လူသုံးအများဆုံး သားဆက်ခြားနည်းတွေထဲက တစ်ခုတော့ သန္ဓေတားဆေး ပုံမှန်သောက်သုံးတာပါ။ သန္ဓေတားဆေး သောက်သုံးနည်းကို လွန်ခဲ့တဲ့ နှစ်ပေါင်းများစွာကတည်းက အသုံးပြုကြပေမယ့် အခုချိန်အထိ တားဆေး တွေနဲ့ ပတ်သတ်ပြီး လူတော်တော်များများ သိမှတ်မှား နားလည်လွဲထားကြတဲ့ အမှားတချို့ ရှိနေပါတယ်။ ဒီဆောင်းပါးလေးမှာတော့ တားဆေးနဲ့ ပတ်သတ်ပြီး သိမှတ်မှားနေတဲ့ အမှားတွေ ကို မျှဝေပေးချင်ပါတယ်။
(၁) မျိုးပွားမှုကို ထိခိုက်စေတယ်
Photo : Verywell Health
တားဆေး သောက်တာက ကလေးမရနိုင်ဘူး ၊ ကိုယ်ဝန်ရဖို့ ကြန့်ကြာစေတယ်လို့ လူတော်တော်များများ သိထားကြပါတယ်။ တကယ်တော့ ဒါဟာ မမှန်ပါဘူး။ နေ့စဉ် တားဆေးသောက်ခြင်းကို ရပ်တန့်လိုက်ပြီဆိုရင် ခန္ဓာကိုယ်ဟာလည်း သဘာဝအတိုင်း ပုံမှန်မျိုးပွားမှုဆိုင်ရာ လုပ်ငန်း ဆောင်တာတွေကို ပြန်လည်လုပ်ဆောင်လာနိုင်မှာ ဖြစ်တဲ့အတွက် ဆေးဖြတ်ပြီးတာနဲ့ ကိုယ်ဝန်ဆောင်နိုင်မှာပဲ ဖြစ်ပါတယ်။
(၂) STIs ရောဂါတွေကို ကာကွယ်ပေးတယ်
Photo : Newsweek
ဒါကလည်း အမှားကြီးတစ်ခုပါပဲ။ တားဆေးတွေဟာ ကွန်ဒုံးနည်းတူ ကြိုတင်မျှော်လင့်မထားတဲ့ ကိုယ်ဝန်ရနိုင်ခြေကို တားဆီးကာကွယ်ပေးတယ်ဆိုပေမယ့်လို့ လိင်မှတဆင့် ကူးစက်နိုင်တဲ့ ရောဂါတွေ (STIs) ကိုတော့ ကာကွယ်မပေးနိုင်ပါဘူး။ သန္ဓေတားဆေးပုံစံ အမျိုးမျိုးရှိပြီး ၎င်းတို့အားလုံးဟာ လိင်မှတဆင့် ကူးစက်နိုင်တဲ့ ရောဂါအားလုံးကို ကာကွယ်ဖို့အတွက် လုံးဝ အသုံးမဝင်ပေ။
(၃) ကိုယ်အလေးချိန် တက်လာနိုင်တယ်
Photo : Body+Soul
တားဆေး သောက်ရင် ဝိတ်တက်လာမယ် ၊ ဝလာမယ်လို့ အများစု ပြောကြပါတယ်။ တကယ်တော့ ဒါဟာလည်း အရပ်စကားတစ်ခုပါပဲ။ တားဆေးနဲ့ ကိုယ်အလေးချိန်တိုးခြင်းကြား ဆက်စပ်မှုကို မည်သည့် သုတေသနပြုချက်တွေကမှ သက်သေပြထားခြင်း မရှိသေးပါဘူး။
(၄) လိင်စိတ်ဆန္ဒကို ထိခိုက်စေတယ်
Photo : Health
တားဆေး သောက်နေတဲ့ အမျိုးသမီးတွေဟာ လိင်စိတ်ဆန္ဒတက်ကြွမှု ၊ လိင်မှုကိစ္စအပေါ် စိတ်အားထက်သန်မှု နည်းပါးတယ်လို့ ပြောကြပါတယ်။ တကယ်တော့ ဒါဟာ မှားယွင်းစွာ သိမှတ်မှားနေတဲ့ အမှားတစ်ခုပါပဲ။ တားဆေးတွေဟာ လူတစ်ယောက်ရဲ့ လိင်စိတ်ဆန္ဒကို အပြောင်းအလဲ မဖြစ်စေနိုင်ပါဘူး။
(၅) အသက်ကြီးတဲ့ အမျိုးသမီးတွေ တားဆေးဖြတ်နိုင်တယ်
Photo : Verywell Health
အမျိုးသမီးတွေဟာ အသက် ၄၀ နောက်ပိုင်း ကိုယ်ဝန်ရနိုင်ခြေ နည်းပါတယ်။ ဒါပေမယ့် ကိုယ်ဝန်လုံးဝမရနိုင်ဘူးလို့ မဆိုလိုပါဘူး။ ဒါကြောင့် အသက်ကြီးတဲ့ အမျိုးသမီးတွေအနေနဲ့လည်း သွေးမဆုံးခင်အထိ သင့်လျှော်တဲ့ တားဆေး မှီဝဲဖို့ရန်အတွက် နားလည်တက်ကျွမ်းတဲ့ မီးယပ်ဆရာဝန်နဲ့ တိုင်ပင်ဆွေးနွေးဖို့ မဖြစ်မနေ လိုအပ်ပါတယ်။
Source : Healthshots
Featured Photo : Medical News Today
