No Protein, No Life! ဆိုတဲ့ စကားအတိုင်းပါပဲ ကျွန်တော်တို့ရဲ့ ခန္ဓာကိုယ်တွင်း အစိတ်အပိုင်းအင်ဂျင်တွေ လည်ပတ်ဖို့နဲ့ ကြွက်သားတည်ဆောက်ဖို့အတွက် ပရိုတင်းဓာတ်က မရှိမဖြစ် အရေးပါတဲ့ အာဟာရဓာတ်တစ်မျိုး ဖြစ်ပါတယ်။ အရိုးရှင်းဆုံး ပြောရမယ်ဆိုရင် ပရိုတင်းဟာ ကြွက်သားထု တည်ဆောက်ရာမှာ အဓိကလိုအပ်တဲ့ Macronutrient ဖြစ်ပါတယ်။ Chemically အရဆိုရင် ပရိုတင်းဓာတ်ဟာ အမိုင်နိုအက်ဆစ်တွေနဲ့ ဖွဲ့စည်းထားတာပါ။ ပရိုတင်းဓာတ်ဟာ ကြွက်သားထုအတွက် လောင်စာတစ်မျိုး ဖြစ်သလို ဇီဝဖြစ်စဉ်ကို တိုးတက်ကောင်းမွန်စေပြီး ကိုယ်ခံစွမ်းအားကိုလည်း မြှင့်တင်ပေးပါတယ်။ ဒါကြောင့်လည်း ပရိုတင်းဓာတ်ဟာ ကျွန်တော်တို့ သက်ရှိလူသားတွေအတွက် အရေးကြီးဆုံး လိုအပ်ချက်တစ်ခု ဖြစ်ပါတယ်။ ပရိုတင်းဓာတ်ကို များသောအားဖြင့် အသားငါးက ရတယ်လို့ သိထားကြပါတယ်။ တကယ်တော့ ပရိုတင်းဓာတ်ရနိုင်တဲ့ တခြားသော အစားအစာတွေ အများကြီးရှိပါသေးတယ်။ ဈေးသိပ်မကြီးပဲ ပရိုတင်းဓာတ် လုံလုံလောက်လောက် ထောက်ပံ့ပေးနိုင်မယ့် အစားအစာ တွေကို အောက်မှာဆက်လေ့လာ ကြည့်ရအောင်ပါ။
(၁) ကြက်ဥအကာ
Photo : Pete and Gerry’s Organic Eggs
ကြက်ဥဟာ ဈေးသက်သာပြီး လူတိုင်းလက်လှမ်းမှီတဲ့ ပရိုတင်းဓာတ် အရင်းအမြစ်တစ်ခုပါ။ အထူးသဖြင့် ကြက်ဥအကာဟာ ကိုလက်စထရောနည်းပြီး ပရိုတင်းဓာတ်အမြင့်ဆုံး ပါဝင်ပါတယ်။ အဆီဓာတ် ပါဝင်မှုနည်းတဲ့အတွက် ကျန်းမာရေးနဲ့ အလွန်ညီညွတ်ပြီး အာဟာရပြည့်ဝတဲ့ နံနက်ခင်း အစားအစာ တစ်ခု ဖြစ်ပါတယ်။ ကြက်ဥအကာ ပုံမှန်အရွယ်အစားတစ်လုံးမှာ ပရိုတင်း ၃.၆ ဂရမ်နဲ့ ၁၆ ကယ်လိုရီ ပါဝင်ပြီး ဒါဟာ လူတစ်ယောက်ရဲ့ နေ့စဉ်ပရိုတင်း လိုအပ်ချက် ၇ ရာခိုင်နှုန်းကို ဖြည့်တင်းပြီးသား ဖြစ်စေပါတယ်။ အာဟာရဆိုင်ရာကျွမ်းကျင်သူတွေကတော့ အရွယ်ရောက်ပြီးသား လူတိုင်း တစ်နေ့ကို ကြက်ဥတစ်လုံးစားဖို့ အကြံပြုထားပါတယ်။
(၂) တို့ဟူး
Photo : Live Eat Learn
တို့ဟူး (ပဲပြား) မှာ ပရိုတင်းဓာတ် အများအပြားပါဝင်တဲ့အပြင် မဂ္ဂနီဆီယမ် ၊ သံဓာတ်နဲ့ အခြားခန္ဓာကိုယ်အတွက် လိုအပ်တဲ့ အာဟာရဓာတ်များစွာ ကြွယ်ဝစွာပါရှိပါတယ်။ ပဲပိစပ်နဲ့ပြုလုပ်ထားတဲ့ အစားအစာတွေနည်းတူ တို့ဟူးဟာ မကောင်းတဲ့ ကိုလက်စထရောကို လျှော့ချပေးပြီး ကောင်းတဲ့ ကိုလက်စထရောကို မြှင့်တင်ပေးခြင်းဖြင့် နှလုံးနဲ့ဆိုင်တဲ့ ရောဂါများ ဖြစ်ပွားနိုင်ခြေကို လျှော့ချပေးပါတယ်။ တိုဟူးတစ်တုံးမှာ ပရိုတင်းဓာတ် ၁၂.၈ ဂရမ်နဲ့ ၁၁ ကယ်လိုရီ ပါဝင်ပါပြီး နေ့စဉ်ပရိုတင်းလိုအပ်ချက်ရဲ့ ၂၆ ရာခိုင်နှုန်းနဲ့ ကိုက်ညီပါတယ်။
