မနက်ခင်း ပြေးတာဟာ စိတ်နဲ့ခန္ဓာကိုယ်အတွက် အင်မတန် အကျိုးပြုတဲ့ လေ့ကျင့်ခန်း တစ်ခုပါ။ အပြေးလေ့ကျင့်ခန်း လုပ်ဖို့ ငွေကုန်ကြေးကျမရှိသလောက်နည်းသလို လူတိုင်း နေရာမရွေးလုပ် နိုင်ပါတယ်။ ဒါပေမယ့် မနက်ခင်း ပြေးပြီးချိန်မှာ တစ်နေ့တာလုံးအတွက် ပင်ပန်းနွမ်းနယ်မှုတွေ မခံစားရစေဖို့ အရေးကြီးဆုံး လိုက်နာရမယ့် အချက်တစ်ခု ရှိပါတယ်။ ဒါကတော့ အာဟာရဓာတ် ပြန်လည်ဖြည့်တင်းမှုပါပဲ။ အပြေးလေ့ကျင့်ခန်း လုပ်ပြီးနောက်မှာ အစားအသောက် အာဟာရဖြည့်တင်းမှု မမှန်ပါက တစ်နေ့တာလုံးမှာ ပင်ပန်းနွမ်းနယ်မှုတွေကို ခံစားရနိုင်ပြီး နောက်ထပ် ခရီးမိုင်များစွာကို ပြေးနိုင်တော့မှာ မဟုတ်ပါဘူး။ ဒါ့ကြောင့် ခန္ဓာကိုယ်အတွက် အရေးကြီးဆုံး အာဟာရဖြည့်တင်းမှုအနေနဲ့ ပရိုတင်းနဲ့ ကာဗိုဟိုက်ဒရိတ်ဓာတ်တွေကို ပြန်လည်စားသုံးပေးဖို့ လိုအပ်ပါတယ်။ ဒီ အာဟာရဓာတ်တွေဟာ ကြွက်သားဆုံးရှုံးခြင်းကနေ ကာကွယ်ပေးပြီး တက်ကြွလန်းဆန်းစေကာ ဒဏ်ရာရနိုင်ခြေကိုလည်း လျှော့ချပေးပါတယ်။ ဒီဆောင်းပါးလေးမှာတော့ မနက်ခင်း အပြေးလေ့ကျင့်ခန်းလုပ်သူတွေ ဒါမှမဟုတ် အခုမှစပြေးမယ့် Beginners တွေအတွက် ပြေးပြီးချိန်မှာ စားသင့်တဲ့ အာဟာရအပြည့်ဝဆုံးနဲ့ အကောင်းဆုံး မနက်စာတွေကို မျှဝေပေးချင်ပါတယ်။

(၁) Protein Shakes

Photo : Men’s Journal

မနက်ခင်း ပြေးပြီးချိန်မှာ ပင်ပန်းနွမ်းနယ်မှုတွေ နည်းစေဖို့ အဓိကစားသုံးသင့်တာကတော့ ပရိုတင်းဓာတ်ပါပဲ။ Protein Shakes တွေဟာ ပရိုတင်းဓာတ် အရင်းအမြစ်ကို ပေးစွမ်းတဲ့အပြင် သွားရင်းလာရင်း အလွယ်တကူ စားသောက်လို့ ရပါတယ်။ ကာဗိုဟိုက်ဒရိတ်အတွက် လတ်တိုစ်နဲ့ ဂလူးကို့စ်ဓာတ်တွေကို မြှင့်တင်ဖို့ နှစ်သက်ရာ ပရိုတင်းမှုန့်ကို နွားနို့နဲ့ရောစပ်ဖျော်သောက်နိုင်သလို ပိုပြီး အဆာခံနိုင်ဖို့ဆိုရင် ငှက်ပျောသီးတစ်လုံးထပ်မံ ရောစပ်သုံးဆောင်လို့ ရပါတယ်။

(၂) မြေပဲထောပတ်

Photo : Healthline

မြေပဲထောပတ်ဟာ လူတိုင်းကြိုက်တဲ့ အကောင်းဆုံး မနက်စာတွေထဲက တစ်ခုပါပဲ။ မြေပဲထောပတ်မှာ ကျန်းမာရေးနဲ့ ညီညွတ်တဲ့ အဆီနဲ့ပရိုတင်းဓာတ်တွေ ကြွယ်ဝစွာ ပါဝင်ပါတယ်။ ခန္ဓာကိုယ်ကနေ စွမ်းအင်ထုတ်လွှတ်ဖို့အတွက် Biotin နဲ့ Niacin တို့လို ဗီတာမင် B အရင်းအမြစ်တွေ များစွာပါဝင်ပြီး ကိုယ်ခံစွမ်းအားကို ထိန်းသိမ်းပေးမယ့် ဗီတာမင် E ဓာတ်တွေလည်း ပေါပေါများများ ပါဝင်ပါတယ်။ မနက်ခင်း အပြေးလေ့ကျင့်ခန်း လုပ်ပြီးချိန်မှာအာဟာရပြည့်ဝတဲ့ မနက်စာအတွက် မြေပဲထောပတ် စားပွဲတင်ဇွန်း ၂ ဇွန်းခန့်ကို ဂျုံကြမ်းပေါင်မှုန့် ၂ ချပ်နဲ့ တွဲဖက်စားနိုင်သလို မြေပဲထောပတ် စားပွဲတင်ဇွန်း ၁ ဇွန်းနဲ့ အလတ်စား ပန်းသီးတစ်လုံးတို့ကိုလည်း သုံးဆောင်နိုင်ပါတယ်။

