ တနည်းအားဖြင့် ဒါဟာကောင်းမွန်တဲ့ အိပ်စက်ခြင်းကို ရနိုင်မှာ မဟုတ်ပါဘူး။
(၂) ညဘက်အိပ်မပျော် တာကပြင်းထန်တဲ့စိတ်ပိုင်းဆိုင်ရာ ပြဿနာတွေကြောင့်လား
Photo : Sleep Review
စိတ်ပိုင်းဆိုင်ရာ ပြဿနာတွေက အိပ်မပျော်ဖို့ ခက်ခဲစေတာ အမှန်ပါပဲ။ တကယ်တော့ စိတ်ဖိစီးမှုဟာ အိပ်မပျော်ခြင်းရဲ့ နံပါတ် (၁) အကြောင်းရင်း ဖြစ်ပါတယ်။ ဒါပေမယ့် ဒါဟာ တစ်ခုတည်းသော အိပ်မပျော်ခြင်းရဲ့ အစတော့ မဟုတ်ပါဘူး။ တစ်ကိုယ်ရေသန့်ရှင်းမှုမရှိခြင်း ၊ ဖျားနာခြင်း ၊ မူးယစ်ဆေးရဲ့ ဘေးထွက်ဆိုးကျိုးများ ၊ နာတာရှည် ကိုယ်လက်နာကျင်ကိုက်ခဲခြင်း ၊ ခြေထောက်လှုပ်ရောဂါနဲ့ မူးယစ်ဆေးရဲ့ ဘေးထွက်ဆိုးကျိုးတွေအပါအဝင် အကြောင်းအရင်း များစွာက အိပ်မပျော်ခြင်းကို ဖြစ်စေနိုင်တာ ဖြစ်ပါတယ်။
(၃) လေ့ကျင့်ခန်းလုပ်တာက အိပ်ပျော်စေသလား
Photo : Men’s Journal
လေ့ကျင့်ခန်းပုံမှန်လုပ်ခြင်းက ပိုမိုကောင်းမွန်တဲ့ အိပ်စက်ခြင်းကို ပိုင်ဆိုင်နိုင်ဖို့ ကူညီပေးနိုင်ပါတယ်။ ဒါပေမယ့် ကောင်းစွာ အိပ်ပျော်စေဖို့အတွက် အိပ်ချိန်နီးမှ ကိုယ်လက်လှုပ်ရှား လေ့ကျင့်ခန်း လုပ်တာကိုတော့ အထူးရှောင်ကြဉ်ဖို့ လိုပါတယ်။ အထူးသဖြင့် ပြင်းပြင်းထန်ထန် လေ့ကျင့်ခန်းလုပ်ခြင်းက ကွီးတို့ကို ပိုပြီး နိုးကြားစေနိုင်တဲ့အတွက် အိပ်ပျော်ရပိုခက်သွားစေလို့ပါ။ အိပ်ချိန်နဲ့နီးကပ်စွာ လေ့ကျင့်ခန်းလုပ်တာက ခန္ဓာကိုယ်အပူချိန်ကိုလည်း တိုးစေပြီး နောက်ထပ် ခြောက်နာရီအထိ အပူချိန်ကို မြင့်နေစေနိုင်တဲ့အတွက် အိပ်ပျော်ရခက်ခဲစေမှာ အမှန်ပါပဲ။ ဒါကြောင့် အိပ်ရာမဝင်မီ လေ့ကျင့်ခန်းလုပ်ခြင်းကို ရှောင်ကြဉ်သင့်ပြီး အနည်းဆုံး အိပ်ချိန်နဲ့ ၂ နာရီလောက်ခြားဖို့ အကြံပြုချင်ပါတယ်။
(၄) ဖုန်းနဲ့တီဗီတွေ ကြည့်တာက မှန်ကန်တဲ့ အနားယူနည်းတစ်ခုလား
Photo : Everyday Health
လူတော်တော်များများက တစ်နေ့ကုန် အလုပ်လုပ်ပြီး ညဘက်အိပ်ချိန်လေးမှာ ဖုန်းလေးပွတ် ၊ တီဗီလေးကြည့်ပြီး အနားယူရတာကို ကြိုက်ကြပါတယ်။ ဒါပေမယ့် ဒါဟာ တကယ်ရောအနားယူရာ ရောက်စေရဲ့လား စဉ်းစားစရာပါ။ တကယ်တော့ ဖုန်း ၊ ကွန်ပျူတာနဲ့ တီဗီတွေက ထွက်တဲ့ အပြာရောင်အလင်းတွေနဲ့ ဆူညံသံတွေဟာ ဦးနှောက်ရဲ့ မယ်လတိုနင်အဆင့်ကို လျော့ကျစေတဲ့အတွက် ဦးနှောက်ကို နိုးကြားတက်ကြွစေပြီး အိပ်ပျော်ရခက်ခဲစေပါတယ်။ ဒီအစား စိတ်ကိုသက်တောင့်သက်သာနဲ့ အပန်းပြေစေပြီး အိပ်ပျော်စေဖို့ ကူညီပေးမယ့် Relaxing Music တွေ ခပ်တိုးတိုး ဖွင့်ထားတာက ပိုပြီး သင့်တော်ပါတယ်။
