စမတ်ဖုန်းတွေဟာ နေ့စဉ်ဘဝရဲ့အရေးကြီးအစိတ်အပိုင်းထဲမှာ မပါမဖြစ် ပါလာပါပြီ။ သွားလေရာ လာလေရာမှာ စမတ်ဖုန်းမပါလို့တောင် မဖြစ်တော့ပါဘူး။ ဒီလောက် ဘဝနဲ့ နစ်ဝင်လာတဲ့ စမတ်ဖုန်းတစ်လုံးကို အသုံးလျှော့ဖို့ဆိုတာ ဘာကြောင့်အရေးကြီးတာလဲဆိုတာကိုပါ ပြောပြချင်ပါတယ်။
(၁) မျက်လုံးထိခိုက်စေနိုင်တယ်
Photo: Freepik
မျက်လုံးဟာ လူ့ကိုယ်ပေါ်က အရေးကြီးဆုံးကိုယ်အင်္ဂါအစိတ်အပိုင်းထဲမှာ ပါပါတယ်။ စမတ်ဖုန်းတွေကြောင့် မျက်လုံးတွေ ထိခိုက်ပျက်စီးတယ်ဆိုတာ အားလုံးပဲ အသိဖြစ်ပါတယ်။ ဒါကြောင့် မျက်လုံးကျန်းမာချင်တယ်ဆိုရင် စမတ်ဖုန်း သုံးစွဲမှုကို မဖြစ်မနေ လျှော့ချရမှာပါ။
(၂) အိပ်စက်မှုကို ထိခိုက်စေပါတယ်
Photo: Freepik
LED screen တွေဟာ လူရဲ့ သဘာဝအလျောက် အိပ်စက်မှုစက်ကွင်းကို ဖျက်ဆီးနိုင်ပါတယ်။ Blue Light သက်ရောက်မှုဟာ ညဘက်အိပ်မပျော်မှုရဲ့ တရားခံထဲမှာ ပါပါတယ်။
(၃) ဘက်တီးရီးယားတွေ သယ်ဆောင်နိုင်တယ်
Photo: Freepik
ဖုန်းသုံးတဲ့ ကျွန်တော်တို့လက်တွေဟာ မမြင်ရတဲ့ ဘက်တီးရီးယားပိုးတွေ သယ်ဆောင်နေကြတာပါ။ သန့်ရှင်းရေး အားနည်းတဲ့ ဖုန်းတစ်လုံးကို နားနားကပ်ပြီး စကားပြောတာ ၊ ဖုန်းကိုင်ထားတဲ့ လက်နဲ့ မျက်စိတွေ ၊ နား ၊ နှာခေါင်းတွေကို နှိုက်တာဟာ ကျန်းမာရေးအန္တရာယ်ရှိပါတယ်။
(၄) လည်ဂုတ်ကျန်းမာရေး ထိခိုက်တယ်
Photo: Freepik
ဖုန်းအသုံးများတာ ၊ ဖုန်းနဲ့ ဂိမ်းကစားတာဟာ ကြာလာရင် လည်ပင်းနဲ့ ပုခုံးကျန်းမာရေး ချို့ယွင်းလာနိုင်ပါတယ်။ ဖုန်းသုံးနေချိန်မှာ ကျွန်တော်တို့ဟာ ခေါင်းကို ငိုက်စိုက်ချ သုံးနေတာ ဖြစ်လို့ ပေါင် ၆၀ လောက် လေးတဲ့ ဒဏ်ဟာ လည်ပင်းကို ထောက်ပံ့ထားတဲ့ ကျောရိုးမကြီး ဖိအားဖြစ်လာပြီး ပုခုံးနဲ့ လည်ပင်းမှာ ဒဏ်ဖြစ်လာတာပါ။
(၅) ယာဉ်အန္တရာယ် ဖြစ်နိုင်တယ်
Photo: Freepik
ဖုန်းသုံးစွဲမှု လွန်ကဲလာရင် စမတ်ဖုန်းကြောင့် မတော်တဆမှုတွေ အများကြီး ဖြစ််လာနိုင်ပါတယ်။ ကားနဲ့ သွားလာသူတွေဆိုရင် ဖုန်းကြောင့် ကားအက်ဆီးဒင့်ဖြစ်နိုင်ပါတယ်။ နောက်ဆုံး ဖုန်းသုံးရင်း လမ်းလျှောက်တာဟာလည်း အန္တရာယ်ကို ဖိတ်ခေါ်နေတာနဲ့ အတူတူပါပဲ။
(၆) စိတ်ဖိစီးမှု ပိုများလာမယ်
Photo: Freepik
ဆွီဒင်နိုင်ငံ ဂူတင်ဘာ့ဂ်တက္ကသိုလ်ရဲ့ လေ့လာမှုအရ စမတ်ဖုန်းသုံးစွဲမှုမြင့်ခြင်းဟာ အမျိုးသားနဲ့ အမျိုးသမီးတွေမှာ စိတ်ဓါတ်ကျဆင်းမှု ပိုတိုးလာခြင်းနဲ့ တိုက်ရိုက်ဆက်စပ်နေတယ်လို့ ဆိုပါတယ်။ စမတ်ဖုန်းကို စွဲစွဲလန်းလန်းသုံးလာသူတွေဟာ စိတ်ရှုပ်ထွေးခြင်း ၊ စိတ်ဓါတ်ကျခြင်း ၊ အိပ်မရခြင်း စတဲ့ ပြဿနာတွေ ဆက်တိုက် ကြုံလာနိုင်ပါတယ်။
