ယနေ့ခေတ်က စမတ်ဖုန်းအသုံးများခြင်း၊ ကွန်ပျူတာဂိမ်းများဆော့ခြင်း၊ လက်တော့ပ်အသုံးများခြင်းတို့ကြောင့် အမြင်အာရုံအားနည်းလာသူတွေ တစ်စထက်တစ်စ များပြားလာပါတယ်။ ဒါပေမဲ့ စာဖတ်သူက ဒီဆောင်းပါးဖတ်နေရချိန်မှာ မျက်မှန်သမားတစ်ယောက်မဟုတ်ဘူးဆိုရင်တော့ ကံကောင်းတဲ့သူတစ်ယောက်ပါပဲ။

တကယ်လို့ မျက်မှန်သမားတစ်ယောက်ဆိုရင်လည်း အားမငယ်ပါနဲ့။ သင့်ရဲ့အမြင်အာရုံကို ပြန်လည်ကောင်းမွန်စေမယ့် အစားအစာလေးတွေ ရှိပါတယ်။ ထိုအစားအစာတွေကို များများစားပေးမယ်၊ မှန်မှန်စားပေးမယ်ဆိုရင်တော့ အမြင်အာရုံတွေ တဖြည်းဖြည်းကောင်းမွန်လာမှာပဲဖြစ်ပါတယ်။

ငရုတ်ပွအနီ

ငရုတ်ပွအနီမှာ ပါဝင်တဲ့ ဗီတာမင် စီဓာတ်က သင့်မျက်လုံး သွေးကြောလေးတွေအတွက် အထူးကောင်းမွန်ပါတယ်။ ငရုတ်ပွထဲမှာ ပါဝင်တဲ့ ဗီတာမင်ဓာတ်က ပန်းဂေါ်ဖီ၊ စတော်ဘယ်ရီ၊ သင်္ဘောသီးစတဲ့ သစ်သီးဝလံများမှာ တွေ့ရတဲ့ ဗီတာမင်ဓာတ်နဲ့ ထပ်တူကျပါတယ်။

နေကြာစေ့နဲ့ အခွံမာအသီးများ

နေကြာစေ့နဲ့ အခွံမာသီးများမှာပါဝင်တဲ့ ဗီတာမင် အီးဓာတ်က မျက်စိတိမ်စွဲခြင်းမှ ကာကွယ်ပေးပါတယ်။ ဗီတာမင် အီးဓာတ်ကြွယ်ဝတဲ့ အခြားအစားအစာများကတော့ မြေပဲ၊ မြေပဲအနှစ်နဲ့ သစ်အယ်သီးတို့ပဲဖြစ်ပါတယ်။

အစိမ်းရင့်ရောင် ဟင်းသီးဟင်းရွက်များ

ကိုက်လံ၊ ဟင်းနုနွယ်၊ ဂေါ်ဖီထုပ်စတဲ့ ဟင်းရွက်များက ဗီတာမင် စီနဲ့ ဗီတာမင်အီးဓာတ်များ ကြွယ်ဝတာကြောင့် မျက်စိတိမ်စွဲခြင်းမှ ကာကွယ်ပေးပါတယ်။

ဆော်လမွန်ငါး

Fatty အက်စစ်ဓာတ်ကြွယ်ဝတဲ့ ဆော်လမွန်ငါး၊ တူနာငါးနဲ့အခြားပင်လယ်စာများ စားသုံးခြင်းက သင့်မျက်လုံး နီမြန်းခြင်း၊ မျက်ခမ်းခြောက်ခြင်းတို့မှ ကာကွယ်ပေးပါတယ်။

ကန်စွန်းဥ

ကန်စွန်းဥ၊ မုန်လာဥနီ၊ သခွားမွှေး၊ သရက်သီးနဲ့ တရုတ်ဆီးသီးစတဲ့ လိမ္မော်ရောင်ရှိတဲ့ သစ်သီးနဲ့ ဟင်းသီးဟင်းရွက်တို့မှာ ဗီတာမင် အေ၊ ဗီတာမင် စီနဲ့ ဗီတာမင် အီးဓာတ်တို့ ကြွယ်ဝပြီး ထိုအစားအစာများကို စားသုံးပေးခြင်းက အမှောင်ထဲတွင် အမြင်အာရုံကို ချိန်ညှိပေးမှာဖြစ်ပြီး မျက်လုံးအားကောင်းစေမှာပါ။

ကြက်ဥ

လိမ္မော်ဝါရောင်ရှိတဲ့ ကြက်ဥအနှစ်က မျက်ကြည်လွှာကို ထိခိုက်စေတဲ့ အပြာရောင်အလင်းတန်းများကို တားဆီးပိတ်ပင်ပေးထားပါတယ်။ ဥအမျိုးမျိုးအပြင်၊ ကြက်သား၊ အမဲသား၊ ဝက်သားတို့ကလည်း သင့်မျက်ကြည်လွှာအတွက် စားသုံးသင့်တဲ့အစားအစာတွေပဲဖြစ်ပါတယ်။

Source: Webmd.com