ဝမ်းချုပ်တာဟာ လူတော်တော်များများ ဖြစ်လေ့ဖြစ်ထ ရှိတဲ့ ကျန်းမာရေး ပြဿနာတစ်ခုပါပဲ။ ဝမ်းချုပ်တာ က သာယာတဲ့ အတွေ့အကြုံ တော့မဟုတ်ပါဘူး။ လူတစ်ယောက်ဟာ တစ်ပတ်ကို သုံးကြိမ်ထက်နည်းပြီး ဝမ်းသွားတယ်ဆိုရင် ဝမ်းချုပ်တယ်လို့ သတ်မှတ်နိုင်ပါတယ်။ တစ်ခါတစ်လေ အကြောင်းတစ်ခုခုကြောင့် ဝမ်းချုပ်တာ ပြဿနာမရှိပေမဲ့ နဂိုကတည်းက ဝမ်းချုပ်တတ်တဲ့သူ ဒါမှမဟုတ် ဝမ်းချုပ်တာ ရေရှည်ဖြစ်လာတယ် ၊ မကြာခဏ ဝမ်းချုပ်တယ်ဆိုရင် အချိန်ကြာလာတာနဲ့ အမျှ အလွန်ကို ဆိုးဝါးတဲ့ ကျန်းမာရေး ပြဿနာတွေ ဖြစ်လာနိုင်ပါတယ်။ ဒါ့အပြင် ဝမ်းမမှန်ခြင်းကြောင့် ကိုယ်လက် မအီမသာဖြစ်ပြီး နာကျင် ကိုက်ခဲမှုကို ခံစားရနိုင်ပါတယ်။ ဒါကြောင့် ဝမ်းတစ်လုံးကောင်း ခေါင်းမခဲ ဆိုတဲ့ ဆိုရိုးစကားအတိုင်း လူတစ်ယောက်ဟာ ဝမ်းပုံမှန်သွားမှသာ ကျန်းမာပြီး ပေါ့ပေါးသွက်လက်မှာ ဖြစ်ပါတယ်။

ဒီဆောင်းပါးလေးမှာတော့ ကွီးတို့ကို ဝမ်းတစ်လုံးကောင်း ခေါင်းမခဲ စေရဖို့ ဝမ်းမှန်စေမဲ့ တစ်နည်းအားဖြင့် ဝမ်းချုပ်ခြင်းကို သက်သာစေမဲ့ နည်းလမ်းကောင်းတွေကို ဝေမျှသွားမှာ ဖြစ်ပါတယ်။

အမျှင်ဓာတ်များသော အစားအစာကို စားပါ

Photo : The Pacer Blog

အမျှင်ဓာတ်ကြွယ်ဝပြီး သစ်သီးများ ၊ ဟင်းသီးဟင်းရွက်များ ၊ ပဲစင်းငုံနှင့် အစေ့အဆန်များကို စားသောက်ခြင်းက အစာခြေစနစ် ကျန်းမာရေးကို တိုးတက်ကောင်းမွန်စေရန် အကောင်းဆုံး နည်းလမ်းတစ်ခု ဖြစ်ပါတယ်။ ပုံမှန်အစာခြေခြင်း လုပ်ငန်းစဉ်ကို ချောမွေ့စွာလည်ပတ်စေပြီး ဝမ်းချုပ်ခြင်းမှ ကာကွယ်ပေးကာ ကျန်းမာသော ကိုယ်အလေးချိန်ကိုလည်း ထိန်းသိမ်းပြီးသား ဖြစ်စေပါတယ်။ နောက်တစ်ခု သတိထားရမှာကတော့ အဆီများသော အစားအစာများကို လျှော့စားဖို့ပါပဲ။ အဆီများသော အစားအစာများက အစာခြေဖျက်မှု ဖြစ်စဉ်ကို နှေးကွေးစေပြီး ဝမ်းချုပ်စေနိုင်ပါတယ်။

ရေများများသောက်ပါ

Photo : VOI

ရေကို လုံလောက်စွာ သောက်ခြင်းက အစာအိမ်နဲ့ အူလမ်းကြောင်း လုပ်ငန်းကို မှန်ကန်ညီညွတ်အောင် ဖန်တီးပေးပါတယ်။ တစ်နေ့ကို ၈ အောင်စ မျက်မှန် ၈ ခွက်သောက်တာကနေ စတင်ပါ။ ရေဓာတ်ပြည့်ဝနေဖို့က အစာခြေကျန်းမာရေးအတွက် မရှိမဖြစ် လိုအပ်ပါတယ်။ အကြောင်းကတော့ အမျှင်ဓာတ်က အူမကြီးထဲသို့ ရေကို ဆွဲငင်ကာ ပိုပို၍ ပျော့ပျောင်းသော ဝမ်းများကို ဖန်တီးနိုင်ကာ ၎င်းတို့ကို ပိုမိုလွယ်ကူစွာ ဖြတ်သန်းနိုင်စေသောကြောင့် ဖြစ်ပါတယ်။

