အရပ်အမောင်းဆိုတာ မျိုးရိုးပေါ် အများကြီး မူတည်တာ မှန်ပေမယ့် အာဟာရကလည်း လူရဲ့ ဖွံ့ဖြိုးကြီးထွားမှုအတွက် မရှိမဖြစ် အရေးပါတဲ့အရာဆိုတာ မေ့ထားလို့ မရပါဘူး။ အမြင့်ဆုံးအရပ်အမြင့်ကို ရောက်သွားရင် လူဟာ ဆက်ပြီး အရပ်မရှည်နိုင်တော့ဘူးဆိုပေမယ့် တချို့အစားအသောက်တွေက အရိုးအဆစ် နဲ့ ကိုယ်ထည်တည်ဆောက်ပုံကို ကျန်းမာပြီး ဟန်ချက်ညီအောင် ထိန်းပေးခြင်းအားဖြင့်လည်း အရပ်ရှည်မှုကို ပံ့ပိုးပေးနိုင်ပါတယ်။
အာဟာရဓါတ်အနေနဲ့ ပရိုတိန်းဟာ ကြွက်သားတစ်သျှူးဖွံ့ဖြိုးမှုနဲ့ ကိုယ်ခံအားလုပ်ဆောင်ချက်ကို အားကောင်းစေပြီး ကယ်လ်ဆီယမ် ၊ ဗိုက်တာမင်ဒီ ၊ မဂ္ဂနီဆီယမ် နဲ့ ဖော့စဖော့ရပ်စ်တို့က အရိုးကြီးထွားကျန်းမာမှုအတွက် အထောက်အကူပြုပါတယ်။ အချဉ်ဖောက်ထားတဲ့ အစားအသောက်တွေမှာ တွေ့ရတဲ့ လူကို အကျိုးပြုတဲ့ ဘက်တီးရီးယားတွေကလည်း ကလေးတွေ ဖွံ့ဖြိုးကြီးထွားမှုကို အားပေးတယ်လို့ ဆိုပါတယ်။
ဒီတော့ အရပ်ရှည်ချင်ရင် အစားအသောက်နဲ့ ပြင်လို့ ရတယ်ဆိုတာ သိလောက်ပြီ ထင်ပါတယ်။ ဒီတစ်ခေါက်မှာ အရပ်မြင့်ချင်သူတွေအတွက် အကောင်းဆုံးအစားအသောက်တချို့အကြောင်း မျှဝေပေးလိုက်ပါတယ်။
(၁) ပဲ
Photo: Unsplash
ပရိုတိန်းကြွယ်ဝတယ်လို့ ကျော်ကြားတဲ့ ပဲတွေဟာ ကြီးထွားဖို့လိုတဲ့ ကလေးတွေ စားပေးသင့်တဲ့ အစားအသောက်တစ်မျိုး ဖြစ်ပါတယ်။ ပဲဟာ အင်ဆူလင် Level တက်စေတာကြောင့် လူကို ထွားကြိုင်းသန်မာစေတယ်လို့ ဆိုပါတယ်။ ပဲမှာ သံဓါတ် နဲ့ ဗိုက်တာမင် ဘီအုပ်စု ကြွယ်ဝတာကြောင့် ကိုယ်တွင်းသွေးနီဆဲလ်ဖွံ့ဖြိုးရေးအားပေးသလို သံဓါတ်ချို့တဲ့မှုကြောင့် အရပ်ပုတာမျိုးကိုလည်း ကာကွယ်ပေးပြီး တစ်သျှူးဖွံ့ဖြိုးမှု အားကောင်းစေနိုင်ပါတယ်။
(၂) ကြက်သား
Photo: Unsplash
ကြက်သားမှာ ပရိုတိန်းအပြင် လူ့ကိုယ်ခန္ဓာကြီးထွားဖွံ့ဖြိုးရေးအတွက် မရှိမဖြစ်လိုအပ်တဲ့ အာဟာရဓါတ်တွေ ပေါကြွယ်ဝတာကြောင့် အရပ်ရှည်ချင်သူတွေ စားပေးဖို့ ညွှန်းကြပါတယ်။ ကြက်သားဟာ အရပ်မြင့်ဖို့နဲ့ အရပ်အမြင့်ကို ထိန်းပေးဖို့ အရေးကြီးတဲ့ ဗိုက်တာမင် B12 ဓါတ်လည်း မြင့်ပါတယ်။ ဒီအာဟာရဓါတ်တွေအပြင် နိုင်စင်း ၊ ဆီလီနီယမ် ၊ ဖော့စ်ဖော့ရပ်စ်နဲ့ ဗိုက်တာမင် B6 တို့လည်း ကြွယ်ဝလို့ ကြီးအားယူစ လူငယ်တွေ စားပေးဖို့လည်း တိုက်တွန်းချင်ပါတယ်။
