ဘိုင်ယန်မြူးနစ် တိုက်စစ်မှူး ရောဘတ် လီဝန်ဒေါ့စကီး ကတော့ ဆဲလ်ဘတ်အသင်းနဲ့ ပထမအကျော့ ပွဲစဉ်မှာ ခြေစွမ်းကောင်း မပြနိုင်ခဲ့သလို ကန်ချက် ၁ ကြိမ်မှ မရှိခဲ့တဲ့အထိ လွဲချော်မှုတွေ ရှိခဲ့ပေမယ့် ဒုတိယအကျော့ အိမ်ကွင်းပွဲစဉ်မှာတော့ ပွဲချိန် ၂၂ မိနစ်အတွင်း ဟက်ထရစ် သွင်းနိုင်ခဲ့ပါတယ်။
Photo : Yahoo! Sports
ဆဲလ်ဘတ်အသင်းဟာ ပြီးခဲ့တဲ့လက သြစတြီးယားမှာ ယှဉ်ပြိင်ကစားခဲ့တဲ့ ချန်ပီယံလိဂ် ၁၆ သင်း အဆင့် ပထမအကျော့ ပွဲစဉ်မှာ ဘိုင်ယန်မြူးနစ်အသင်းကို ၁ – ၁ ဂိုးနဲ့ သရေရလဒ် ကစားနိုင်ခဲ့တာ ဖြစ်ပါတယ်။ ဒါပေမယ့် မနေ့က အင်္ဂါနေ့ညမှာ ကစားခဲ့တဲ့ ဒုတိယအကျော့ ပွဲစဉ်မှာတော့ ဘိုင်ယန်မြူးနစ်အသင်း ရလဒ်ကောင်းတွေ ပိုင်ဆိုင်နိုင်ခဲ့ပြီး ပွဲကစားချိန် ၁၂ မိနစ်မှာ တိုက်စစ်မှူး ရောဘတ် လီဝန်ဒေါ့စကီး က အသင်းအတွက် ဦးဆောင်ဂိုးကို စတင်သွင်းယူပေးခဲ့ပါတယ်။
ပွဲချိန် ၂၁ မိနစ်မှာတော့ သြစတြီးယား ကြယ်ပွင့် ဝေါ့ဘာက ပိုလန် လက်ရွေးစင် တိုက်စစ်မှူးကို လီဝန်ဒေါ့စကီးကို ညာဘက် ပင်နယ်တီဧရိယာ အစွန်းမှာ ဆွဲချခဲ့တာကြောင့် VAR ပြန်လည် စစ်ဆေးပြီးတဲ့နောက် ဘိုင်ယန်မြူးနစ်အသင်း ဒုတိယအကြိမ် ပင်နယ်တီ ပြစ်ဒဏ်ဘော ကန်ခွင့်ရရှိခဲ့တာ ဖြစ်ပါတယ်။
အသက် ၃၃ နှစ်အရွယ် ပိုလန်သားဟာ ပါးနပ်စွာပဲ ဆဲလ်ဘတ် ဂိုးသမားကို ကျော်ဖြတ်ပြီး ဘိုင်ယန်မြူးနစ်အသင်းအတွက် ဒုတိယမြောက် ဦးဆောင်ဂိုးကို ထပ်မံသွင်းယူပေးခဲ့တာ ဖြစ်ပါတယ်။
ပင်နယ်တီ ကန်သွင်းပြီး မကြာမီမှာပဲ ပွဲချိန် ၃၂ မိနစ်မှာပဲ လီဝန်ဒေ့ါစကီး က ဘောလုံးရှင်းထုတ်ဖို့ ကြိုးစားနေတဲ့ ပြိုင်ဘက်ကစားသမား ကွန်း ဆီကနေ ဘောလုံးကိုလုယူပြီး ၃ ဂိုးမြောက် ဟက်ထရစ် ဂိုးကို အပြီးသတ် ကန်သွင်းယူခဲ့တာ ဖြစ်ပါတယ်။
Photo : MARCA
ပြီးခဲ့တဲ့ ရက်သတ္တပတ်တွေအတွင်း ဘိုင်ယန်မြူးနစ်နဲ့ အနာဂတ် မရေမရာဖြစ်နေတယ်လို့ သတင်းတွေ ထွက်ပေါ်နေခဲ့တဲ့ လီဝန်ဒေါ့စကီးဟာ ဒီရာသီအတွင်း ပြိုင်ပွဲစုံ သွင်းဂိုး ၄၀ ကျော်သွင်းယူထား နိုင်ခဲ့ပါတယ်။ ဒါ့အပြင် ပိုလန်ကြယ်ပွင့်ဟာ ကစားသမားဘဝ တစ်လျှောက် ၇ ရာသီဆက်တိုက် စံချိန်တင် သွင်းဂိုး ၄၀ နဲ့ အထက် သွင်းနိုင်ခဲ့တာလည်း ဖြစ်ပါတယ်။
ပရိသတ်တစ်ဦးကတော့ ” လီဝန်ဒေါ့စကီး အကြောင်း ရုပ်ရှင်တစ်ကား ရိုက်သင့်နေပါပြီ ၊ သူက တကယ်ကို ကြောက်စရာကောင်းလောင်အောင် ကောင်းတဲ့ကစားသမားပါ” လို့ တွစ်တာ လူမှုကွန်ယက်မှာ ရေးသားခဲ့ပါတယ်။ နောက်ထပ် တစ်ဦးကလည်း ” ပွဲကစားချိန်မှာ ပထမပိုင်းမှာတင် လီဝန်ဒေါ့စကီး ဟက်ထရစ် သွင်းနေပြီ ၊ ကမ္ဘာ့အကောင်းဆုံး ကစားသမားပါပဲ ” လို့ မှတ်ချက်ပေးခဲ့ပါတယ်။ ထပ်မံပြီး ပရိသတ်တစ်ဦးကလည်း ” လီဝန်ဒေါ့စကီး က ဆယ်စုနှစ်အတွင်း အကောင်းမွန်ဆုံးနဲ့ အဆုံးသတ်အကောင်းဆုံး တိုက်စစ်မှူးအဖြစ် သတ်မှတ်ခံရ သင့်နေပါပြီ။ ဆွာရက်ဇ်ကို မလေးမစားလုပ်တာ မဟုတ်ပေမဲ့ သူက တကယ်ကို သားရဲတစ်ကောင်လို အကောင်းဆုံး တိုက်စစ်မှူးပါပဲ” လို့ ဖြည့်စွက် ရေးသားခဲ့ပါတယ်။
Photo : SPORTbible
