အေးချမ်းတည်ငြိမ်တဲ့ဘဝကို ပိုင်ဆိုင်ချင်တယ်ဆိုရင် အကောင်းမြင်စိတ် ဟာ အခြေခံအုတ်မြစ်ပါပဲ။ စာရေးသူတို့ရဲ့ စိတ်ထဲမှာ အဆိုးမြင် အတွေးတွေ စုပုံလာတာနဲ့အမျှ ဘဝရဲ့လှပတဲ့ အရည်အသွေးတွေ ၊ တန်ဖိုးထားမှုတွေကို အာရုံမစိုက်နိုင်တော့ပဲ စိတ်ဝိညာဉ်တစ်ခုလုံးကို ပျက်စီးရာပျက်စီးကြောင်းဆီသို့ ဦးတည်သွားစေနိုင်ပါတယ်။ ဒီလို အဆိုးမြင်စွမ်းအားတွေကို သင့်ဘဝထဲ ဝင်ခွင့်ပြုမယ့်အစား အကောင်းမြင်စိတ်နဲ့ ဘဝကို အလင်းသစ်ဆီသို့ ခေါ်ဆောင်သွားလိုက်ပါ။ ဒီဆောင်းပါးမှာတော့ အကောင်းမြင်စိတ်က သင့်ဘဝအပေါ် ဘယ်လိုအကျိုးသက်ရောက်မှုတွေ ရနိုင်မလဲဆိုတာ ပြောပြပေးပါမယ်။
(၁) စိတ်ဖိစီးမှုတွေကို သက်သာစေတယ်
Photo : Inc. Magazine
ရိုးရိုးလေး တွေးကြည့်ရအောင်ပါ။ အတွေးတွေထဲမှာ မကောင်းတဲ့ စွမ်းအားတွေ ၊ အဆိုးမြင်အတွေးတွေ လွှမ်းမိုးနေတဲ့အခါ သင့်ရဲ့စိတ်ဝိညာဉ်ဟာ လေးလံထိုင်းမှိုင်းနေမှာပါ။ ကိုယ့်ကိုယ်ကိုယ် ဖိအားတွေ ထပ်ထပ်ပေးနေရုံမှအပ တခြားကောင်းကျိုး မရှိနိုင်ပါဘူး။ ဆန့်ကျင်ဘက်အနေနဲ့ ကောင်းတဲ့ အတွေးတွေ ၊ အပြုသဘောဆောင်တဲ့ အမြင်တွေကို ရှေ့တန်းတင်လိုက်မယ် ဆိုရင်တော့ ပေါ့ပါးတဲ့ စိတ်ဝိညာဉ်ကို ရရှိမှာဖြစ်ပြီး သင့်ဘဝထဲက ကြုံတွေ့နေရတဲ့ ဖိအားတော်တော်များများကိုပါ သက်သာပြေလျော့ သွားစေမှာ ဖြစ်ပါတယ်။
(၂) ပေါ့ပါးသွက်လက်မှု ရစေတယ်
Photo : Medium
စိတ်နဲ့ခန္ဓာဟာ အမြဲဆက်နွယ် နေတာပါ။ စိတ်မပျော်ရင် လူမလန်းနိုင်ပါဘူး။ အတွင်းစိတ်ကို ကောင်းတဲ့ဘက်သို့ ဦးတည်ပြီး အပြုသဘောဆောင်တဲ့အရာတွေ များများတွေးပေးမယ်ဆိုရင် ရုပ်ပိုင်းဆိုင်ရာမှာပါ ကောင်းမွန်တဲ့ အကျိုးသက်ရောက်မှုတွေ ဖြစ်ပေါ်စေမှာပါ။ အကောင်းမြင်စိတ်ရဲ့ အကျိုးဆက်က စိတ်ပိုင်းဆိုင်ရာ တည်ငြိမ်မှုကို ရစေတဲ့အပြင် ရုပ်ပိုင်းဆိုင်ရာမှာပါ ပေါ့ပါးသွက်လက်စေပြီး တက်ကြွလန်းဆန်းတဲ့ တစ်နေ့တာကို ပိုင်ဆိုင်နိုင်ပါလိမ့်မယ်။
(၃) အာရုံစူးစိုက်မှု ပိုကောင်းစေတယ်
Photo : BenchmarkONE
အတွေးတွေက ရှင်းလင်းနေတဲ့အခါ သင့်ရဲ့စိတ်ဟာ တည်ငြိမ်နေတဲ့ ရေပြင်တစ်ခုလို ငြိမ်သက်အေးချမ်းတဲ့ အခြေအနေတစ်ခုမှာ ရှိနေမှာပါ။ အတွေးတွေ သန့်စင်ပြီး ရှင်းလင်းနေလေ အာရုံစူးစိုက်နိုင်စွမ်းဟာ ပိုပြီးကောင်းလေ ဖြစ်ပါတယ်။ တစ်နေ့တာ လုပ်ငန်းဆောင်တာတွေကို အာရုံစူးစိုက်မှုအပြည့်နဲ့ လုပ်ဆောင်နိုင်ဖို့ဆို အကောင်းမြင်စိတ် ဟာ အစွမ်းထက်တဲ့ ဆေးတစ်ခွက်ပါပဲ။
(၄) ကိုယ့်ကိုယ်ကိုယ် ယုံကြည်မှု တိုးစေတယ်
Photo : LinkedIn
ကိုယ့်ကိုယ်ကိုယ် သံသယဖြစ်တာ ၊ မယုံကြည်နိုင်တာ ၊ စိတ်ဓာတ်ကျတာ စတဲ့ အခြေအနေတွေဟာ အဆိုးမြင်စိတ်ကနေ ပေါက်ဖွားလာတဲ့ ဘေးထွက်ဆိုးကျိုးတွေ ဖြစ်ပါတယ်။ အဆိုးမြင်စိတ်များလွန်းရင် ဘာကိုမှ ကောင်းကောင်း စဉ်းစားဆုံးဖြတ်နိုင်တော့မှာ မဟုတ်သလို တွေဝေတာ ၊ ခြေတုန်ချတုန်ဖြစ်တာ စတဲ့ ပြဿနာတွေနဲ့ ကိုယ့်ကိုယ်ကိုယ် ယုံကြည်မှု မပေးနိုင်တော့တဲ့အထိ ဖြစ်လာနိုင်ပါတယ်။ ဒါကြောင့် အကောင်းမြင်စိတ် ကို များများမွေးပေးပါ။ အကောင်းမြင်စိတ်ဟာ သင့်ကို ဝေဖန်ပိုင်းခြားနိုင်စွမ်းတွေ ၊ ခိုင်မာပြတ်သားတဲ့ ဆုံးဖြတ်ချက်တွေကို လုပ်ဆောင်နိုင်စေဖို့ ကူညီပေးနိုင်ပြီး ကိုယ့်ကိုယ်ကိုယ် ယုံကြည်မှု ပိုရှိလာစေမှာ ဖြစ်ပါတယ်။
Source : Life Alofa
Featured Photo : Lucemi Consulting