(၃) အယ်လ်မွန်
Photo: Unsplash
အယ်လ်မွန်စေ့တွေဟာ အရိုးတစ်သျှူးတွေ ပြုကွဲမှု ဖြစ်စေတဲ့ Osteoclasts ဆဲလ်ဖွဲ့စည်းမှုကို ဟန့်တားနိုင်စွမ်းရှိပြီး အရိုးကျန်းမာရေးကို အားပေးပါတယ်။ အရပ်ရှည်ဖို့အတွက် လိုအပ်တဲ့ ဗိုက်တာမင်နဲ့ သတ္တုဓါတ်အမျိုးမျိုးလည်း ပါဝင်ပါတယ်။ အယ်လ်မွန်မှာ ဗိုက်တာမင်ဓါတ် ၊ ကျန်းမာတဲ့အဆီ ၊ အမျှင်ဓါတ် ၊ မန်းဂနိစ်နဲ့ မဂ္ဂနီဆီယမ်တို့လည်း ပေါပေါများများပါဝင်တာကြောင့် ကလေးတွေ ဖွံ့ဖြိုးကြီးထွားရေးအတွက် အရေးပါတဲ့ အစားအသောက်လို့ ဆိုချင်ပါတယ်။
(၄) အစိမ်းရင့်ရောင် အသီးအရွက်တွေ
Photo: Unsplash
အစိမ်းရင့်ရောင် အသီးအရွက်တွေကို ကျန်းမာရေးနဲ့ညီတဲ့ အစားအသောက်အဖြစ် ဖော်ပြကြပါတယ်။ အစိမ်းရင့်ရောင် အရွက်တွေ ဖြစ်တဲ့ ဆလတ် ၊ မုန်ညင်း ၊ ဟင်းနုနယ် ၊ ဂေါ်ဖီထုပ်စတဲ့ အသီးအနှံတွေမှာ အာဟာရဓါတ်မျိုးစုံ ပါဝင်ပါတယ်။ အများအားဖြင့် ဗိုက်တာမင်စီ ၊ ကယ်လ်ဆီယမ် ၊ သံဓါတ် ၊ မဂ္ဂနီဆီယမ်နဲ့ ပိုတက်ဆီယမ်တို့ ပါရှိသလို အရပ်ရှည်အောင် အရိုးသိပ်သည်းဆကို ပိုမြှင့်တင်ပေးနိုင်တဲ့ ဗိုက်တာမင်ကေလည်း ပါဝင်ပါတယ်။
(၅) ဒိန်ချဉ်
Photo: Unsplash
ကြီးထွားဖွံ့ဖြိုးချင်သူတွေအတွက် ဒိန်ချဉ်ကလည်း အာဟာရဓါတ်အမယ်စုံပါတဲ့ အစားအသောက်တစ်ခုဖြစ်ပါတယ်။ ပရိုတိန်းလို့ခေါ်တဲ့ အသားဓါတ် မြင့်မားတဲ့ ဒီအစားအစာဟာ ကိုယ်ခံအားစနစ်ကောင်းမွန်စေခြင်း ၊ ရောင်ရမ်းမှု လျော့ကျစေခြင်း နဲ့ အူကျန်းမာရေးအားပေးခြင်း စတဲ့အကျိုးကျေးဇူးတွေလည်း ပေးပါတယ်။ ဒိန်ချဉ်မှာ ပါတဲ့ ကျန်းမာရေးနဲ့ညီတဲ့ ဘက်တီးရီးယားဓါတ် Probiotics က လူကို ထွားကြိုင်းဖွံ့ဖြိုးစေနိုင်ပါတယ်။
အရပ်ရှည်ချင်သူတွေအတွက် နောက်ထပ်ညွှန်းချင်တဲ့ အစားအသောက်တွေကတော့ ကန်စွန်းဥ ၊ Quinoa စေ့ ၊ ကြက်ဥ ၊ ဘယ်ရီသီး ၊ ဆယ်လ်မွန်ငါးနဲ့ နွားနို့တို့ပဲ ဖြစ်ပါတယ်။
Featured Photo: ilchi lee
