အလုပ် တစ်ခုလုပ်ဆောင်တဲ့အခါ စမတ်ကျကျ လုပ်ဆောင်မယ်ဆိုရင် ၅ နာရီလောက်ကြာတဲ့အလုပ်သည် ၂ နာရီအတွင်း ပြီးမြောက်နိုင်ပါတယ်။ ဒါသည် အလုပ် ကြိုးစားခြင်းနှင့် စမတ်ကျကျ လုပ်ဆောင်တတ်ခြင်းတို့ကြား ကွာခြားချက်ပဲဖြစ်ပါတယ်။

တကယ်တမ်းကျတော့ အလုပ် ကို အချိန်အကြာကြီး ကြိုးစားလုပ်ဆောင်နေခြင်းထက် စမတ်ကျကျ လုပ်ဆောင်တတ်ခြင်းက ယနေ့ခေတ်လိုအချိန်မှာ အင်မတန်ပဲအရေးကြီးပါတယ်။ အရေးမပါတဲ့အရာတွေအတွက် အချိန်အကြာကြီး ကြိုးကြိုးစားစားနဲ့ အပတ်တကုတ် လုပ်ဆောင်နေစရာမလိုပါဘူး။ သင့်ဘဝမှာ အခြားသောအရေးကြီးတဲ့လုပ်ဆောင်စရာများလည်း ရှိတယ်မဟုတ်လား။

ကိုယ့်ကိုယ်ကိုယ် အချိန်ပေးရမယ်၊ မိသားစု၊ ချစ်သူခင်သူများအတွက် အချိန်ပေးရမယ်၊ ကိုယ့် တိုးတက်ရာ တိုးတက်ကြောင်းအတွက် အချိန်ပေးရမယ်၊ စိတ်ပင်ပန်း နွမ်းနယ်မှုများကို ပြေပျောက်ဖို့ရန်အတွက် အချိန်ပေးရမယ်။ ဒီလိုမျိုးလုပ်ဆောင်တတ်ဖို့ဆိုရင် အလုပ် လုပ်တဲ့အခါ စမတ်ကျကျ လုပ်ဆောင်နိုင်မှပဲ တော်ရာကျပါလိမ့်မယ်။ အချိန်အပုတ်ခံပြီး အလုပ် များကို အပတ်တကုတ် ကြိုးစားခြင်း ခေတ်က အနောက်မှာ ကျန်ခဲ့ပါပြီ၊ စမတ်ကျကျ လုပ်ဆောင်ခြင်းကသာလျှင် တဖြည်းဖြည်း ကြီးစိုးလာတာဖြစ်ပါတယ်။

သင့်အနေနဲ့ ကိုယ့်ရဲ့အလုပ်တာဝန်များကို စမတ်ကျကျ လုပ်ဆောင်တတ်ဖို့ ဘယ်အချက်များကို လိုက်နာသင့်သလဲဆိုတာ သိပါသလား။

အလုပ်အများကြီးကို တစ်ချိန်တည်းမှာပဲ ပြိုင်တူလုပ်ဆောင်ခြင်းကို ရှောင်ကြဉ်ပါ

အလုပ်တွေများလွန်းလို့ တစ်ချိန်တည်းမှာပဲ Multitasking လုပ်ပစ်လိုက်မယ်ဆိုပြီး မတွေးလိုက်ပါနဲ့။ အလုပ်များကို တစ်ပြိုင်နက်တည်းမှာပဲ ပြိုင်တူလုပ်ဆောင်ခြင်းသည် သင့်ရဲ့ ဦးနှောက်ကို အလုပ် အလွန်အကျွံ ခိုင်းနေတာဖြစ်ပြီး သင်သည်လည်း အများကြီး အာရုံစိုက်နေရတာဖြစ်ပါတယ်။ သင်သည် ထိုကဲ့သို့ Multitasking များများ လုပ်လေ၊ သင့်ရဲ့ စိတ်ကျန်းမာရေးကို ထိခိုက်လေပါပဲ။

စစချင်းမှာတော့ သင် လုပ်နိုင်တယ်လို့ ထင်နေပါလိမ့်မယ်။ အလုပ်တွေ အများကြီးလည်း တစ်ပြိုင်နက်တည်းမှာ ပြီးဆုံးသွားတဲ့အတွက်ကြောင့်လည်း ပျော်ရွှင်သလို ခံစားရပါလိမ့်မယ်။ ဒါပေမဲ့ သင့်ရဲ့ မသိစိတ်ထဲမှာတော့ စိတ်ဖိစီးမှုများသည် တဖြည်းဖြည်း ကြီးစိုးလာနေတာဖြစ်ပြီး ကြာလာတဲ့အခါ စိတ်ပင်ပန်း လူပင်ပန်း ဖြစ်လာပါလိမ့်မယ်။

