အိပ်စက်ခြင်း ဆိုတာသည် လူသားတိုင်းရဲ့ ခန္ဓာကိုယ်အတွက် မရှိမဖြစ်လိုအပ်တဲ့ ဇီဝကမ္မဖြစ်စဥ်တစ်ခုဖြစ်ပါတယ်။ တစ်နေ့တာလုံးမှာ တက်တက်ကြွကြွနဲ့ လန်းဆန်း ဖျတ်လတ်နေဖို့ဆိုရင် ညဘက်အချိန်မှာ အိပ်ရေး ဝဝ အိပ်စက် အနားယူဖို့ လိုအပ်ပါတယ်။ ညဘက်မှာ အိပ်ရေး ဝဝ မအိပ်စက်နိုင်တဲ့သူတွေ၊ ခေါင်းအုံးပေါ်မှာ ခေါင်းချလိုက်တာနဲ့ အိပ်ပျော် ဖို့ ခက်ခဲ နေတဲ့သူတွေလည်း ရှိနိုင်ပါတယ်။

ထိုကဲ့သို့ အိပ်ပျော် ဖို့ ခက်ခဲ နေရတဲ့ အကြောင်းအရင်းများစွာ ရှိနိုင်ပါတယ်။

(၁) ကော်ဖီ အလွန်အကျွံ သောက်ထားလို့

ကော်ဖီ ချစ်သူအချို့က တစ်နေ့လျှင် ကော်ဖီ ၃ ခွက်ကနေ ၅ ခွက်လောက်မှ မသောက်ရရင် မနေတတ်ကြပါဘူး။ တကယ်လို့ ကွီးတို့က ညဘက်မှာ အိပ်မပျော်ဖြစ်နေရင်တော့ ကိုယ့်ကိုယ်ကိုယ် ပြန်မေးကြည့်လိုက်ပါ။ နေ့ပိုင်းမှာ ကော်ဖီ ဘယ်နှခွက် သောက်ထားပါသလဲ။ ကာဖိန်းဓာတ် အလွန်အကျွံ သောက်သုံးခြင်းက ကွီးတို့ရဲ့ အိပ်ချိန် စက်ဝန်းကို အနှောင့်အယှက် ဖြစ်စေပါတယ်။​

(၂) စိတ်ဖိစီးမှုတွေ များနေလို့

ကိုယ်ရေးကိုယ်တာ ကိစ္စများကြောင့်ပဲဖြစ်ဖြစ်၊ ပရော်ဖက်ရှင်နယ် လုပ်ငန်းကိုင်ငန်းကြောင့် ပဲဖြစ်ဖြစ် စိတ်ဖိစီးမှုနှင့် စိုးရိမ်ပူပန်မှုများက ကွီးတို့အတွက် အိပ်စက်ခြင်းကို ကြီးမားသော အနှောင့်အယှက်ဖြစ်စေကာ အိပ်မပျော်နိုင် ဖြစ်စေတတ်ပါတယ်။ အတွေးလွန်ခြင်း၊ စိုးရိမ်ပူပန်ခြင်း သို့မဟုတ် ကွီးတို့မပြောင်းလဲနိုင်သော အရာများအပေါ် ဖိစီးနေခြင်းက နာတာရှည်စိတ်ဖိစီးမှုနှင့် အိပ်စက်ခြင်းကို အနှောင့်အယှက်ဖြစ်စေနိုင်ပါတယ်။ ဒီအချက်ဟာလည်း ကွီးတို့ကို အိပ်ပျော်ဖို့ ခက်ခဲစေတတ်တဲ့ အဓိက အကြောင်းအရင်း တစ်ခုပါပဲ။

ထိုအကြောင်းအချက်တွေ အပြင် အိပ်ချိန်တွေက တစ်ရက်နဲ့ တစ်ရက် မတူညီခြင်း၊ အိပ်ခါနီးမှာ Screen Time များလွန်းခြင်း၊ ကိုယ်လက်လှုပ်ရှားမှု နည်းခြင်း​ (သို့) လုံးဝ မရှိခြင်း အစရှိတဲ့ အကြောင်းအချက်များကလည်း ကွီးတို့ကို အိပ်ပျော် ဖို့ ခက်ခဲ စေနိုင်ပါတယ်။​

ညဘက်မှာ အိပ်ရေး ဝဝ မအိပ်စက်ထားတဲ့အခါ အချိန်ကြာလာသည်နှင့်အမျှ ကျန်းမာရေးက ထိခိုက်လာပါလိမ့်မယ်။ ကွီးတို့ရဲ့ ကျန်းမာရေးကို ထိခိုက် မခံစေချင်ဘူး၊ အိပ်ရေး ဝဝ အိပ်စက် အနားယူချင်တယ်ဆိုရင်တော့ အခုဖော်ပြပေးမယ့် နည်းလမ်းများနဲ့ ကြိုးစား နိုင်ပါတယ်။

