အသင့်စား စားစရာတွေ ၊ Fast food တွေဟာ ဈေးသက်သာပြီး အဆင်ပြေလွယ်ကူစွာ စားနိုင်တဲ့အတွက် လူကြိုက်များတာတော့ အမှန်ပါပဲ။ သို့သော် အသင့်စားစားစရာတွေရဲ့နောက်ကွယ်မှာ ကျန်းမာရေးကို ဆိုးရွားစွာထိခိုက်စေနိုင်တဲ့ ဆိုးကျိုးအန္တရာယ်တွေကလည်း ရှိနေပြန်ပါတယ်။ သင်ဟာ အသင့်စားစားစရာတွေ Fast food တွေကို နှစ်ခြိုက်စွာ အလွန်အကျူး စားသုံးနေမိတယ်ဆိုရင်တော့ အခုပြောပြမယ့် ကျန်းမာရေးပြဿနာတွေ သေချာပေါက်ကြုံတွေ့လာရနိုင်ပါတယ်။
(၁) စိတ်ဓာတ်ကျစေတယ်
Photo : Freerange Stock
အသင့်စား အစားအစာတွေဟာ သင့်ရဲ့စိတ်ပိုင်းဆိုင်ရာကျန်းမာရေးအပေါ် သက်ရောက်မှုရှိပါတယ်။ မကြာသေးမီက သုတေသနပြုချက်တစ်ခုအရ အသင့်စား အစားအစာတွေ အလွန်အကျွံစားသုံးသူတွေဟာ စိတ်ကျရောဂါဖြစ်နိုင်ခြေ ၅၁ ရာခိုင်နှုန်းပိုများတယ်လို့ ဖော်ပြထားပါတယ်။ အဆီနဲ့ ကယ်လိုရီမြင့်မားတဲ့ အစားအစာတွေစားသုံးခြင်းဟာ စိတ်ဖိစီးမှုနှင့် ပင်ပန်နွမ်းနယ်ခြင်းတွေကို အလွယ်တကူခံစားရစေပြီး စိတ်ကျန်းမာရေးကို ဆိုးဆိုးရွားရွား ထိခိုက်စေနိုင်ပါတယ်။
(၂) အရေပြားပြဿနာတွေ ဖြစ်စေတယ်
Photo : Ausin
အဆီများတဲ့ ဆီကြော်စားစရာတွေ၊ သကြားပါဝင်မှုများတဲ့ အသင့်စား စားစရာတွေ ၊ အချိုရည်တွေဟာ အသားအရေကိုပျက်စီးစေပြီး ဝက်ခြံကဲ့သို့ အရေပြားဆိုင်ရာ ပြဿနာတွေ ဖြစ်စေနိုင်ပါတယ်။ အဓိကအားဖြင့် သန့်စင်ထားတဲ့သကြား၊ ဂျုံမှုန့်အဖြူနဲ့ ကာဘိုဟိုက်ဒရိတ်တွေဟာ ဟော်မုန်းပြောင်းလဲမှုတွေကို ဖြစ်စေပြီး ဝက်ခြံဖြစ်နိုင်ခြေ ပိုများစေတာပဲ ဖြစ်ပါတယ်။
(၃) ဝမ်းချုပ်စေတယ်
Photo : Verywell Health
ကျန်းမာရေးကောင်းမွန်ဖို့ဆိုတာ ဆီး ၊ ဝမ်း ၊ သွေး ၊ လေ မှန်နေရမယ်လို့ပြောကြတာ ကြားဖူးကြမှာပါ။ အသင့်စား စားစရာတွေ ၊ အမြန်စား စားစရာတွေမှာတော့ အစာခြေစနစ်အတွက်လိုအပ်တဲ့ အမျှင်ဓာတ်ပါဝင်မှုမရှိတဲ့အတွက် အစာကြေချက်မှု လုပ်ငန်းစဉ်ကိုနှောင့်နှေးစေပြီးဝမ်းချုပ်ခြင်းကို ဖြစ်စေနိုင်ပါတယ်။
(၄) အဝလွန်စေတယ်
Photo : Scientific American
အသင့်စား စားစရာတွေမှာ ကယ်လိုရီအလွန်မြင့်မားစွာပါဝင်တာကြောင့် အဝလွန်ခြင်းကိုဖြစ်စေနိုင်ပါတယ်။ ပိုဆိုးတာက အဝလွန်ခြင်းရဲ့နောက်ကွယ်မှာ နှလုံး ၊ သွေးတိုး ၊ ဆီးချို ကဲ့သို့ နာတာရှည်ရောဂါတွေပါ ဖြစ်နိုင်လာပြီး အချိန်ကြာလာတာနဲ့အမျှ မကျန်းမာခြင်းတွေနဲ့ ရောဂါ တိုးလာစေမှာပဲ ဖြစ်ပါတယ်။
(၅) ကင်ဆာဖြစ်စေနိုင်တယ်
Photo : American Oncology Network
အသင့်စား စားစရာတွေနဲ့ ပြုပြင်ထားတဲ့အသားတွေမှာ ကြာရှည်ခံဖို့ ဆိုဒီယမ်နိုက်ထရိတ်နဲ့ ဆိုဒီယမ်နိုက်ထရိုက်တွေကို အသုံးပြုရပါတယ်။ ၎င်းဓာတုပစ္စည်းတွေဟာ ကင်ဆာဖြစ်စေနိုင်တဲ့ အဓိကအကြောင်းအရင်းတွေဖြစ်ပါတယ်။ ပြုပြင်ထားတဲ့အသားတွေအလွန်အကျွံစားသုံးပါက ရင်သားကင်ဆာ ဆီးကျိတ်ကင်ဆာနဲ့ အူမကြီးကင်ဆာတွေဖြစ်နိုင်တယ်လို့ အာဟာရနှင့် ကင်ဆာဆိုင်ရာ သုတေသီတွေက ဆိုထားပါတယ်။
Featured Photo : Men’s Health
