ငွေရှာတယ်ဆိုတာ လွယ်တဲ့ကိစ္စမဟုတ်ပါဘူး။ ငွေသုံးရတာကျတော့ ငွေရှာတာနဲ့ ဆန့်ကျင်ဘက်ပါပဲ။ လွယ်လွယ်လေး ငွေသုံးမိနိုင်တဲ့ နေရာတွေမှ အများကြီး ရှိပါတယ်။ ငွေသုံးတိုင်း ကိုယ့်အတွက် တစ်စုံတစ်ရာတန်ဖိုးတစ်ခု ကျန်ခဲ့တာမျိုး ဖြစ်ဖို့ ငွေကုန်မခံသင့်တဲ့ နေရာ ၄ မျိုးအကြောင်း ပြောပြပေးချင်ပါတယ်။
(၁) အစားအသောက် အလွန်အကျွံ မှာစားခြင်း
Photo: Freepik
ကျွန်တော်တို့ မြန်မာစကားပုံမှာ “ဥစ္စာဖြို စားဖိုက” ဆိုတဲ့ စကားရှိပါတယ်။ အစားအသောက်ကြောင့် ပိုက်ဆံအကုန်အကျများတာဟာ အတော်လေး မနည်းမနောတဲ့ ပမာဏဖြစ်ပါတယ်။ အမေရိကန်ပြည်ထောင်စု စိုက်ပျိုးရေးဌာနရဲ့ ကိန်းဂဏန်းတွေအရ နိုင်ငံအတွင်း ထုတ်လုပ်တဲ့ အစားအသောက်တွေရဲ့ ၃၀ ကနေ ၄၀% ဟာ အလေအလွင့်ဖြစ်ကုန်တယ်လို့ ဆိုပါတယ်။
စားသောက်ဆိုင်တွေမှာ တန်ဖိုးကြီး အစားအသောက်တွေ မကုန်မခမ်းမှာစားတာမျိုးကလည်း ပိုက်ဆံစုချင်သူတဲ့ ရှောင်ကြဉ်သင့်တဲ့ အရေးကြီးအချက်ပဲ ဖြစ်ပါတယ်။ အစားအသောက်အတွက် ငွေအလွန်အကျွံ မသုံးမိစေဖို့ ဆာလောင်နေတုန်း တွေ့ကရာဝယ်တာမျိုး မလုပ်ပါနဲ့။ မလိုအပ်ဘဲ တာရှည်ခံအစားအသောက်တွေ အမြောက်အများ ဝယ်စုတာမျိုးလည်း ရှောင်ကြဉ်ဖို့ ပြောချင်ပါတယ်။
(၂) ထီထိုးခြင်း
Photo: Freepik
ကံကို ယုံပြီး ကိုယ့်အိတ်ထဲက ငွေကို အကုန်မခံလိုက်ပါနဲ့။ ထီထိုးတယ်၊ လောင်းကစားလုပ်တယ်ဆိုတာ နိုင်ခြေမရှိသလောက် နည်းတဲ့ စိတ်ကူးယဉ်မှုတစ်ခုပဲ ဖြစ်ပါတယ်။ အဲ့ဒီလို လုပ်မယ့်အစား ကိုယ်ရသလောက် ငွေကြေးကို လိုတဲ့နေရာသုံး ၊ စုသင့်သလောက် စု ၊ အလုပ်လုပ်ဖို့ သုံးရင်သုံးလိုက်ပါ။ ဒီလိုမျိုး အသုံးချတာကမှ အကျိုးအမြတ်ကို မြင်ရပါလိမ့်မယ်။
(၃) လစဉ်ကြေးအမျိုးမျိုး
Photo: Freepik
လစဉ်ကြေးဆိုတာ အခွန်လိုမျိုး မဟုတ်ပါဘူး။ အင်တာနက်ဘေလ်တို့ ၊ အသက်အာမခံကြေး ၊ အသင်းဝင်ကြေးတို့ Credit Card အတိုးကနေ လောင်းကစားဆန်ပြီး မသေချာတဲ့ လစဉ်စုကြေးလိုမျိုးအထိ လစဉ်ကြေးတွေကလည်း ကိုယ့်ရှာထားတဲ့ ဝင်ငွေကို တိုက်စားနေတာ ဖြစ်ပါတယ်။ ဒါကြောင့် တတ်နိုင်သမျှ လစဉ်ကြေးအမြောက်အများ ဆောင်ရတာမျိုးကို လျှော့ချပြီး မဖြစ်မနေ လိုအပ်တဲ့လစဉ်ကြေးမျိုးပဲ လုပ်ထားသင့်ပါတယ်။
(၄) မလိုအပ်တဲ့ အိမ်သုံးပစ္စည်းတွေ
Photo: Freepik
အိမ်သုံးပစ္စည်းတွေထဲမှာ ကျွန်တော်တို့ တကယ်မလိုအပ်တဲ့ ၊ မသုံးဖြစ်တဲ့ ပစ္စည်းတွေ ဝယ်ထားမိတတ်ပါတယ်။ မဝတ်ဖြစ်တဲ့ အဝတ်အစားနဲ့ ရေချိုးခန်းသုံး သန့်ရှင်းရေးပစ္စည်းတွေအထိ တကယ်အသေးစိတ် ပြန်ဆန်းစစ်ကြည့်ရင် ကိုယ့်အတွက် အသုံးမတည့်တဲ့ ပစ္စည်းစာရင်းတွေ ထွက်လာပါလိမ့်မယ်။ အရေးကြီးတဲ့ အချက်က ကိုယ့်အိမ်မှာ သုံးဖြစ်မှာ မဟုတ်တဲ့ ပစ္စည်းတွေအတွက် ပိုက်ဆံအကုန်မခံဖို့ပါပဲ။