လေ့ကျင့်ခန်းလုပ်ပါ

Photo : Runtastic

ကိုယ်လက်လှုပ်ရှားမှုက အူမကြီးကို လှုပ်ရှားစေပြီး ဝမ်းမှန်စေပါတယ်။ လေ့ကျင့်ခန်းလုပ်ခြင်းက ဝမ်းချုပ်ခြင်းကို သက်သာစေပါတယ်။ အစာစားပြီးနောက် (၁၀) မိနစ် သို့မဟုတ် (၁၅) မိနစ်ခန့် လမ်းလျှောက်ခြင်းက အူမကြီးလည်း လှုပ်ရှားမှု ဖြစ်စေပြီး ကျန်းမာသော ပုံမှန်တုံ့ပြန်မှု တစ်ခုဖြစ်စေပါတယ်။ ဒါ့အပြင် ဝမ်းချုပ်ခြင်းကို ကာကွယ်ဖိုနဲ့ ဝမ်းချုပ်လာပြီဆိုရင် လုပ်သင့်တဲ့ အရိုးရှင်းဆုံး လေ့ကျင့်ခန်းတွေကတော့ ပြေးတာ ၊ ရေကူးတာ ၊ စက်ဘီးစီးတာ ၊ ကခုန်တာစတဲ့ Cardio လေ့ကျင့်ခန်းတွေပဲ ဖြစ်ပါတယ်။ ထို ကိုယ်လက်လှုပ်ရှားမှုတွေက ကွီးတို့ရဲ့ အသက်ရှုနှုန်းကို တိုးစေပြီး နှလုံးခုန်နှုန်းကို မြှင့်တင်ပေးကာ ဝမ်းကို လှုံဆော်ပေးပါလိမ့်မယ်။ Cardio လေ့ကျင့်ခန်းကို အပြည့်အ၀ မလုပ်နိုင်ရင်တောင် မိနစ် ၃၀ လမ်းလျှောက်ရုံနဲ့ အစာခြေစနစ်အတွက် အထူးကောင်းမွန်ပါတယ်။

ယောဂ

Photo : Medical News Today

ယောဂ လေ့ကျင့်ခန်းများကလည်း ဝမ်းချုပ်ခြင်းကို သက်သာစေပါတယ်။ ယောဂကျင့်ခြင်းက ကြွက်သားများကို ပျော့ပြောင်းစေရန်သာမက အချို့သော ယောဂပို့စ်တွေက အစာခြေလမ်းကြောင်းကို နှိပ်နယ်ပေးသလိုဖြစ်ကာ အူလမ်းကြောင်းတစ်လျှောက် မစင်များကို ရွှေ့လျားစေပြီး ဝမ်းချုပ်ခြင်းကို သက်သာစေပါတယ်။ ဝမ်းချုပ်ခြင်းကို သက်သာစေပြီး လွယ်ကူတဲ့ ယောဂပို့စ် တွေကတော့

(၁) Wind Relieving Pose

(၂) Garland Pose နဲ့

(၃) Cobra Pose တို့ပဲ ဖြစ်ပါတယ်။

စိတ်ဖိစီးမှုကို လျှော့ချပါ

Photo : Men’s Journal

စိတ်ဖိစီးမှုများလွန်းရင် အစာအိမ်ကျန်းမာရေးကို ထိခိုက်နိုင်ပါတယ်။ ယောဂကျင့်ခြင်း ၊ တရားထိုင်ခြင်း ၊ ခရီးထွက်ခြင်းနဲ့ အခြားစိတ်ဝင်စားစရာ အလုပ်များ လုပ်ခြင်းဖြင့် စိတ်ဖိစီးမှုနှင့် စိုးရိမ်ပူပန်မှုများကို လျှော့ချပါ။

ကွီးတို့ရေ အထက်ကအကြံပြုချက်တွေကို လိုက်နာကျင့်သုံးနေမယ်ဆိုရင် ကျန်းမာရေးအတွက် များစွာ အထောက်အကူပြုပါတယ်။ ကွီးတို့အနေနဲ့ နေ့စဉ်လူနေမှုဘဝမှာ သက်တောင့်သက်သာရှိဖို့နဲ့ ကျန်းမာသွက်လက် ပေါ့ပါးစေဖို့ ဝမ်းမချုပ်ဖို့ လိုအပ်ပါတယ်။ သာမန်အခြေအနေကနေ ခရီးသွားရတာ ၊ အစားအသောက်ပြောင်းတာ ၊ စိတ်ပင်ပန်းတာ ၊ အချို့သော ရောဂါတွေကြောင့် ဝမ်းချုပ်တတ်ပါတယ်။ ဒီလို ဝမ်းချုပ်တဲ့အခါ ဝမ်းနှုတ်ဆေးများ အလွန်အကျွံသုံးစွဲတာမျိုး မလုပ်ပဲ အပေါ်က နည်းလမ်းလေးတွေကို လိုက်နာကျင့်သုံးကြည့်ပါ။ တကယ်ကို ထိရောက်မှုရှိတာ လက်တွေ့ခံစားရမှာပါ။

ကွီးတို့ရေ ဝမ်းတစ်လုံးကောင်း ခေါင်းမခဲ စေရဖို့ ဒါလေးတွေကိုဆောင်ခြင်းဖြင့် ကျန်းမာခြင်း သုခတွေနဲ့ ပြည့်စုံနိုင်ကြပါစေ။

Source : Nebraska Medicine

Featured Photo : Health