(၃) ဂရိဒိန်ချဉ်
Photo : Medical News Today
ပရိုတင်းဓာတ် အကြောင်းပြောတဲ့အခါ မပါမဖြစ်တဲ့ အစားအစာ ကတော့ ဂရိဒိန်ချဉ်ပါပဲ။ ပရိုတင်းအပြင် ကယ်လ်စီယမ်နဲ့ ဗီတာမင် B12 တို့လည်း ဂရိဒိန်ချဉ်မှာ ပေါပေါများများ ပါဝင်ပါတယ်။ ကယ်လ်စီယမ်ဟာ အရိုးအဆစ်တွေအတွက် အလွန်ကောင်းပြီး ဗီတာမင် B12 ကတော့ သွေးနီဥဆဲလ်တွေ ထုတ်လုပ်ခြင်းနဲ့ ဦးနှောက်ရဲ့ လုပ်ဆောင်ချက်ကို ကောင်းမွန်စေဖို့အတွက် ထောက်ပံ့ပေးပါတယ်။ လေ့လာမှုတွေအရ ဂရိဒိန်ချဉ်ဟာ အူလမ်းကြောင်းကျန်းမာရေးကိုလည်း အထောက်အကူဖြစ်စေပြီး ဂရိဒိန်ချဉ် ၁ ခွက်မှာ ပရိုတင်း ၁၁ ဂရမ်နဲ့ ၁၃၀ ကယ်လိုရီ ပါဝင်ပါတယ်။
(၄) ချီယာစေ့
Photo : eMediHealth
ချီယာစေ့ကတော့ ကျန်းမာရေး လိုက်စားသူတွေ ၊ ဝိတ်ချနေသူတွေနဲ့ ရင်းနှီးပြီးသား ဖြစ်တဲ့ အစားအစာ တစ်ခုပါ။ ချီယာစေ့ဟာ အမျှင်ဓာတ်နဲ့ အိုမီဂါ-၃ ဓာတ်တွေ ကြွယ်ဝပြီး ခန္ဓာကိုယ်စွမ်းအင်ကို မြှင့်တင်ပေးပါတယ်။ ၎င်းတို့မှာ အာဟာရတန်ဖိုး မြင့်မားစွာပါဝင်ပြီး ကယ်လိုရီပါဝင်မှု အတော်လေး နည်းတဲ့အတွက် ကျန်းမာရေးနဲ့ အထူးသင့်လျော်ပါတယ်။ အခြားသော လေ့လာမှုတွေအရ ချီယာစေ့ဟာ နှလုံးရောဂါနဲ့ အမျိုးအစား ၂ ဆီးချိုရောဂါ ဖြစ်နိုင်ခြေကို လျှော့ချပေးတယ်လို့လည်း ဖော်ပြထားပါတယ်။ လတ်ဆတ်တဲ့ သဘာဝသစ်သီးဖျော်ရည်တွေ ၊ Smoothie တွေနဲ့ တွဲဖက်သောက်သုံးနိုင်သလို ဈေးနှုန်းအားဖြင့်လည်း ၁၅၀ ဂရမ်ခန့်ကို မြန်မာငွေ ၅၀၀၀ ကျပ်ဝန်းကျင်နဲ့ စူပါမားကတ်တွေမှာ လွယ်လွယ်ကူကူ ဝယ်ယူလို့ ရပါတယ်။ ချီယာစေ့ ၃၀ ဂရမ်မှာ ပရိုတင်း ၄.၄ ဂရမ်နဲ့ ၁၃၇ ကယ်လိုရီ ပါဝင်ပါတယ်။
(၅) ပဲနီ
Photo : HealthifyMe
ဈေးသက်သာပြီး ဈေးထဲမှာ လွယ်လွယ်ကူကူ ဝယ်လို့ရတဲ့ ပရိုတင်းဓာတ် ပြည့်ဝတဲ့ အစားအစာ တစ်ခုကတော့ ပဲတွေပါပဲ။ အထူးသဖြင့် ပဲနီလေးမှာ ဗီတာမင် B1 ဓာတ် ကြွယ်ဝစွာပါဝင်ပြီး ၎င်းက မှတ်ဉာဏ်စွမ်းအားကို ကောင်းမွန်စေပါတယ်။ နောက်ထပ် ပဲနီလေးမှာပါဝင်တဲ့ ဗီတာမင်ဓာတ်တွေဟာ အယ်လ်ဇိုင်းမားလို ရောဂါတွေအထိ ကာကွယ်ပေးနိုင်ပြီး ခန္ဓာကိုယ်တွင်း အဆိပ်အတောက်တွေကို ဖယ်ရှားပေးနိုင်တဲ့ Molybdenum လည်း ပါဝင်ပါတယ်။ ပဲနီလေးအပါအဝင် ပဲနက်နဲ့အခြားသော ပဲအမျိုးမျိုးမှာ စားပွဲတင်ဇွန်း ၁ ဇွန်း လျှင် ပရိုတင်းဓာတ် ၁ ဂရမ်ကနေ ၄ ဂရမ်အထိ ပါဝင်ပြီး ၁၄ ကယ်လိုရီ ပါဝင်ပါတယ်။
Featured Photo : Wellness52