(၃) တူနာ ၊ ဆယ်လမွန် ၊ ကြက်သား

Photo : Runner’s World

မနက်ခင်း မနက်စာကို ပရိုတင်းဓာတ် ပြည့်ပြည့်ဝဝ စားသုံးချင်တယ်ဆိုရင်တော့ တူနာ ၊ ဆယ်လမွန်နဲ့ကြက်သားလို အစားအစာတွေက အသင့်တော်ဆုံးပါပဲ။ ဆယ်လမွန်နဲ့ လတ်ဆတ်တဲ့ တူနာငါး တွေမှာ ရောင်ရမ်းမှုကို လျှော့ချပေးနိုင်တဲ့ အိုမီဂါ-၃ ဖက်တီအက်ဆစ်တွေ ကြွယ်ဝစွာပါဝင်ပြီး ကြက်သားမှာဆိုရင်လည်း အသားဓာတ် ပရိုတင်းအရင်းအမြစ်နဲ့ အမိုင်နိုအက်ဆစ်ဓာတ်များလည်း ပါရှိပါတယ်။ ဆယ်လမွန်ကို အသီးအရွက်ကြော် ၊ ထမင်းတို့နဲ့ ရောမွှေစားနိုင်သလို တူနာငါးကင်နဲ့ ကြက်သားတို့ကို ကင်ပြီး အသီးအရွက် ၊ အာလူးတို့နဲ့ အရသာရှိရှိ အာဟာရပြည့်တဲ့ မနက်စာကို သုံးဆောင်နိုင်ပါတယ်။

(၄) ဒိန်ချဉ်

Photo : MensXP

ဒိန်ချဉ်ဟာ ကြွက်သားတွေကို ပြန်လည်အားဖြည့်ပေးတဲ့ ပရိုတင်းဓာတ် အရင်းအမြစ် ဖြစ်ပါတယ်။ ဒါကြောင့် မနက်ခင်း အပြေးလေ့ကျင့်ခန်း လုပ်ပြီးချိန်မှာ ဒိန်ချဉ်စားပေးမယ်ဆိုရင် ကြွက်သားနာကျင်တာ ၊ ကြွက်သားအားနည်းတာတွေကို ပြန်လည်ကုစားပေးနိုင်မှာ ဖြစ်ပါတယ်။ ကာဗိုဟိုက်ဒရိတ်နဲ့ အမျှင်ဓာတ်တွေကို တိုးမြင့်ဖို့ရန်အတွက် လတ်ဆတ်တဲ့ သစ်သီးတွေ ပျားရည် သို့မဟုတ် Granola တို့ကို ပေါင်းထည့်ပြီး နှစ်သက်သလို စားသုံးနိုင်ပါတယ်။

(၅) ကြက်ဥ

Photo : Veloforte

လွယ်ကူရိုးရှင်းပြီး အချိန်ကုန်သက်သာတဲ့ မနက်စာအတွက် ကြက်ဥတွေက အမြဲတမ်းအကောင်းဆုံးပဲ ဖြစ်ပါတယ်။ ကြက်ဥတစ်လုံးမှာ အရည်အသွေးမြင့် ပရိုတင်းဓာတ် ၆ – ၇ ဂရမ်ခန့် ပါရှိပါတယ်။ မနက်ခင်း ပြေးပြီးနောက် ရိုးရှင်းတဲ့ မနက်စာအတွက် ကြက်ဥကို ပြုတ်၍ဖြစ်စေ ၊ ကာဗိုဟိုက်ဒရိတ်ပါတဲ့ ပေါင်မုန့်တွေနဲ့ဖြစ်စေ တွဲဖက်သုံးဆောင်နိုင်ပါတယ်။

မနက်ခင်း ပြေးပြီးချိန်မှာ နောက်ထပ် အရေးကြီးဆုံး လိုက်နာရမယ့် အချက်တစ်ခုကတော့ ရေဓာတ်ပြန်လည် ဖြည့်တင်းဖို့ပါပဲ။ အားကစားလုပ်ပြီးချိန်မှာ ရေဓာတ်ဆုံးရှုံးမှု မရှိစေဖို့ ရေများများ သောက်ပေးရမှာဖြစ်ပြီး ဓာတ်ဆားနဲ့ Sport Drink တွေကိုလည်း သောက်နိုင်ပါတယ်။

Featured Photo : Men’s Journal