လုပ်ငန်းခွင်မှာ အလုပ်လုပ်ကိုင်တဲ့အခါ အရေးအကြီးဆုံး အချက်ကတော့ အလုပ် နဲ့ ကိုယ်ရေး ကိုယ်တာ ခွဲခြားထားခြင်းပဲဖြစ်ပါတယ်။ အလုပ် နဲ့ ကိုယ်ရေး ကိုယ်တာကို မခွဲခြားထားတဲ့အခါ ခံစားရမယ့် အကျိုးအပြစ်များက ဘာတွေဖြစ်မလဲဆိုတာ သိပါသလား။
စိတ်ဖိစီးမှုများလာခြင်း၊ မိမိရဲ့ စွမ်းဆောင်ရည် ကျလာခြင်း၊ အလုပ် မနိုင်ဝန်များ ထမ်းနေရခြင်း အစရှိတဲ့ ဆိုးကျိုးများကတော့ အလုပ်နဲ့ ကိုယ်ရေးကိုယ်တာကို မခွဲခြားထားနိုင်လို့ ခံစားရတဲ့ ဆိုးကျိုးတွေပါပဲ။ မိမိရဲ့ လုပ်ဖော်ကိုင်ဖက်နဲ့ပဲဖြစ်ဖြစ်၊ အထက်လူကြီးနဲ့ပဲဖြစ်ဖြစ် ပုဂ္ဂိုလ်ရေးအရ ခင်မင်မှုရှိတဲ့အတွက်ကြောင့် ကိုယ့်ဘက်က အားနာနေရင် ကွီးတို့ပဲ ခံစားသွားရပါလိမ့်မယ်။
ဒါ့ကြောင့်မလို့ လုပ်ငန်းခွင်မှာ စည်းတစ်ခု ခြားထားဖို့ လိုအပ်ပါတယ်။
စည်းချထားတဲ့အခါ သုံးမျိုးသုံးစား ခွဲခြားထားနိုင်ပါတယ်။ ရုပ်ပိုင်းဆိုင်ရာအရ စည်းတားထားခြင်း၊ စိတ်ခံစားချက်အရ စည်းတားထားခြင်းနှင့် စိတ်ပိုင်းဆိုင်ရာအရ စည်းတားထားခြင်းတို့ပဲဖြစ်ပါတယ်။
အပြင်ပိုင်း မြင်သာတဲ့ပုံစံနဲ့ စည်းတားထားချင်တယ်ဆိုရင် အခုလို လုပ်နိုင်ပါတယ်။
ကိုယ် အလုပ်ရှုပ်နေကြောင်း၊ ကိုယ့်ကို စကားလာမပြောစေချင်တဲ့အခါ နားကြပ်တပ်ထားပြီး အလုပ်လုပ်တာမျိုး၊ နေ့လည်စာ ထမင်းစားတဲ့အခါ အမြဲတမ်းအတူတူ သွားမစားဘဲ တစ်ယောက်တည်း သွားစားတာမျိုး၊ ကိုယ့်ဆီက ပစ္စည်းတစ်ခုခု ချေးငှားမယ်ဆိုရင် အချိန်အကန့်အသတ်တစ်ခု ခြားထားခြင်း၊ လူတစ်ယောက်ကို ဖက်တာထက်စာရင် လက်ဆွဲနှုတ်ဆက်ခြင်းကို ဦးစားပေးခြင်း စသည်တို့ပဲဖြစ်ပါတယ်။
စိတ်ခံစားချက်များနဲ့ တွယ်ငြိခြင်းမရှိအောင် အခုလိုမျိုး စည်းခြားထားနိုင်ပါတယ်။
အလုပ်တာဝန်များကို ညီတူညီမျှ ခွဲခြားထားခြင်း၊ အခြားသူက စိတ်ခံစားချက် မကောင်းဘူးဆိုရင်လည်း ကိုယ်နဲ့ တိုက်ရိုက်မပတ်သက်ဘူးဆိုရင် ဘာသိဘာသာပဲ နေလိုက်ခြင်း၊ ကိုယ့်အလုပ်ပဲ ပြီးမြောက်အောင် ဦးစားပေးခြင်း အစရှိသည်တို့ပဲဖြစ်ပါတယ်။