(၅) အိပ်ဆေးတွေက အကူညီဖြစ်စေလား
Photo : HealthCentral
ဒီဘက်ခေတ်မှာ တံဆိပ်ပေါင်းစုံနဲ့ အိပ်ဆေးတွေ အများကြီး ပေါ်လာပါတယ်။ ဆေးအိပ်တွေက ညဘက်အိပ်မပျော် တာကိုဖြေရှင်းဖို့ နည်းလမ်းလေးတွေထဲက တစ်ခုဆိုပေမယ့်လို့ တဖက်မှာလည်း ဘေးထွက်ဆိုးကျိုးနဲ့ အန္တရာယ်ဖြစ်စေတဲ့ အကြောင်းအရင်းတွေ များစွာရှိနေပါတယ်။ တချို့ဆေးတွေဟာ အိပ်မပျော်တဲ့ ပြဿနာကို ယာယီပဲ သက်သာရာရစေတာ ဖြစ်ပါတယ်။ Insomnia ကိုတော့ အရှင်းပျောက်အောင် မကုနိုင်ပါဘူး။ တစ်ခါတစ်လေမှာ ရောဂါအခံကြောင့်လည်း အိပ်ပျော်ဖို့ခက်ခဲတဲ့ ပြဿနာကို ဖြစ်စေတဲ့အတွက် ဆရာဝန်နဲ့ သေချာစမ်းသပ်ကုသမှုခံယူပြီးမှသာ ဆရာဝန်ညွှန်းကြားချက်အတိုင်း ဆေးဝါးတွေကို မှီဝဲတာ အကောင်းဆုံး ဖြစ်ပါလိမ့်မယ်။
(၆) အစားထိုးအိပ်ချိန်တွေက အိပ်ရေးဝစေသလား
Photo : JHU Hub – Johns Hopkins University
ဒီညမှာ အိပ်ရေးပျက်လို့ နောက်နေ့တစ်နေ့ကုန် ပြန်အိပ်တာဟာ ဆုံးရှုံးသွားတဲ့ အိပ်ချိန်တွေကို ပြန်ရစေမယ်လို့ ထင်ရင်တော့ လုံးဝမှားပါတယ်။ ဒီလိုညဘက်မှာ မအိပ်ပဲနေလိုက်တာကို နောက်တစ်ရက် တစ်နေ့ကုန်ပြန်အိပ်တာဟာ ကွီးတို့ရဲ့ အိပ်စက်မှုစက်ဝန်းကို ကမောက်ကမဖြစ်စေရုံမက နောက်တစ်ရက်မှာလည်း အလားတူ ညဘက်အိပ်မပျော် တဲ့ ပြဿနာမျိုး ထပ်ကြုံရနိုင်ပါတယ်။ အိပ်မပျော်ခဲ့တဲ့ အိပ်ချိန်တွေကို ပြန်ကုစားအတွက် တစ်ခုတည်းသောနည်းက ပုံမှန်အိပ်ချိန်ဇယားကို ပြန်ရအောင် ကြိုးစားပြုပြင်တာပဲ ဖြစ်ပါတယ်။
ဒါကအစပိုင်းမှာ ခက်ခဲကောင်း ခက်ခဲနိုင်ပါတယ်။ ဒါပေမယ့် ကွီးတို့အနေနဲ့ ည ၁၁ နာရီမှာ အိပ်ရာဝင်မယ်ဆိုရင် နာရီဝက်-၁ နာရီလောက် အလိုကတည်းက ဖုန်းတွေ ၊ လက်ပ်တော့ အားလုံးကို ပိတ်ထားလိုက်ပါ။ လူရောအိပ်ရာကိုပါ သက်တောင့်သက်သာနဲ့ သန့်သန့်ရှင်းရှင်း ၊ အနံ့အသက်ကောင်းကောင်းရှိစေဖို့ ပြင်ဆင်ပြီး အိပ်ပျော်အောင် ကြိုးစားပြီး အိပ်ကြည့်ပါ။ ညဘက်ကိုစောနိုင်သမျှ စောစောအိပ်ပြီး မနက်ကို စောစောအိပ်ရာထနိုင်အောင်ကြိုးစားပါ။ တစ်ပတ်လောက် အပင်ပန်းခံလေ့ကျင့်မယ်ဆိုရင် ကွီးတို့အိပ်စက်မှုစက်ဝန်းက ပုံမှန်ပြန်ဖြစ်လာပြီး ညဘက်အိပ်မပျော် တဲ့ပြဿနာကို ကျော်လွှားနိုင်ပါလိမ့်မယ်။
Featured Photo : Freepik
