Relationship တစ်ခုမှာ ဖောက်ပြန်ခံရပြီဆိုရင် ခံရတဲ့သူက တီကောင်ဆားပတ်လိုက်သလို စိတ်ရောရုပ်ပါ ထိခိုက်နာကျင်ရတာပဲ မဟုတ်လား။ ဖောက်ပြန်တဲ့ သူက အမှားအတွက် တာဝန်ယူဖြေရှင်းပြီး တောင်ပန်းစကား ပြောတယ်ဆိုဦးတော့ ခံလိုက်ရတဲ့သူရဲ့ စိတ်နှလုံးမှာ ထရော်မာ အကြီးအကျယ် ရသွားပြီ ဖြစ်ပါတယ်။ ဒီခံစားချက်က ဘယ်လောက်ထိ ဆိုးရွားတယ်ဆိုတာကို နှုတ်က ထုတ်ပြောပြလို့ ရပေမယ့် ကိုယ်တိုင်ခံစားခဲ့ရတဲ့ သူလောက်တော့ နာကျင်ရတဲ့ ခံစားချက်ကို ခံစားပေးနိုင်မှာ မဟုတ်ပါဘူး။ ဒါကြောင့်ပဲ လူတွေဟာ ဖောက်ပြန်ခံရရင် အပြီးတိုင် စွန့်လွှတ်တဲ့ လမ်းနဲ့ ပြန်လက်စားချေတဲ့ လမ်း နှစ်ခုကို ရွေးချယ်ကြပါတယ်။ ကိုယ့်အပေါ်မကောင်းတဲ့ လူတစ်ယောက်ကို အပြီးတိုင် စွန့်လွှတ်လိုက်တာက ကိစ္စရှင်းပေမယ့် လက်စားချေ ဖောက်ပြန်ခြင်းကတော့ ဇာတ်လမ်းတွေကို ပိုရှည်စေနိုင်ပါတယ်။ ဒါဆို လက်စားချေ ဖောက်ပြန်ခြင်းက တကယ်ရော အလုပ်ဖြစ်နိုင်လား ? ကိုယ်ပါတနာက ကိုယ်ခံစားခဲ့ရတဲ့ နာကျင်မှုတွေကို ကိုယ်ချင်းစာနာပေးနိုင်မလား ? Relationship ကို အသစ်တဖန် ပြန်လည်တည်ဆောက်ဖို့ ဖြစ်နိုင်မလား ? စတဲ့ မေးခွန်းတွေနဲ့ ပတ်သတ်ပြီး ဆွေးနွေးပေးချင်ပါတယ်။
လူတွေဘာကြောင့် လက်စားချေ ဖောက်ပြန်ခြင်းလမ်းကို ရွေးတာလဲ ?
Photo : Forbes
လူတစ်ယောက်က ဖောက်ပြန်ခံရခြင်းကြောင့် စိတ်ဒဏ်ရာ ရသွားပြီဆိုရင် အချိန်အတိုင်းအတာ တစ်ခုအထိ စိတ်ဒဏ်ရာနွံထဲမှာ နစ်မြုပ်နာကျင် နေတတ်ကြပါတယ်။ ကိုယ့်အပေါ် မလုပ်လောက်ပါဘူး ထင်ထားတဲ့လူက ဒီလို လုပ်ရပ်မျိုး လုပ်ရက်နိုင်လေခြင်း ၊ ဘာကြောင့် ကိုယ့်အပေါ် ရက်ရက်စက်စက် လုပ်နိုင်ရလေခြင်းဆိုတဲ့ အတွေးတွေကပဲ နာကျင်မှုတွေကို တဆစ်ဆစ်နဲ့ ဆက်လက် ခံစားနေစေတာပါ။ တစ်ကြိမ်တစ်ခါ ဖောက်ပြန်ခံရသည်ဖြစ်စေ ၊ အကြိမ်ကြိမ် ဖောက်ပြန်ခံရသည်ဖြစ်စေ စိတ်ရဲ့ဒဏ်ရာအနာတရတွေက မိမိကိုယ် အကြိမ်ကြိမ် ပြန်ပြီး သတ်ဖြတ်နေတော့မှာပါ။ ဒီလို နာကျင်မှု စိတ်ရဲ့ဒဏ်ရာ ဝဲဂယက်ထဲကနေ လွှတ်မြောက်ဖို့ ကြိုးစားရင်းနဲ့ပဲ အချို့လူတွေက လက်စားချေတဲ့ လမ်းကို ရွေးချယ်သွားကြတာ ဖြစ်ပါတယ်။
လက်စားချေ လိုက်ရင် အရာရာပြန်ပြီး အဆင်ပြေသွားမှာလား ?