ဒါဆိုရင် အလုပ်တာဝန်အများကြီးကို အချိန်တိုအတွင်းမှာ ဘယ်လိုပြီးမြောက်အောင် ဆောင်ရွက်ရမလဲ။

မကြာ မကြာ အနားယူပါ

ကိုယ့်ကိုယ်ကို Break Time များများပေးခြင်းသည် စမတ်ကျကျ လုပ်ဆောင်တတ်ခြင်းရဲ့ အဓိကသော့ချက်ပဲဖြစ်ပါတယ်။ အလုပ်လုပ်တဲ့အခါ အနားမယူဘူးဆိုရင် သင့်ရဲ့ ဦးနှောက်သည် ပင်ပန်းလာမှာဖြစ်ပြီး အချိန်ကြာလသည်နှင့်အမျှ ဘာကိုမှ လုပ်ချင်ကိုင်ချင်စိတ်ရှိတော့မှာမဟုတ်ပါဘူး။ ဒါ့ကြောင့် အလုပ်လုပ်တဲ့အချိန်မှာ အလုပ်တာဝန်တစ်ခုတည်းကိုပဲ မိနစ်အနည်းငယ်ခန့် ပြီးမြောက်ရမယ်ဆိုတဲ့ စိတ်ဖြင့် အလုပ်လုပ်ပါ။ ထိုအလုပ်တစ်ခု ပြီးမြောက်သွားတဲ့အခါ ခဏတဖြုတ် အနားယူလိုက်ပါ။

အခက်ခဲဆုံးအလုပ်များကို အရှေ့ဆုံးရက်တွေမှာ ကြိုလုပ်ထားပါ

စနေ၊ တနင်္ဂနွေမှာ အလုပ်နားရပြီး တနင်္လာနေ့မှာ အလုပ်ပြန်တက်ရတယ်ဆိုပါစို့။ ဒါဆိုရင် သင့်အတွက် တနင်္လာနေ့သည် စွမ်းအင်အများဆုံးရှိနေတဲ့ ရက်တစ်ရက်ဖြစ်ပါတယ်။ ဒါ့ကြောင့် ရက်သတ္တပတ်ရဲ့ အရှေ့ဆုံးရက်တွေမှာ အခက်ခဲဆုံး အလုပ်များကို အရင်ဆုံးလုပ်ထားရပါမယ်။

နေ့တစ်နေ့ကို အစပြုတဲ့အခါမှာလည်း ထိုနည်းအတိုင်းပါပဲ။ အခက်ခဲဆုံး (သို့) အရေးအကြီးဆုံးအလုပ်ကို အရင်ဆုံးစတင်လုပ်ဆောင်ပါ။ ထို့နောက်မှာတော့ အသေးအဖွဲအလုပ်များကို ကျန်တဲ့ရက်တွေ၊ အချိန်တွေမှာ ဆက်လက်လုပ်ဆောင်နိုင်ပါတယ်။

သင့်ရဲ့ စွမ်းအင်ပေါ် မူတည်ပြီး အလုပ်တာဝန်များကို ခွဲခြားပါ

နေ့တစ်နေ့ရဲ့ ဘယ်အချိန်က သင့်အတွက် စွမ်းအင်အပြည့်ဆုံးအချိန်ဖြစ်မလဲ။ တကယ်လို့ သင်သည် နေ့လည်စာ မစားခင်မှာ အလုပ်အများဆုံး လုပ်နိုင်တယ်လို့ ယူဆတယ်ဆိုရင် နေ့လည်စာ မစားခင်မှာ အရေးကြီးတဲ့ အလုပ်များကို အပြီးဖြတ်ထားလိုက်ပါ။ ထို့နောက်မှာတော့ အလုပ်လုပ်ချင်စိတ် သိပ်မရှိတဲ့အချိန်မှာတော့ အခြားသော အလုပ်များ လုပ်ထားဖို့ ချန်ထားနိုင်ပါတယ်။ သင့်ရဲ့ ခန္ဓာကိုယ်စွမ်းအင်ပေါ် မူတည်ပြီး လုပ်ဆောင်ခြင်းသည်လည်း အဓိကကျပါသေးတယ်။

