ကွီးတို့ရေ အမျှင်ဓာတ် ဟာ ကျန်းမာရေးနဲ့ ညီညွတ်ပြီး မဖြစ်မနေ စားပေးသင့်တဲ့ အစိတ်အပိုင်းတစ်ခုပါ။ အမျှင်ဓာတ်ဟာ ကွီးတို့ရဲ့ အစာခြေစနစ်ကို ကောင်းမွန်စေပြီး ဝမ်းချုပ်ခြင်းကဲ့သို့သော အဖြစ်များတဲ့ ပြဿနာများကို ဖြေရှင်းနိုင်ပါတယ်။ အမျှင်ဓာတ်က ဝမ်းတွေရဲ့ အရွယ်အစားနဲ့ အလေးချိန်ကို တိုးစေပြီး ပျော့ပြောင်းစေပါတယ်။ ၎င်းသည် အူလမ်းကြောင်းလှုပ်ရှားမှုများကို လွယ်ကူစွာဖြတ်သန်းနိုင်စေပြီး၊ အလုံးစုံကျန်းမာရေးကို အထောက်အကူပြုနိုင်တဲ့ အပြင် လိပ်ခေါင်းရောဂါ ကဲ့သို့သော ရောဂါများ ဖြစ်ပွားနိုင်ခြေကို လျှော့ချပေးနိုင်ပါတယ်။ ဒါ့အပြင် အမျှင်ဓာတ် ကြွယ်ဝသော အစားအစာများ ကို စားသုံးပေးခြင်းဖြင့် နှလုံးရောဂါ ဖြစ်ပွားနိုင်ခြေကို လျှော့ချပေးနိုင်တာ၊ ဆီးချိုရောဂါနဲ့ ကင်ဆာအမျိုးအစားအချို့ကို ကာကွယ်ပေးနိုင်ပါတယ်။
ဒီလို ခန္ဓာကိုယ်အတွက် ကောင်းမွန်တဲ့ အမျှင်ဓာတ်ကို လူတော်တော်များများက စားသုံးပေးရမယ်ဆိုတာ သိပေမဲ့လည်း လက်တွေ့မှာတော့ ဂရုတစိုက်စားသုံးဖို့ မေ့လျော့နေတတ်ပါတယ်။ သို့သော်လည်း ကောင်းတဲ့အချက်က အမျှင်ဓာတ်ကို အရသာရှိသော အစားအစာများစွာတွင် တွေ့ရှိရပြီး ကွီးတို့ရဲ့ နေ့စဉ် အစားအစာတွင် ပေါင်းထည့်ရန် လွယ်ကူပါတယ်။ ဆက်လက်ပြီးတော့ အမျှင်ဓာတ် ကြွယ်ဝသော အစားအစာများ ကို ကြည့်လိုက်ရအောင်။
(၁) ထောပတ်သီး
Photo : Times of India
ကျွန်တော်တို့ နိုင်ငံမှာ လွယ်လွယ်ကူကူ ရနိုင်တဲ့ ထောပတ်သီးဟာ ကျန်းမာရေးနဲ့ ညီညွတ်တဲ့ အဆီတွေကို စားသုံးနိုင်တဲ့ အကောင်းဆုံး အရာတွေထဲက တစ်ခုဖြစ်ပြီး ကာဗိုဟိုက်ဒရိတ်လည်း နည်းတဲ့အပြင် အမျှင်ဓာတ်လည်း မြင့်မားပါတယ်။ ကွီးတို့အနေနဲ့ ထောပတ်သီးကို ကိုယ်ကြိုက်နှစ်သက်သလို စားသုံးနိုင်ပါတယ်။ ထောပတ်သီး ၁၀၀ ဂရမ်လျှင် အမျှင်ဓာတ် ၆.၇ ဂရမ်ခန့် ရရှိနိုင်ပါတယ်။
(၂) အနက်ရောင် ချောကလက်
Photo : HealthShots
ချောကလက်ကလည်း အမျှင်ဓာတ် ကြွယ်ဝသော အစားအစာများ ထဲက တစ်ခုဆိုရင် ကွီးတို့ အံ့ဩသွားမလား။ ဟုတ်ပါတယ်။ ချောကလက်က ဓာတ်တိုးဆန့်ကျင်ပစ္စည်း ကြွယ်ဝရုံတင်မကဘဲ အမျှင်ဓာတ်ကြွယ်ဝတဲ့ အရင်းအမြစ်တစ်ခုလည်း ဖြစ်ပါတယ်။ သို့သော် သကြားပါဝင်မှုနည်းပြီး အနည်းဆုံး ၇၀ % အနက်ရောင် ချောကလက်ကို ရွေးချယ်ရပါမယ်။
(၃) ဗန်ဒါစေ့
Photo : Times of India
ဗန်ဒါစေ့ကလည်း အမျှင်ဓာတ်ရဲ့ အကောင်းဆုံး အရင်းအမြစ်များထဲမှ တစ်ခုဖြစ်ပါတယ်။ ဗန်ဒါစေ့မှာ ကျန်းမာရေးနဲ့ ညီညွတ်သောအဆီများ၊ မဂ္ဂနီဆီယမ်၊ မဂ္ဂနိစ့်နှင့် ဗီတာမင်အီးတို့ အပါအဝင် အာဟာရဓာတ်များ သိပ်သည်းကြွယ်ဝစွာ ပါဝင်ပါတယ်။ ဒါ့အပြင် ဗန်ဒါစေ့မှာ အမျှင်ဓာတ် ကြွယ်ဝသောကြောင့် အစွမ်းထက်ပြီး ကျန်းမာရေးနှင့်ညီညွတ်သော သရေစာအဖြစ် ပြုလုပ်စားသုံးနိုင်ပါတယ်။
