ဝီစကီ ရေခဲမုန့်

ကွီးတို့ရဲ့ အသည်းစွဲ ဝီစကီ ကို အရသာရှိတဲ့ ရေခဲမုန့် အဖြစ် ဖန်တီးကာ ပြောင်းလဲပစ်နိုင်တယ်ဆိုတာကို သိပြီးပါပြီလား။ ဝီစကီ ကနေ ရေခဲမုန့် ဖြစ်သွားအောင် မျက်လှည့်ပညာတွေ မလိုအပ်ပါဘူး။ ဝီစကီ စားပွဲတင်ဇွန်း ၃ ဇွန်းခန့် ရှိရုံနဲ့တင် လုံလောက်ပါပြီ။

အခြားသော ပါဝင်ပစ္စည်းအချို့လည်း လိုအပ်ဦးမှာမို့လို့ အဆင်သင့်ပြင်ထားဖို့တော့ လိုပါလိမ့်မယ်။

လိုအပ်မယ့် ပါဝင်ပစ္စည်းအမျိုးအစား စုစုပေါင်းကတော့ …

မြေပဲ ထောပတ် စားပွဲတင်ဇွန်း ၅ ဇွန်း
သကြား စားပွဲတင်ဇွန်း ၁၉ ဇွန်း
နွားနို့ ဖန်ခွက် တစ်ခွက်စာ (စားပွဲတင်ဇွန်း ၁၆ ဇွန်း)
Heavy Whipping Cream ၃ ခွက်စာ (စားပွဲတင်ဇွန်း ၄၈ ဇွန်းစာ)
ဝီစကီ စားပွဲတင်ဇွန်း ၃ ဇွန်း

ဗနီလာ စားပွဲတင်ဇွန်း ၁ ဇွန်း
ချောကလက်ရည် စားပွဲတင်ဇွန်း ၁ ဇွန်းမှ ၂ ဇွန်း (မထည့်လည်းရပါတယ်)

ပြုလုပ်နည်း အဆင့်ဆင့်

၁။ ဇောက်နက်သော ပန်းကန်လုံးထဲတွင် မြေပဲထောပတ်နှင့် သကြားတို့ထည့်ကာ လျှပ်စစ်မွှေစက်ဖြင့် ၁ မိနစ်မှ ၂ မိနစ်ခန့် မွှေပေးလိုက်ပါ။

၂။ ထို့နောက် နွားနို့ကို ဖန်ခွက် တစ်ဝက်ခန့်ထည့်ကာ ပထမတစ်ကြိမ် မွှေပါ။

၃။ ထို့နောက် ခေတ္တခဏစောင့်ပါ။ တအောင့်ကြာတဲ့အခါ ကျန်ရှိနေတဲ့ နွားနို့၊ Heavy Cream ၊ ဝီစကီနှင့် ဗနီလာတို့ထည့်ကာ လျှပ်စစ်မွှေစက်ဖြင့် မွှေပါ။ ထို့နောက် အဖုံးအုပ်ထားပြီး ရေခဲသေတ္တာထဲတွင် အနည်းဆုံး ၂ နာရီခန့်မှ တစ်ညခန့် အအေးခံထားလိုက်ပါ။

၄။ သတ်မှတ်ချိန်ပြည့်တဲ့အခါမှာတော့ ထိုဖျော်ရည်ကို ရေခဲသေတ္တာထဲက ထုတ်ကာ နောက်ဆုံးတစ်ကြိမ်ခန့် မွှေပေးလိုက်ပါ။

၅။ ထို့နောက် ရရှိလာတဲ့ ဖျော်ရည်ကို ရေခဲမုန့်ဘူး (သို့) ဘူးအလွတ်တစ်ခုခုထဲထည့်ပါ။ ထို့နောက် အဖုံးကို လုံအောင်ပိတ်ပြီး Freezer ထဲထည့်ကာ ခဲသွားအောင် အအေးခံလိုက်ပါ။