Notifications များ ပိတ်ထားပါ

အီးမေးလ်များ၊ ဆိုရှယ်မီဒီယာရှိ စာအဝင်အထွက်များကို ပြသတဲ့ Notification ကို ပိတ်ထားလိုက်ပါ။ အီးမေးလ် ဖွင့်ထားတဲ့ ကွန်ပျူတာ Tab ကို ခဏလောက် Minimize လုပ်ထားပြီး နောက် Window Tab အသစ်ဖွင့်ကာ အလုပ်ကိုသာ အာရုံစူးစိုက်ကာ လုပ်ဆောင်ပါ။ အရေးကြီးတဲ့အလုပ် လုပ်ဆောင်လို့ ပြီးသွားပြီဆိုတော့မှ အီးမေးလ်များနှင့် ဆိုရှယ်မီဒီယာ စာအဝင်အထွက်များကို စစ်ဆေးနိုင်ပါတယ်။

၂၅ – ၅ စည်းမျဉ်းကို အသုံးပြုပါ

၂၅ နှင့် ၅ ဆိုတာကတော့ မိနစ်တွေကို ပြောတာဖြစ်ပါတယ်။ စောစောကလည်း ပြောပြီးပြီးဖြစ်ပါတယ်။ အလုပ် လုပ်လိုက် မကြာ မကြာ အနားယူလိုက် ပြုလုပ်ခြင်းသည် စမတ်ကျကျ လုပ်ဆောင်တတ်ခြင်းရဲ့ အဓိကအဖြေဖြစ်ပါတယ်။ ဒါ့အပြင် သင့်ရဲ့ စွမ်းဆောင်ရည်ကိုလည်း တိုးမြှင့်စေပြီး အလုပ်များများ ပြီးမြောက်အောင် ကူညီပေးပါတယ်။

သူက ဘယ်လို အလုပ်လုပ်ရတာလဲဆိုရင် ၂၅ မိနစ်ကို Timer ပေးထားလိုက်ပါ။ ထို ၂၅ မိနစ်အတွင်း အလုပ်တာဝန်တစ်ခုကို ပြီးမြောက်အောင် လုပ်ဆောင်လိုက်ပါ။ ၂၅ မိနစ်အတွင်း အလုပ်ပြီးသွားတဲ့အခါ နောက်ထပ် ၅ မိနစ်ခန့် အနားယူလိုက်ပါ။ ၅ မိနစ်ပြည့်တဲ့အခါ နောက်ထပ် ၂၅ မိနစ်ခန့် အလုပ်ပြန်လုပ်ပါ။ ဒီလိုမျိုး အလုပ်လုပ်ခြင်းအားဖြင့် သင့်ရဲ့ Productivity ကို မြင့်တက်လာအောင် လုပ်ဆောင်နိုင်ပါတယ်။

အလုပ်ကြီးပဲ အာရုံစူးစိုက်ပြီး လုပ်ဆောင်ရတဲ့အခါ ပျင်းရိဖို့ကောင်းပြီး စိတ်ဖိစီးမှုလည်း များပါတယ်။ ဒါဆိုရင် ပျော်ပျော်ပါးပါးနဲ့ စိတ်ပြေလက်ပျောက်ဖြစ်သွားအောင် ဘယ်လို အလုပ်လုပ်ဆောင်ရမလဲ။

ကိုယ် အကြိုက်ဆုံး သီချင်းများ နားထောင်ရင်း အလုပ်လုပ်ပါ

ဦးနှောက် အရမ်းကြီး သုံးစရာမလိုတဲ့ အလုပ်မျိုး၊ အရေး သိပ်မကြီးတဲ့အလုပ်တွေ ပြုလုပ်တဲ့အခါ သီချင်း နားထောင်ရင်း ပြုလုပ်နိုင်ပါတယ်။ ဒီလိုသီချင်းနားထောင်ရင်း အလုပ်လုပ်ခြင်းသည် သင့်ရဲ့ စိတ်ဖိစီးမှုတွေကို လျော့ချပေးနိုင်တယ်လို့လည်း သိရှိရပါတယ်။

သေချာအာရုံစူးစိုက်ပြီး လုပ်ဆောင်ရမယ့် အရေးကြီးတဲ့ အလုပ်ကိစ္စတွေအတွက်ဆိုရင်တော့ သီချင်း နားမထောင်သင့်ပါဘူး။

ကွီးတို့အားလုံးလည်း အလုပ် ကြိုးစားခြင်းထက် စမတ်ကျကျ လုပ်ဆောင်တတ်ကာ ကိုယ့်ရဲ့ ကိုယ်ပိုင်ဘဝနဲ့ လုပ်ငန်းခွင်ဘဝကို မျှခြေကျအောင် လုပ်ယူနိုင်ပါတယ်။

Source: Zapier

Featured Image: Pexel