နောက်ဆုံးတစ်ခုကတော့ စိတ်ပိုင်းဆိုင်ရာအရ စည်းတားထားခြင်းပဲဖြစ်ပါတယ်။ ဒီအချက်ကတော့ စောစောကအချက်နဲ့ ဆင်တူသလိုရှိပါတယ်။ ဒါပေမဲ့ စောစောက စိတ်ခံစားချက်ကတော့ ကွီးနဲ့ အခြားတစ်ယောက်တို့အကြား စိတ်ခံစားချက်များ ပတ်သက်ဆက်နွယ်မှုမရှိအောင် ခွဲခြားထားခြင်းဖြစ်ပြီး ဒီအချက်ကတော့ ကွီးတို့တစ်ယောက်တည်းနဲ့သာ သက်ဆိုင်တာပါ။ တစ်နည်းပြောရရင်တော့ ကွီးတို့ရဲ့ စိတ်ကျန်းမာရေးနဲ့ အများကြီး သက်ဆိုင်ပါတယ်။
ဘယ်လိုနည်းလမ်းတွေနဲ့ စည်းတားထားမယ်ဆိုရင် ကွီးတို့ရဲ့ စိတ်ကျန်းမာရေးအတွက် အထောက်အကူဖြစ်စေမလဲ။
အလုပ်ချိန်ကို သေချာ သတ်မှတ်ထားခြင်း၊ လုပ်ဖော်ကိုင်ဖက်များနဲ့ အခြားသူများအကြောင်းကို အတင်းတုပ်ကာ မကောင်းပြောခြင်းမှ ရှောင်ကြဥ်ခြင်း၊ အလုပ်အပေါ် နှောင့်ယှက်မယ့် အရာများကို တားဆီးထားခြင်း အစရှိတဲ့ အချက်များနဲ့ အလုပ်အပေါ် အာရုံစိုက်အောင် တွန်းပို့ပေးနိုင်ပါတယ်။
ဒီလိုမျိုး အလုပ်နဲ့ ကိုယ်ရေးကိုယ်တာ ခွဲခြားထားမှသာလျှင် ကွီးတို့လည်း ဝန်မပိတော့မှာဖြစ်ပြီး အလုပ်လုပ်ရတာလည်း ပျော်ရွှင်လာပါလိမ့်မယ်။
လုပ်ငန်းခွင်မှာ ကွီးတို့သည် အလုပ်တာဝန်ပြီးမြောက်အောင် လုပ်ဆောင်ချင်တယ်ဆိုရင်တော့ အခုဖော်ပြပေးမယ့်အချက်များကို ဆက်လက်ကျင့်သုံးနိုင်ပါသေးတယ်။
နိုး လို့ ငြင်းရမှာ အားမနာပါနဲ့
လူတစ်ယောက်မှာ သူ့ရဲ့ ခံနိုင်ရည်သည် အတိုင်းအတာတစ်ခုအထိရှိပါတယ်။ ကွီးတို့ရဲ့ အလုပ်တာဝန်မဟုတ်ဘဲ အပိုတာဝန်တွေ ပေးအပ်လာတဲ့အခါမှာ ကိုယ် လုပ်နိုင်တယ်ဆိုမှ လက်ခံပါ။ ငြင်းရမှာ အားနာတဲ့အခါ ကွီးတို့ရဲ့ အားလပ်ချိန်တွေ၊ နားချိန်တွေ ကုန်ဆုံးသွားပါလိမ့်မယ်။ ဥပမာ ဆိုကြပါစို့။ ကွီးတို့ကို နေ့လည်စာ စားချိန်မှာ မီတင်တစ်ခု သွားတက်ဖို့ အဖော်ခေါ်သွားမယ်။ ထိုမီတင်က ကွီးတို့ သွားစရာမလိုတဲ့ မီတင်တစ်ခု။ ဒါဆိုရင် ကွီးတို့က ခင်မင်မှု ပျက်ပြားသွားမှာစိုးလို့ နေ့လည်စာ အပျက်ခံပြီး အဖော်လိုက်သွားပေးမှာလား။ ဒါမှမဟုတ် ကိုယ့်ရဲ့ အခွင့်အရေးကို သေချာ အသုံးချပြီး ထမင်းစားချိန်ကို ထမင်းစားပြီး အေးအေးဆေးဆေး အချိန်ကုန်ဆုံးမှာလား။
