ဗိုက်ပူပူ ခါးတုတ်တုတ် ဖိုးဝရုပ် လို ခန္ဓာကိုယ်ကို ပိုင်ဆိုင်ထားလို့ စိတ်ပျက်နေပြီလား။ ဝမ်းဗိုက်မှာ စုနေတဲ့ အဆီတွေဟာ ကျွန်တော်တို့ခန္ဓာကိုယ်ရဲ့ အလုံးစုံကျန်းမာရေးကို အများကြီး ခြိမ်းခြောက်နိုင်ပါတယ်။ နှလုံးနဲ့ ဆီးချိုတို့လို ရောဂါအခြေအနေတွေနဲ့လည်း ဆက်စပ်နေပြီး ကျားမမရွေး ၊ အသက်အရွယ်မရွေး လူတိုင်းအတွက် အန္တရာယ်ရှိပါတယ်။ ဝမ်းဗိုက်အဆီတွေကို လျော့ချဖို့ဆိုရင် တစ်နေ့တာအတွင်းမှာ လှုပ်လှုပ်ရှားရှား နေပေးဖို့ လိုအပ်ပြီး ကျန်းမာရေးနဲ့ ညီညွတ်တဲ့ အသီးအနှံ ၊ အစိမ်းရောင်အရွက် ၊ ပဲနဲ့ ငါးတို့လို အစားအစာတွေကိုလည်း စားပေးဖို့လိုပါတယ်။ ဒီတစ်ခေါက်မှာတော့ ဗိုက်ခေါက်ထူထူ အဆီများနေသူတွေ စားပေးသင့်တဲ့ ကျန်းမာရေးနဲ့ အညီအညွတ်ဆုံး အစားအစာတွေကို မျှဝေပေးပါမယ်။
(၁) အသီးအနှံများ
Photo : CrossFit City Line
အသီးအနှံတွေမှာ ဗီတာမင် ၊ သတ္တုဓာတ် ၊ အမျှင်ဓာတ်နဲ့ ဓာတ်တိုးဆန့်ကျင်ပစ္စည်းတွေ ကြွယ်ဝစွာ ပါဝင်ပါတယ်။ အမျှင်ဓာတ်က အစာချေဖျက်မှုနှုန်းကို ပိုမိုကောင်းမွန်စေပြီး အူလမ်းကြောင်းအတွင်းရှိ အကျိုးပြု ဘက်တီးရီးယားတွေကို တိုးပွားစေကာ ဇီဝကမ္မဖြစ်စဉ်ကို ကောင်းမွန်စေတဲ့အပြင် သွေးပေါင်ချိန်ကိုလည်း လျှော့ချပေးနိုင်ပါတယ်။ လိမ္မော်သီး ၊ ဆန်းကစ်သီး ၊ ကီဝီသီး ၊ လတ်ဆတ်တဲ့ သံပုရာသီး ကဲ့သို့ Citrus Fruits တွေမှာ ဓာတ်တိုးဆန့်ကျင်ပစ္စည်းတွေ များစွာပါဝင်ပြီး ပိုးမွှားတွေကိုစေနိုင်တဲ့ ဂုဏ်သတ္တိအချို့ ပါဝင်ပါတယ်။ အဆီလောင်ကျွမ်းစေတဲ့ အခြားအသီးအနှံတွေကတော့ ပန်းသီး ၊ ဖရဲသီး ၊ စပျစ်သီး ၊ စတော်ဘယ်ရီသီးတွေပဲ ဖြစ်ပါတယ်။ အသီးအနှံတွေဟာ ကျန်းမာရေးအတွက်ကောင်းတယ်ဆိုပေမယ့် လွန်လွန်ကဲကဲ မစားမိစေဖို့ သတိပြုရပါမယ်။ ၎င်းတို့မှာ ဗီတာမင်နဲ့ သတ္တုဓာတ်တွေ အများကြီးပါဝင်ပေမယ့် သကြားဓာတ်လည်း ပါဝင်နေတာကြောင့် ဖြစ်ပါတယ်။
(၂) Almonds စေ့
Photo : Medical News Today
