ခန္ဓာကိုယ်ရဲ့ ကိုယ်တွင်းယန္တရား အားလုံးလည်ပတ်နိုင်ဖို့ အဓိကကျတဲ့ ကိုယ်အင်္ဂါ အစိတ်အပိုင်းတစ်ခုက နှလုံးပါ။ နှလုံး ကျန်းမာရေး ကို လူတိုင်း အလေးထားဂရုစိုက်ပေးဖို့ လိုပါတယ်။ လေ့ကျင့်ခန်းပုံမှန်လုပ်တာ ၊ ကျန်းမာတဲ့ Healthy Lifestyle တစ်ခုမွေးမြူတာ စတာတွေနဲ့ နှလုံးရဲ့ ကျန်းမာရေးကို မြှင့်တင်နိုင်သလို အစာအာဟာရကလည်း နှလုံးကို ကျန်းမာအောင် များစွာ ပံ့ပေးကူညီပေးနိုင်ပါတယ်။ ဒီတစ်ခေါက်မှာတော့ ကွီးတို့ ပတ်ဝန်းကျင်မှာ အလွယ်တကူရနိုင်တဲ့ နှလုံး ကျန်းမာရေး ကို မြှင့်တင်ပေးနိုင်မယ့် အကောင်းဆုံး အစားအသောက် ၅ မျိုးကို ပြောပြပေးချင်ပါတယ်။
(၁) Low-Fat Yogurt
Photo : WebMD
Dairy Foods တွေက အရိုးအဆစ်တွေအတွက် ကောင်းတယ်လို့ လူတော်တော်များများ သိထားကြပါတယ်။ ဒီ့ထက်ပိုပြီး ကောင်းမွန်တဲ့ အကျိုးကျေးဇူးတစ်ခုကတော့ သွေးပေါင်ချိန်မြင့်တက်ခြင်းကို ကာကွယ်ကုသပေးနိုင်တာပါပဲ။ ဒိန်ချဉ်မှာ ကယ်လ်စီယမ်နဲ့ ပိုတက်စီယမ်ဓာတ်တွေ မြင့်မားစွာပါဝင်ပြီး နှလုံး ရဲ့ လုပ်ဆောင်ချက်တွေကို ပိုမိုကောင်းမွန်အောင် ကူညီပေးနိုင်ပါတယ်။ ကယ်လ်စီယမ်ဓာတ် မြှင့်မားပြီး အဆီနည်းတဲ့ Low-Fat Yogurt တွေက အကောင်းဆုံး ဖြစ်ပါတယ်။
(၂) မုယောစပါး
Photo : WebMD
ထမင်းအစား Barley လို့ခေါ်တဲ့ မုယောစပါး အစေ့အဆန်တွေကို ပိုပြီးစားသင့်ပါတယ်။ မုယောစပါးကို ဟင်းချိုနဲ့ စွပ်ပြုတ်တွေအဖြစ်လည်း ကျိုချက်စားနိုင်ပါတယ်။ မုယောစပါးမှာ ပါဝင်တဲ့ မြောက်များလှတဲ့ အမျှင်ဓာတ်က ကိုလက်စထရောကို လျှော့ချပေးနိုင်ပြီး သွေးတွင်းသကြားဓာတ်ကိုလည်း ကျဆင်းစေနိုင်ပါတယ်။
(၃) ကန်စွန်းဥ
Photo : WebMD
ကန်စွန်းဥမှာ အမျှင်ဓာတ်၊ ဗီတာမင် A နဲ့ lycopene တို့ မြင့်မားစွာပါဝင်ပါတယ်။ သုတေသီတွေကတော့ အားလူးထက် ကန်စွန်းဥက ကျန်းမာရေးနဲ့ ပိုပြီး သင့်လျော်ကောင်းမွန်တယ်လို့ အကြံပြုထားပါတယ်။ ကန်စွန်းဥဟာ အားလူးထက် သကြားဓာတ်ညွှန်းကိန်း (Glycemic Index) နည်းတဲ့အတွက် သွေးတွင်းသကြားဓာတ်ကို မြန်မြန်ဆန်ဆန် မြင့်တက်ခြင်းကို မဖြစ်စေပဲ နှလုံး ကျန်းမာရေး ကို ပိုမိုကောင်းမွန်အောင် ထောက်ပံ့ပေးနိုင်ပါတယ်။
(၄) တူနာငါး
Photo : WebMD
ငါးတွေမှာ နှလုံး ကျန်းမာရေး အတွက် ကောင်းမွန်တဲ့ Omega-3 ဓာတ်ကြွယ်ဝစွာ ပါဝင်ပါတယ်။ တူနာငါးဟာ ဆယ်လ်မွန်ငါးထက် ဈေးသက်သာပြီး Omega-3 ဓာတ်လည်း မြင့်မားစွာ ပါဝင်ပါတယ်။ Albacore လို့ခေါ်တဲ့ တူနာငါးအမျိုးအစားဟာ အခြားသော တူနာမျိုးကွဲတွေထက် Omega-3 ဓာတ်ပိုပြီး ပေါပေါများများ ပါဝင်ပါတယ်။ တူနာငါးကို ဇီယာစေ့ ၊ သံပုရာရည်တို့နဲ့ ကင်ပြီး အရသာရှိရှိ စားနိုင်ပါတယ်။
(၅) ပဲမဲ
Photo : WebMD
နူးညံ့တဲ့ အနက်ရောင်ပဲ(ပဲမဲ) မှာ နှလုံး ကျန်းမာရေး အတွက် အကျိုးပြုတဲ့ အာဟာရဓာတ်များ ကြွယ်ဝစွာပါရှိပါတယ်။ ပဲမဲမှာပါတဲ့ ဖောလိတ် ၊ ဓာတ်တိုးဆန့်ကျင်ပစ္စည်းတွေနဲ့ မဂ္ဂနီဆီယမ်ဓာတ်က သွေးပေါင်ချိန်မြင့်တက်မှုကို လျှော့ချပေးနိုင်ပါတယ်။ အမျှင်ဓာတ်လည်း ကြွယ်ဝစွာပါဝင်တာကြောင့် ကိုလက်စထရောနဲ့ သွေးတွင်းသကြားဓာတ်ကို ထိန်းညှိပေးပါတယ်။ ပဲမဲကို စွတ်ပြုတ်အနေနဲ့ သောက်နိုင်သလို သုပ်ပြီးလည်းအရသာ ရှိရှိစားလို့ရပါတယ်။
Featured Photo : Gaines Family Farmstead