ကျနော်တို့ရဲ့ လုပ်ငန်းခွင်မှာ အခုလိုမျိုး ခင်မင်ရင်းနှီးမှု ပျက်ပြားသွားမှာစိုးလို့ဆိုပြီး ငြင်းဆန်ရမှာ အားနာပြီး ကြိတ်မှိတ်လိုက်လုပ်ပေးရတာမျိုးတွေ တစ်ပုံကြီးပါပဲ။ တကယ်တော့ ဒါသည် Healthy Workplace တစ်ခုကို မဖန်တီးပေးနိုင်ပါဘူး။ အချင်းချင်းကြားမှာလည်း အဖုအထစ်တွေ ဖြစ်နိုင်ပါသေးတယ်။ ဒါ့ကြောင့် တစ်ယောက်နဲ့ တစ်ယောက်သည် လုပ်ဖော်ကိုင်ဖက်ထက် ပိုတဲ့ ဆက်ဆံရေးပဲဖြစ်နေပါစေ၊ အလုပ်ကိစ္စဆို ပရော်ဖက်ရှင်နယ်ကျကျသာ လုပ်ကိုင်ပါ။ သူများအပေါ်လည်း အသာစီး မယူချင်ပါနဲ့။ ကိုယ့်အပေါ် ဖျံကျတာမျိုးကိုလည်း မခံပါနဲ့။
ပွင့်လင်းရိုးသားမှုရှိပါ
ကွီးတို့အနေနဲ့ စည်းတစ်ခု ခြားထားတာကတော့ ဟုတ်ပါပြီ။ ကိုယ့်ဘက်ကလည်း ပွင့်လင်းရိုးသားမှု ရှိဖို့ လိုအပ်ပါသေးတယ်။ ကိုယ့်အနေနဲ့ အလုပ်ချိန်အတွင်းမှာ အလုပ်ပြီးမြောက်အောင် လုပ်ကိုင်ဖို့လိုအပ်ပါတယ်။ သူပေးတဲ့ လစာကို ယူထားပြီး ရုံးသွားကာ ဂိမ်းသွားဆော့နေလို့တော့ မရပါဘူး။ ဒါဆိုရင် ကွီးတို့ရဲ့ ပါဖောမန့်စ်လည်း ကျသွားမှာဖြစ်ပြီး ရာထူးတိုးဖို့၊ လစာတိုးဖို့ဆိုတာကလည်း ကမ်းမမြင် လမ်းမမြင် ဖြစ်သွားပါလိမ့်မယ်။ ကိုယ့်ဘက်ကလည်း ပွင့်လင်းရိုးသားတဲ့ စိတ်ထားရှိမှသာလျှင် ပရော်ဖက်ရှင်နယ်ကျကျ အလုပ်လုပ်ကိုင်နိုင်မှာမဟုတ်လား။
ကိုယ့်စိတ်ကို အနားပေးဖို့လည်း မမေ့ပါနဲ့
တစ်နှစ်တာလုံးမှာ ပင်ပင်ပန်းပန်း အလုပ်လုပ်ပြီးသွားတဲ့အခါ ကိုယ့်စိတ်ကိုလည်း အပန်းဖြေဖို့လိုအပ်ပါတယ်။ စိတ်အပန်းဖြေဖို့ အကောင်းဆုံး နည်းလမ်းကတော့ ခရီးထွက်ခြင်းပါပဲ။ တစ်နှစ်မှာ အနည်းဆုံး တစ်ခါ (သို့) နှစ်ခါလောက်တော့ ခရီးသွားသင့်ပါတယ်။ တစ်နှစ်တာလုံးရဲ့ ကိုယ့်ရဲ့ ခွင့်ရက် ဘယ်လောက်ရသလဲ။ ရတဲ့ ခွင့်ရက်များကို သေသေချာချာ အသုံးချတတ်ဖို့ လိုပါလိမ့်မယ်။ ဒါမှသာ လူက စိတ်ဖိစီးမှုတွေကို မခံစားရဘဲ လုပ်ငန်းခွင်မှာ ပျော်ပျော်ရွှင်ရွှင်နဲ့ အလုပ်လုပ်နိုင်မှာပဲဖြစ်ပါတယ်။
ကွီးတို့ရော လုပ်ငန်းခွင်မှာ အလုပ်နဲ့ ကိုယ်ရေးကိုယ်တာနဲ့ ခွဲထားရဲ့လား။
Source: Indeed
Featured Image: Swartz-legal