Almonds လို့ခေါ်တဲ့ ဗာဒံစေ့တွေဟာ ကျန်းမာရေးနဲ့ ညီညွတ်တဲ့ အဆီဓာတ်နဲ့ ပရိုတင်းဓာတ်ပါဝင်မှုများတဲ့အတွက် အချိန်အကြာကြီး ဗိုက်ပြည့်ဝစေနေပါတယ်။ ဗာဒံစေ့ဟာ အသားရှောင်တဲ့ သက်သတ်လွတ်စားသူတွေအတွက် ပရိုတင်းဓာတ်ထောက်ပံ့ပေးတဲ့ အာဟာရအရင်းအမြစ်ကောင်းတစ်ခု ဖြစ်ပါတယ်။ ဗာဒံစေ့မှာ စွမ်းအင်နဲ့ ဇီဝဖြစ်ပျက်မှုနှုန်းကို တိုးမြှင့်ပေးတဲ့ အိုမီဂါ-၃ ဖက်တီအက်ဆစ်ဓာတ်များလည်း ကြွယ်ဝစွာပါရှိပါတယ်။
(၃) ဟင်းနုနွယ်ရွက်နဲ့ အခြားအစိမ်းရောင် ဟင်းသီးဟင်းရွက်များ
Photo : Horticulture Magazine
ဟင်းနုနွယ်ရွက် ၊ ကိုက်လန် ၊ မုန်ညှင်းစိမ်းနဲ့ ဘရိုကိုလီတို့လို လတ်ဆတ်တဲ့ အစိမ်းရောင် ဟင်းသီးဟင်းရွက်တွေမှာ ဗီတာမင် ၊ သတ္တုဓာတ် ၊ ဓာတ်တိုးဆန့်ကျင်ပစ္စည်းနဲ့ အမျှင်ဓာတ်တွေ ပေါပေါများများ ပါပါတယ်။ အဆိုပါ ဟင်းသီးဟင်းရွက်တွေဟာ ဝမ်းဗိုက်အဆီပိုတွေကို လျှော့ချပေးနိုင်ပြီး ရောင်ရမ်းမှုကိုလျော့ကျစေကာ အစာချေဖျက်မှုနှုန်းကိုလည်း ပိုမိုကောင်းမွန်စေဖို့ အထောက်အကူဖြစ်စေပါတယ်။
(၄) ကြက်ဥ
Photo : Simply Recipes
လေ့လာမှုတွေအရ မနက်စာအတွက် ကြက်ဥပြုတ် ၂ လုံးစားသုံးသူတွေဟာ ကိုယ်အလေးချိန် ၆၅ ရာခိုင်နှုန်း ပိုကျလာပြီး ခါးအဆီ ၃၄ ရာခိုင်နှုန်း လျော့ကျစေတယ်လို့ ဆိုပါတယ်။ ဘာကြောင့်လဲဆိုတော့ ကြက်ဥဟာ ပရိုတင်းဓာတ်ကြွယ်ဝတဲ့ အရင်းအမြစ်ဖြစ်ပြီး ဆာလောင်မှုဒဏ်ကို လျော့ကျစေကာ အဆီအစားထိုး ကြွက်သားတွေကို တည်ဆောက်ပေးတာကြောင့် ဖြစ်ပါတယ်။
(၅) ပဲမျိုးစုံ
Photo : NDTV Food
ပဲအမျိုးမျိုးမှာ ပရိုတင်းဓာတ်ကြွယ်ဝစွာပါဝင်ပြီး ကယ်လိုရီနဲ့ အဆီပါဝင်မှု နည်းပါတယ်။ ပဲမျိုးစုံမှာပါဝင်တဲ့ ပရိုတင်းဓာတ်က ကြွက်သားထု တည်ဆောက်ရာမှာ ကူညီပေးသလို ဇီဝဖြစ်ပျက်မှုကို မြန်ဆန်စေပြီး ခန္ဓာကိုယ်တစ်ခုလုံးရဲ့ လုပ်ဆောင်မှုကို တိုးတက်ကောင်းမွန်စေပါတယ်။ ပဲကိုပြုတ်ပြီးစားတာက ဟင်းခတ်အမွှေးအကြိုင်တွေနဲ့ ချက်ပြုတ်စားတာထက် ကျန်းမာရေးနဲ့ ပိုညီညွတ်ပါတယ်။
ကဲဗိုက်ပူပူ ခါးတုတ်တုတ် ဖိုးဝရုပ် လို ခန္ဓာကိုယ်ကနေ အဆီကင်းတဲ့ အမိုက်စားဘော်ဒီရဖို့ အခုပြောပြမယ့် အစားအစာတွေသာ စားတော့လိုက်နော်။
Featured Photo : Healthy Man
