Gym ထဲမှာ ချွေးနံ့ပြင်းပြင်း ထွက်တဲ့သူတွေ ကွီးတို့ ကြုံဖူးကြမယ် ထင်ပါတယ်။ ဘေးလူတွေကို တော်တော်လေး စိတ်အနှောက်အယှက် ဖြစ်စေပါတယ်။ ဒီလို အခြားသူတွေ နှာခေါင်းရှုံ့စရာ ချွေးစော်နံ တဲ့ လူတစ်ယောက် ကွီးတို့လည်း ဖြစ်ချင်မယ် ထင်မပါဘူး။ ကဲဒါဆို ဘယ်လိုအချက်တွေ လိုက်နာရမလဲ လေ့လာကြည့်လိုက်ရအောင်ပါ။
(၁) Workouts မလုပ်ခင် ရေချိုးပါ
Photo : Real Men Real Style
ချွေးနံ့ဆိုးတွေဆိုတာ ခန္ဓာကိုယ်မှာ စွဲကပ်နေတဲ့ ဘက်တီးရီးယားတွေနဲ့ အားကစားလုပ်ချိန်မှာ ထွက်လာတဲ့ ချွေးတို့ ပေါင်းစပ်ပြီး ထွက်ပေါ်လာတာ ဖြစ်ပါတယ်။ ဘက်တီးရီးယားတွေကို ရှင်းထုတ်ဖို့အတွက် တစ်ကိုယ်ရည် သန့်ရှင်းမှုဟာ အရေးကြီးဆုံးပါပဲ။ ဒါကြောင့် Gym မသွားခင်မှာ ရေအရင်ချိုးပါ။ ဘက်တီးရီးယားတွေ စွဲကပ်လွယ်ပြီး အနံ့ဆိုးဖြစ်စေတဲ့ ခန္ဓာကိုယ်အစိတ်အပိုင်း ( ချိုင်း ၊ ပေါင်ခြံ ၊ ဒူးကောက်ခွက်နဲ့ ခြေဖဝါး) တွေကို သေချာလေး ဆပ်ပြာနဲ့ ဆေးကြောသန့်စင်ပေးဖို့ လိုပါတယ်။
(၂) Gym ဝတ်စုံ သေချာရွေးပါ
Photo : www.ebb.rs
အဝတ်အစား ရွေးချယ်မှုက ကွီးတို့ ခန္ဓာကိုယ် အနံ့အသက်နဲ့ တိုက်ရိုက်သက်ဆိုင် နေတယ်ဆိုတာ သိပါသလား ? Workouts လုပ်ပြီဆို သေချာတာကတော့ ချွေးထွက်များမယ် ၊ အချိန်ကြာလာတာနဲ့ အဝတ်အစားတွေမှာ ဘက်တီးရီးယားနဲ့ မှိုတွေ စွဲကပ်ပြီး အနံ့ဆိုးတွေ ထွက်လာမယ်။ ဒီအခြေအနေကို ကာကွယ်ဖို့ အားကစားဝတ်စုံရွေးတဲ့အခါ ချွေးခြောက်မြန်ပြီး သက်တောင့်သက်သာနဲ့ လေဝင်လေထွက်ကောင်းတဲ့ Tencel ၊ Spandex ဒါမှမဟုတ် Polypropylene အသား အဝတ်အစားတွေကို ရွေးချယ်ဝတ်သင့်ပါတယ်။
(၃) တဘက် ယူသွားပါ
Photo : Men’s Health Australia
အားကစားရုံသွားရင် ချွေးသုတ်ဖို့ တဘက်တစ်ထည်တော့ မပါမဖြစ် ဆောင်သွားသင့်ပါတယ်။ လေ့ကျင့်ခန်းတစ်ကြိမ် လုပ်ပြီးတိုင်းမှာ ချွေးထွက်တဲ့ ခန္ဓာကိုယ် အစိတ်အပိုင်းတွေကို သေချာလေး သုတ်ပေးဖို့ လိုပါတယ်။ အားကစားလုပ်နေစဉ်မှာ ထွက်လာတဲ့ ချွေးတွေကို ခြောက်အောင် ဂရုတစိုက် သုတ်ပေးတာဟာ အနံ့သက်ဆိုးတွေ ဖြစ်ပေါ်ခြင်းကို သက်သာစေနိုင်ပါတယ်။ သတိထားရမှာ တစ်ခုကတော့ Gymမှာ သုံးတဲ့ တဘက်တွေကို အနည်းဆုံး ၂ – ၃ ခု အပိုထားပြီး တစ်နေ့သုံးတဲ့ တဘက်ကို တစ်နေ့လျှော်ပေးတာ အကောင်းဆုံးပါပဲ။
(၄) ချိုင်းလိမ်းဆီ / ချွေးနံ့ပျောက်ဆေးသုံးပါ
Photo : Lavilin Australia
Gym မှာ ချွေးများများထွက်တဲ့ လှုပ်ရှားမှုတွေကို လုပ်မှာဖြစ်တဲ့အတွက် ချိုင်းလိမ်းဆီ / ချွေးနံ့ပျောက်ဆေးကတော့ မဖြစ်မနေ သုံးဖို့လိုပါတယ်။ အထူးသဖြင့် ချိုင်းဟာ အနံ့အသက်ဆိုးတွေကို ထွက်စေဆုံး နေရာတစ်ခု ဖြစ်ပါတယ်။ အလေးတွေ မ,တဲ့အခါ ၊ လက်မြှောက်လိုက်တိုင်းမှာ အနံ့ဆိုးတွေ မထွက်စေဖို့ လေ့ကျင့်ခန်း မလုပ်ခင် ကွီးတို့ရဲ့ ချိုင်းကို ချိုင်းလိမ်းဆီ ဒါမှမဟုတ် ချွေးနံ့ပျောက်ဆေး တစ်ခုခု သေချာပေါက် လိမ်းကိုလိမ်းပေးရပါမယ်။
Source : MensXP
Featured Photo : Core Culture