Photo : Cosmopolitan Magazine
ဒီ Relationship ထဲက အပြီးတိုင် ရုန်းထွက်ဖို့ ဆန္ဒမရှိသေးဘူးဆိုရင်တော့ လက်စားချေလက်တုန့်ပြန်ခြင်းဟာ မှန်ကန်တဲ့ Healing လုပ်နည်းတစ်ခု မဖြစ်နိုင်ပါဘူး။ ဘာလို့ဆို လက်စားချေလိုက်ခြင်းကြောင့် ကိုယ်ခံစားခဲ့ရတဲ့ နာကျင်မှုတွေကို ကိုယ်ချင်းစာနိုင်သွားမယ် ဒါမှမဟုတ် ကိုယ့်စိတ်ကိုယ် သက်သာရာရစေဖို့ လက်တုန့်ပြန်တဲ့ လမ်းကိုရွေးချယ်မယ်ဆိုရင်တောင် အပြန်အလှန် ဖောက်ပြန်မှုတွေနဲ့ ဆက်ဆံရေးတစ်ခုဟာ နဂိုမူလကလို အကောင်းပကတိအတိုင်း မဖြစ်နိုင်တော့ပါဘူး။ တစ်ယောက်အပေါ်တစ်ယောက် သံသယစိတ်တွေ ၊ ယုံကြည်မှုကင်းမဲ့ခြင်းတွေနဲ့ Toxic ဖြစ်နေတဲ့ ဆက်ဆံရေးတစ်ခုဆီကိုသာ ဦးတည်သွားစေမှာပါ။ ဒါကြောင့် လက်စားချေဖို့ မစဉ်းစားခင်မှာ ဒီ Relationship ကနေ အပြီးတိုင် ရုန်းထွက်နိုင်ပြီလား ၊ ရုန်းထွက်ဖို့ ဆန္ဒရှိပြီလား ဒါမှမဟုတ် မစွန့်လွှတ်နိုင်ရင် ခွင့်လွှတ်ခြင်းလမ်းကိုပဲ ရွေးမှာလား စတဲ့ မေးခွန်းတွေကို အရင်ဆုံး ကိုယ့်ကိုယ်ကိုယ် ပြန်မေးခွန်းထုတ် သုံးသပ်သင့်ပါတယ်။
ဖောက်ပြန်တဲ့ လူတစ်ယောက်ကို ဘယ်လို ခွင့်လွှတ်ရမလဲ ?
Photo : Briana MacWilliam
ကိုယ့်အပေါ် ဖောက်ပြန်တဲ့ ပါတနာကို ဘယ်လိုဘယ်ပုံ ခွင့်လွှတ်ပေးရမယ်ဆိုတဲ့ လမ်းညွှန်ချက်တွေရယ်လို့တော့ အတိအကျ မရှိပါဘူး။ လူတစ်ယောက်ချင်းစီရဲ့ စိတ်ခံစားချက် ၊ ကြုံတွေ့ရတဲ့ အဖြစ်အပျက် ဒဏ်ရာအတိမ်အနက်တွေအပေါ် မူတည်ပြီးပဲ အမျိုးမျိုး ကွဲပြားသွားနိုင်ပါတယ်။ သေချာတာတစ်ခုကတော့ ခွင့်လွှတ်ခြင်းလမ်းကို ရွေးမယ်ဆိုရင် ဒဏ်ရာတွေကို ကုစားဖို့ လုံလောက်တဲ့ အချိန် ၊ စိတ်ရှည်သီးခံမှုတွေ လိုပါမယ်။ ဘယ်အရာကိုမှ အလျင်စလို ဆုံးဖြတ်ချက် မချသင့်ပါဘူး။ ဝေဒနာတွေကို အမှန်တကယ် ကုစားနိုင်ဖို့ ကိုယ့်ကိုယ်ကိုယ် နေရာလွတ်တစ်ခုပေးပါ။ ကိုယ့်စိတ်ကိုယ် အကောင်းဆုံး ပြန်လည်တည်ဆောက်ခွင့်ပေးပါ။ ဘယ်တော့မှ မိမိကိုယ်ကိုယ် အတင်းအကြပ် ဖိအားပေးတာမျိုး မလုပ်သင့်ပါဘူး။
အကယ်၍ ကွီးတို့ရော ဖောက်ပြန်ခံရရင် စွန့်လွှတ်တဲ့လမ်းကို ရွေးမှာလား ဒါမှမဟုတ် လက်စားပြန်ချေတဲ့လမ်းကို ရွေးချယ်မှာလား ?
Source : Lifehacker
Featured Photo : Scary Mommy