(၄) ပဲအမျိုးမျိုး
Photo : Mashed
ပဲအမျိုးမျိုးသည် အမျှင်ဓာတ်များသော အစားအစာအတွက် နောက်ထပ် ရွေးချယ်မှုကောင်း တစ်ခုဖြစ်ပြီး ပဲများကို ပဲသုတ်၊ ပဲဟင်းချို စသည့် အမျိုးမျိုးသော ဟင်းလျာများ ဖန်တီးနိုင်ပါတယ်။ ပဲများမှာ ပရိုတင်းနှင့် အမျှင်ဓာတ်များအပြင် အခြားသော အာဟာရဓာတ်များစွာလည်း ပါဝင်ပါတယ်။
(၅) သစ်တော်သီး
Photo : The Economics Times
အသီးတော်တော်များများက အမျှင်ဓာတ် ကြွယ်ဝပြီး ထိုအထဲမှာ သစ်တော်သီများလည်း အပါအဝင် ဖြစ်ပါတယ်။ သစ်တော်သီးများက အမျှင်ဓာတ် များစွာပါဝင်တဲ့အပြင် အရသာနှင့်ပြည့်စုံပြီး ဗီတာမင် C နှင့် ဗီတာမင် K ကြွယ်ဝပါတယ်။
(၆) Chia Seeds
Photo : Ayoub’s Dried Fruit
အမျှင်ဓာတ် ကြွယ်ဝသော အစားအစာများကို ပြောတဲ့ အခါမှာ Chia Seeds ကို ချန်ထားခဲ့လို့ မရပါဘူး။ Chia Seeds မှာ ကယ်လ်စီယမ်၊ မဂ္ဂနီဆီယမ်၊ ဖော့စဖရပ်၊ အိုမီဂါ-၃ ဖက်တီးအက်ဆစ် နှင့် အမျှင်ဓာတ်များ ပါဝင်ပြီး အာဟာရဓာတ်လည်း ကြွယ်ဝပါတယ်။ ၎င်းကို ကြိုက်နှစ်သက်သလို ရောစပ်ပြီး စားသုံးနိုင်တာကြောင့် ကျန်းမာရေး လိုက်စားသူများကြားတွင် ရေပန်းစားပါတယ်။
(၇) ဟင်းသီးဟင်းရွက်များ
Photo : Dairy Council of Colifornia
ကွီးတို့ရေ အမျှင်ဓာတ် ကြွယ်ဝသော အစားအစာများကို တကူးတက ရွေးချယ်ပြီး မစားသုံးဖြစ်ဖူးဆိုလည်း မပူပါနဲ့။ ကွီးတို့ နေ့စဉ်စားသုံးနေတဲ့ ဟင်းလျာထဲမှာ ဟင်းသီးဟင်းရွက်များကို များများချက်ပြီး စားသုံးပေးပါ။ သစ်သီးဝလံနဲ့ ဟင်းသီးဟင်းရွက်တွေမှာ အမျှင်ဓာတ်တွေအပြင် ဗီတာမင်နဲ့ သတ္တုဓာတ်တွေ ကြွယ်ဝပါတယ်။ နေ့တိုင်းပုံမှန် စားသုံးပေးသင့်ပါတယ်။
(၈) ဘယ်ရီသီးများ
Photo : World Food Markets
ဘယ်ရီသီးတွေဟာ သူတို့ရဲ့ Antioxidants ကြွယ်ဝမှုကြောင့် လူသိများပေမဲ့ အမျှင်ဓာတ်လည်း ကြွယ်ဝစွာ ပါဝင်ပါတယ်။ လတ်ဆတ်တဲ့ ဘလူးဘယ်ရီသီးတစ်ခွက်က ကွီးတို့အတွက် အမျှင်ဓာတ် ၄ ဂရမ်နီးပါးကို ပေးစွမ်းနိုင်ပါတယ်။ ထို့အတူ ဘလက်ဘယ်ရီ၊ စတော်ဘယ်ရီနဲ့ ရက်စ်ဘယ်ရီသီးတွေဟာလည်း အမျှင်ဓာတ်ကြွယ်ဝတဲ့ အရင်းအမြစ်တစ်ခု ဖြစ်ပါတယ်။
အခုဖော်ပြပေးလိုက်တဲ့ အမျှင်ဓာတ် ကြွယ်ဝသော အစားအစာများ ကို ပုံမှန် အလေးပေး စားသုံးခြင်းဖြင့် ကွီးတို့ရဲ့ အစာခြေစနစ်ကို ကောင်းမွန်စေသည်သာမက အခြားသော ကျန်းမာရေး အကျိုးကျေးဇူးများစွာကိုလည်း ရရှိမှာ ဖြစ်ပါတယ်။
Source : CNET
Featured Photo : Victus
