လူတိုင်းမှာ ခန္ဓာကိုယ် အနံ့အသက်ဆိုတာ ရှိပါတယ်။ ကိုယ်သင်းနံ့ ကောင်းတာ ၊ ဆိုးတာပဲ ကွာသွားတာပါ။ အခုလို ပူအိုက်တဲ့ ရာသီမှာဆိုရင် ချွေးထွက်များခြင်းကြောင့် ခန္ဓာကိုယ်ကနေ အနံ့အသက်ဆိုးတွေ ပိုပြီး ထွက်လွယ်ပါတယ်။ ဒီတစ်ခေါက်တော့ ကွီးတို့ ခန္ဓာကိုယ်ကနေထွက်တဲ့ အနံ့အသက်ဆိုးတွေကို သက်သာစေနိုင်မယ့် ရိုးရှင်းတဲ့ အလေ့အကျင့် အချို့ကို မျှဝေပေးပါမယ်။
(၁) ဘာတွေစားလဲ ပြန်ကြည့်ပါ
Photo : Men’s Skin Centres
ကွီးတို့ အစာအိမ်ထဲ ထည့်သမျှ အစားအစာတွေက ကိုယ်သင်းနံ့အပေါ် သက်ရောက်မှု ရှိပါတယ်။ ကြက်သွန်နီ ၊ ကြက်သွန်ဖြူတို့လို အနံပြင်းတဲ့ ဟင်းခတ်အမွှေးအကြိုင်တွေ ၊ ပြုပြင်ထားတဲ့ အစားအစာတွေ ၊ ပန်းဂေါ်ဖီ / ဂေါ်ဖီထုပ်လို ဟင်းသီးဟင်းရွက်တွေဟာ ခန္ဓာကိုယ် အနံ့ဆိုးတွေကို ထွက်စေတဲ့ အဓိကတရားခံတွေပါပဲ။ အဲ့ဒီအစား ဟင်းနုနွယ် ၊ ကိုက်လန် ၊ မုန်လာဥနီ ၊ သခွားသီးတို့လို အမျှင်ဓာတ် ကြွယ်ဝတဲ့ လတ်ဆတ်တဲ့ အသီးအရွက်တွေကို များများစားပေးပါ။ ဒီအစားအစာတွေဟာ ကိုယ်နံ့ကို ကောင်းစေပါတယ်။
(၂) အဝတ်အစားတွေ သေချာလျှော်ပါ
Photo : The Manual
အဝတ်အစားတွေမှာ ဘတ်တီးရီးယားတွေ စွဲကပ်နေရင်လည်း ခန္ဓာကိုယ်ကနေ ချွေးထွက်လာချိန်မှာ အနံ့ဆိုးတွေ ထွက်လာတက်ပါတယ်။ ဒါကြောင့် အဝတ်တွေကို သေချာလျှော်ဖွတ်ပြီး သန့်စင်အောင်ထားပါ။ အဝတ်အစားမှာ အနံ့ဆိုးစွဲကပ်တာ သက်သာစေဖို့ အဝတ်လျှော်တဲ့အခါ မုန့်ဖုတ်ဆိုဒါနဲ့ ရှာလကာရည် အနည်းငယ် ရောထည့်ပြီး လျှော်ဖွတ်ပေးလို့ ရပါတယ်။ ဒါ့အပြင် အခုလို ချွေးထွက်ပြီး ပူအိုက်တဲ့ ရာသီမှာဆိုရင် မြန်မြန်ဆန်ဆန် ချွေးခြောက်နိုင်တဲ့ လေဝင်လေထွက်ကောင်းတဲ့ ချည်သားအဝတ်အထည်တွေကို ရွေးချယ်ဝတ်ဆင်တာဟာ ခန္ဓာကိုယ်က အနံ့ဆိုးထွက်တဲ့ ပြဿနာကို သက်သာစေမယ့် အရိုးရှင်းဆုံး နည်းလမ်းတစ်ခု ဖြစ်ပါတယ်။
(၃) ဟိုကြားဒီကြား သေချာသန့်ရှင်းရေး လုပ်ပါ
Photo : Pete & Pedro
ချိုင်းအောက်လို အရေပြားဧရိယာဟာ ချွေးထွက်များပြီး ဘတ်တီးရီးယား ခိုအောင်းလို့ အကောင်းဆုံးပါ။ ဒါကြောင့် ခန္ဓာကိုယ်မှာ ချိုင်းဟာ အနံ့ဆိုး အများဆုံးထွက်စေတဲ့ နေရာတစ်ခု ဖြစ်နေပါတယ်။ ကွီးတို့ ခန္ဓာကိုယ်မှာ ချွေးနံ့ဆိုးတွေ သက်သာချင်တယ်ဆိုရင် ချိုင်းအောက်လို ဟိုကြားဒီကြား နေရာတွေကို သေချာသန့်ရှင်းရေးလုပ် ၊ ဘတ်တီးရီးယား ခိုအောင်းလို့ကောင်းတဲ့ အမွှေးအမျှင်တွေကို ဂရုတစိုက်ပုံမှန် ရိတ်ပေးဖို့ လိုအပ်ပါတယ်။ ချွေးနံ့ပျောက်ဆေး ၊ Roll-On တို့ကိုလည်း နေ့စဉ်ပုံမှန် အသုံးပြုပေးဖို့ လိုပါတယ်။
(၄) ရေချိုးတဲ့အခါ သေချာအချိန်ယူပါ
Photo : AS USA – Diario AS
တစ်ကိုယ်ရည် သန့်ရှင်းရေးအတွက် ကွီးတို့ တစ်နေ့တာကို အနည်းဆုံး ၂ ကြိမ်လောက်တော့ ပုံမှန်ရေချိုးသင့်ပါတယ်။ ရေချိုးတဲ့ အခါမှာလည်း ပြီးပြီးရော မချိုးပါနဲ့။ ခန္ဓာကိုယ်အနှံ့ ကိုယ်လက်အစိတ်အပိုင်းတွေကို သေချာလေး ဆပ်ပြာတိုက် ဂျေးချွတ်သန့်စင်ပါ။ သာမန်ရေချိုးဆပ်ပြာတွေအစား ခန္ဓာကိုယ်မှာ စွဲကပ်နေတဲ့ အညစ်အကြေးတွေနဲ့ ဘတ်တီးရီးယားတွေကို ထိထိရောက်ရောက် ဖယ်ရှားသန့်စင်ပေးနိုင်တဲ့ Anti-bacterial ဆပ်ပြာကို သုံးသင့်ပါတယ်။
Source : Dietitian Approved
Featured Photo : Viking Beard Brand
