စားလို့မြိန် အိပ်လို့ကောင်း ဆိုတဲ့ စကားနဲ့ ညီသူတွေဟာ တကယ်အားကျစရာပါ။ တစ်နေကုန်တစ်နေခန်း လှုပ်ရှားရုန်းကန်ခဲ့ရသူချင်းအတူတူ ညဘက်တွေ အိပ်လို့မရဘဲ အိပ်ရာထဲ တလူးလူးတစ်လှိမ့်လှိမ့်နဲ့ နေရတာလည်း ငရဲလို့တောင် ဆိုချင်ပါတယ်။ တကယ်တော့ အိပ်ရာထဲရောက်တာနဲ့ နှစ်နှစ်ခြိုက်ခြိုက် အိပ်မောကျတတ်သူတွေဟာ အခုပြောတဲ့ အကျင့်ကောင်းတွေ ရှိနေလို့ ဖြစ်ပါတယ်။
(၁) ဇီဝနာရီချိန်ညှိထားတယ်
Photo: simplifaster
အိပ်ရာဝင်တဲ့ အကျင့်မှန်တာကို ဆိုလိုတာပါ။ လူတစ်ယောက်ရဲ့ Sleep Cycle (အိပ်စက်မှုစက်ဝန်း) ဟာ တစ်ကြိမ်မှာ မိနစ် ၉၀ ကြာပါတယ်။ တစ်ညကို ၅ ကြိမ်ခန့် ရှိပါတယ်။ ဒီတော့ ပျမ်းမျှ တစ်ညကို ၇ နာရီခွဲလောက် အချိန်ရှိပါတယ်။ အိပ်ရေးဝပြီး အိပ်ချိန်မှန်ဖို့အတွက် အရေးကြီးတာ ပုံမှန်လုပ်ရိုးလုပ်စဉ် ဖြစ်သွားဖို့ပါပဲ။ ညဘက် ၁၀ နာရီ အိပ်ရာဝင် မနက် ၆နာရီထ ဆိုတာ အလေ့အကျင့်လုပ်ပေးရင် ဖြစ်ပါတယ်။
(၂) အိပ်ရာထဲ ဖုန်းမယူဘူး
Photo: The Sun
ဒီအကျင့်ကတော့ ဖျောက်သင့်ပါတယ်။ အိပ်ရာထဲအထိ ဖုန်းယူတာက သင့်အိပ်စက်မှုကို အကြီးအကျယ်နှောင့်ယှက်ပါလိမ့်မယ်။ အိပ်ရာမဝင်ခင် အခန်းထဲ ၂ နာရီ ၃ နာရီလောက် ကြာအောင် မီးမှိန်မှိန်လေး ထွန်းထားပါ။ အိပ်ခါနီး ရေချိုးတာကလည်း အကြံကောင်းတစ်ခုပါပဲ။
(၃) အစားအသောက် ဂရုစိုက်တယ်
Photo: livekindly
ညနေဘက်လောက်ကတည်းက ကော်ဖီတို့ လက်ဖက်တို့လို အစားအသောက်တွေ ရှောင်ပါ။ အချိုဓါတ်များတာတွေ ၊ အရက်သေစာ နဲ့ အပူအစပ်အစားအစာတွေ စားတာက ညဘက်အိပ်စက်မှုကို ထိခိုက်စေနိုင်ပါတယ်။ ပေါင်မုန့်နည်းနည်း ကွေကာအုပ်တို့ စားပေးသင့်ပါတယ်။ နို့နဲ့ နို့ထွက်ပစ္စည်းတွေ ငှက်ပျောသီးနဲ့ ချယ်ရီသီးတွေကလည်း သင့်အိပ်စက်မှုကို အားပေးပါတယ်။
(၄) စာဖတ်တယ်
Photo: pickpik
ညဘက်နှစ်နှစ်ခြိုက်ခြိုက် အိပ်ရာဝင်သူတွေဟာ စာဖတ်ရတာကို ကြိုက်သူတွေ ဖြစ်လေ့ရှိပါတယ်။ အိပ်ရာမဝင်ခင် ၁ နာရီ ၂ နာရီလောက်ကတည်းက ဖုန်းကို တစ်နေရာ ထားလိုက်ပြီး စာအုပ်တစ်အုပ်ကောက်ကိုင်ကြတာပါ။ စာဖတ်ခြင်းဟာ စိတ်ကို ငြိမ်သက်သွားစေပါတယ်။
Telegraph ရဲ့ သတင်းတစ်ပုဒ်မှာတော့ ၆ မိနစ်လောက် စာဖတ်လိုက်တာဟာ ကြွက်သားတင်းမာမှုတွေ လျော့ပါးပြီး နှလုံးခုန်နှုန်း လျော့ကျလာစေတယ်လို့ ဆိုပါတယ်။ သောကနည်းပြီး စိတ်ဖိစီးမှု လျော့ပါးသွားသူဟာ နှစ်ခြိုက်စွာ အိပ်ပျော်နိုင်ပါတယ်။
