ကားမောင်းရတော့မယ်ဆိုရင် စိတ်ဖိစီးမှု မြင့်လာတတ်တဲ့သူတွေ ရှိမှာပါ။ ယာဉ်ကြောရှုပ်ထွေးနေတဲ့ လမ်းမတွေပေါ် ကားတက်မောင်းဖို့အတွက် စိတ်လှုပ်ရှားနေတာ ၊ကားမောင်းရင်ပဲ တစ်ခုခု ဖြစ်တော့မှာပဲ ဆိုပြီး ကြောက်နေတာကို Driving Anxiety လို့ ခေါ်ကြပါတယ်။ ဒီစိတ်ရှုပ်ထွေးမှုကို ရှင်းထုတ်လို့ရမယ့် နည်းလမ်းတချို့ လက်ဆင့်ကမ်းလိုပါတယ်။
(၁) ကားထဲမဝင်ခင် ကိုယ့်ကိုယ်ကိုယ် ဂရုစိုက်ပါ
Photo: Freepik
အရင်ဆုံး စိတ်ကို အေးချမ်းတည်ငြိမ်နေအောင် ထားဖို့ပါပဲ။ ဥပမာ ယောဂလေး ကစားတာပဲ ဖြစ်ဖြစ် ၊ အပြေးဝါသနာပါရင် အပြေးလေ့ကျင့်ခန်းလေး လုပ်လို့ပဲ ဖြစ်ဖြစ် တရားထိုင်တာပဲ ဖြစ်ဖြစ် နောက်ဆုံး ကိုယ်အကြိုက်ဆုံးသီချင်းလေး ဖွင့်ထားပြီး နားထောင်တာပဲ ဖြစ်ဖြစ်ပေါ့။ အေးချမ်းသွားတဲ့ ပတ်ဝန်းကျင်တစ်ခု ဖန်တီးခြင်းဟာ စိတ်ဖိစီးမှုကို လျှော့ချပေးနိုင်စွမ်းရှိပါတယ်။
(၂) ကြိုတင်စီစဉ်ထားပါ
Photo: Freepik
ကိုယ်နဲ့ မရင်းနှီးတဲ့ ပတ်ဝန်းကျင်ကို ကားမောင်းတော့မယ်ဆိုရင်လည်း Driving Anxiety ဝင်တတ်ပါတယ်။ ဒီလိုဆိုရင် အရင်ဆုံး Google Maps သုံးပြီး လမ်းကြောတွေနဲ့ ရင်းနှီးအောင် လုပ်ထားတာပဲ ဖြစ်ဖြစ် လမ်းကြောသိသူတစ်ဦးဦးရဲ့ အကူအညီတောင်းပြီးပဲ ဖြစ်ဖြစ် လုပ်သင့်ပါတယ်။ Plan ကျရင် စိတ်ချရပါတယ်။
(၃) ခဏခဏ ကားပတ်မောင်းကြည့်ပါ
Photo: Freepik
ကားနဲ့ ရင်းနှီးအောင် ကားကို ခဏခဏ မောင်းကြည့်ပေးဖို့ လိုပါတယ်။အနည်းဆုံး ကိုယ့်အနားတစ်ဝိုက်မှာ ရှိတဲ့ လမ်းကြောလေးတွေ မောင်းကြည့်တာမျိုး ဖြစ်ပါတယ်။ ပတ်ဝန်းကျင်နဲ့လည်း ရင်းနှီးကျွမ်းဝင်မှုရသလို ကားမောင်ရတာလည်း ပိုလို့ အဆင်ပြေ သက်တောင့်သက်သာ ရှိလာပါလိမ့်မယ်။ ကားမောင်းနေရင်းလည်း ကိုယ်နဲ့ ကားအကြား ရင်းနှီးမှုရဖို့ ပတ်ဝန်းကျင်ကောင်းတစ်ခု ဖန်တီးပါ။ ဥပမာ ကားထဲမှာ ကိုယ့်အနှစ်သက်ဆုံးရေမွှေးထားတာမျိုး ၊ ကိုယ့်အိပ်ခန်းထဲမှာ ထားတတ်တဲ့ အရုပ်မျိုးလေးတွေ ထားတာမျိုး ဖြစ်ပါတယ်။