(၁) အိပ်ချိန် ၁ နာရီအလိုမှာ မည်သည့် ဖုန်း၊ လက်ပ်တော့၊ တက်ပလက်တို့ကိုမှ အသုံးမပြုပါနဲ့

ဖုန်း၊ ကွန်ပျူတာ စတဲ့ ဒီဂျစ်တယ် ဖန်သားပြင်များမှ ထုတ်လွှတ်သော အပြာရောင်အလင်းတန်းများက ကွီးတို့ခန္ဓာကိုယ်ထဲရှိ အိပ်စက်ခြင်း ဟော်မုန်း Melatonin ထုတ်လုပ်မှုကို အနှောင့်အယှက် ဖြစ်စေသောကြောင့် အိပ်ချိန်ပမာဏ ကိုထိခိုက်မှုတွေ ရှိလာနိုင်ပါတယ်။ ဒါကြောင့် အိပ်ရာမဝင်ခင် ဒစ်ဂျစ်တယ် ပစ္စည်းများ အသုံးပြုခြင်းက ကွီးတို့အိပ်ပျော်ဖို့ကို အခက်အခဲဖြစ်စေပါတယ်။ ဒါကြောင့် Screen Time ကို ကန့်သတ်လိုက်ခြင်း သို့မဟုတ် လျှော့ချလိုက်ခြင်းဖြင့် ဒီပြဿနာကို အနည်းနဲ့အများ ဖြေရှင်းပြီးသား ဖြစ်စေပါတယ်။

(၂) စိတ်ဖိစီးမှုများကို လျော့ချပါ။ စိတ်ငြိမ်သွားအောင် တရားထိုင်ပါ

တစ်ခါတစ်လေကျရင် လူတွေက စိတ်ဖိစီးမှုကြောင့် အိပ်ပျော်ရခက်ခဲတတ်ပါတယ်။ ယောဂကျင့်ခြင်းနဲ့ တရားထိုင်ခြင်းတို့က စိတ်ကိုတည်ငြိမ်စေပြီး ခန္ဓာကိုယ်ကို ပြေလျော့စေပြီး လျင်လျင်မြန်မြန် အိပ်ပျော်စေပါတယ်။ ယောဂကျင့်ခြင်းက အိပ်စက်မှုစက်ဝန်းကို အပြုသဘောဆောင်သော အကျိုးများ သက်ရောက်စေတယ်လို့ ဆိုပါတယ်။ တရားထိုင်ခြင်းက Melatonin ပမာဏကိုတိုးမြှင့်စေပြီး အိပ်ပျော်ရန်လွယ်ကူသည့် အခြေအနေကိုရောက်ရန် ဦးနှောက်ကိုအထောက်အကူ ပြုပါတယ်။

(၃) လေ့ကျင့်ခန်း ပုံမှန် ပြုလုပ်ပါ

အိပျော်ဖို့ခက်ခဲတဲ့ ပြဿနာ ဒါမှမဟုတ် အိပ်မပျော်တဲ့ ပြဿနာကို ကိုယ်လက်လေ့ကျင့်ခန်းလုပ်ခြင်းဖြင့် ဖြေရှင်းလို့ရပါတယ်။  ဇီဝကမ္မဖြစ်စဉ်အရ လေ့ကျင့်ခန်းလုပ်ခြင်းက ကွီးတို့ရဲ့ ခန္ဓာကိုယ်ကို အံသြဖွယ်ကောင်းလောက်အောင် အကျိုးရှိစေပြီး အိပ်စက်ခြင်း စက်ဝန်းကို ပိုမိုကောင်းမွန်စေပါတယ်။ ကွီးတို့ ညဘက်တွင် အမြန်ဆုံး အိပ်ပျော်ဖို့အတွက် နေ့ဘက်တွင် အချိန်တစ်ခုသတ်မှတ်ပြီး လမ်းလျှောက်ခြင်း၊ ပြေးခြင်း၊ စက်ဘီးစီးခြင်းနဲ့ တင်းနစ်ကစားခြင်း စသည့် ကွီးတို့ ကြိုက်နှစ်သက်ရာ ကိုယ်လက်လေ့ကျင့်ခန်းတစ်ခုကို လုပ်ပါ။

ဒီအချက်တွေကို ကြိုးစားကြည့်တာတောင်မှ ကွီးတို့ရဲ့ အိပ်မပျော်တဲ့ ရောဂါက မသက်သာလာဘူးဆိုရင်တော့ ဆရာဝန်ထံ အမြန်ဆုံး ကုသမှု ခံယူသင့်ပါတယ်။

ကွီးတို့ရော ညဘက်မှာ အိပ်ရေး ဝဝ အိပ်စက် အနားယူနိုင်ကြရဲ့လား။

Source : Menshealth

Featured Photo : Health