ဝိုင်မှာ ဘယ်အမြည်းနဲ့ သောက်မှ ဖြစ်မယ်ဆိုတဲ့ စည်းကမ်းမရှိပေမယ့် ဝိုင်တစ်ခွက်ကို အရသာရှိအောင် တွဲစားတဲ့ အမြည်းကလည်း အရွေးမှန်ဖို့ လိုပါတယ်။ ဝိုင်ရဲ့ သစ်သီးနံ့နဲ့ ချိုပြင်းချဉ်အရသာကို လျှာရင်းမြက်အောင် ထိန်းနိုင်တဲ့ အစားအသောက်ကလည်း ဝိုင်အမျိုးအစားပေါ် လိုက်ပြီး အပြောင်းအလဲရှိပါတယ်။ ဘယ်လို ဝိုင်အရက်က ဘယ်လိုအစားအသောက်နဲ့ လိုက်သလဲဆိုတာ အလွယ်တကူကြည့်နိုင်အောင် မျှဝေပေးလိုက်ပါတယ်။
(၁) Cabernet Sauvignon
Photo: dumblittleman
အမေရိကန်မှာ လူကြိုက်အများဆုံး ဝိုင်တွေထဲက တစ်ခုဖြစ်တဲ့ Cabernet Sauvignon ဟာ ချိစ်နဲ့ ပေါ့ပေါ့ပါးပါး မြည်းလို့လည်း ရသလို အသားငါး အသီးအရွက်တွေနဲ့လည်း တွဲစားလို့ ရပါတယ်။ အသီးအရွက်ထဲကဆို ခရမ်းချဉ်သီး ၊ ပန်းပွင့်စိမ်း ဘလက်ဘယ်ရီသီး ၊ ချိစ်နဲ့အစေ့အဆံထဲကဆိုရင် သီဟိုဠ်စေ့ ၊ အသားငါးထဲက ဆိုရင် အမဲစတူး ၊ နံရိုး ၊ ပင်လယ်စာထဲကဆိုရင် တူနာမီးကင် နဲ့ ဆော့စ်အတွက် ခရမ်းချဉ်သီးဆော့စ်တို့နဲ့ မြည်းလို့ ရပါတယ်။
(၂) Chardonnay
Photo: dumblittleman
ဝိုင်တွေထဲမှာ အနံ့ထူးခြားပြီး အစားအစာအမျိုးမျိုးနဲ့ တွဲဖက်နိုင်တဲ့ ဝိုင်ပါ။ အယ်လ်မွန်စေ့ ၊ အာလူး ၊ ပန်းသီး ၊ သရက်သီး ၊ ကြက်/ဝက်/ပုဇွန်/ဂဏန်း ဟင်းလျာတွေနဲ့ မြည်းနိုင်ပြီး ဆော့စ်အနေနဲ့ Cream/Pesto Sauce တို့ သုံးနိုင်ပါတယ်။
(၃) Riesling
Photo: bonappetit
အချိုကဲလွန်းတဲ့ ဝိုင်တွေထဲမှာ Riesling ဝိုင်ပါပါတယ်။ ချိုပြင်းရှအရသာ ဖြစ်လို့ ခပ်စပ်စပ်အစားအသောက်တွေနဲ့ ပိုပြီး မြည်းလို့ ကောင်းပါတယ်။ သစ်တော်သီး ၊ ဘဲ/ထရော့တ်ငါး/BBQ တွေနဲ့လိုက်ပါတယ်။
(၄) Pinot Noir
Photo: Obsession Wines
နာမည်ကျော် Pinot Noir ဟာ ထူးခြားတဲ့ သစ်နံ့ရှိပြီး အရသာကောင်းတဲ့ ဝိုင်ဖြစ်ပါတယ်။ များသောအားဖြင့် အသားဟင်းလျာတွေနဲ့ မြည်းတာကို ပိုအကြိုက်တွေ့ကြပါတယ်။ မှိုဟင်း ၊ သစ်သီးခြောက် ၊ စတော်ဘယ်ရီသီး ၊ ချိစ်/မြေပဲ/သိုးသား/ကြက်သား/ဆယ်လ်မွန်/တူနာ စတဲ့ အမြည်းတွေနဲ့ ဒီဝိုင်က ပိုပြီး ပဏာတင့်ပါတယ်။
(၅) Sauvignon Blanc
Photo: dumblittleman
Sauvignon Blanc ဝိုင်က အချဉ်ဓါတ်ပိုကဲတဲ့ ဝိုင်ဖြစ်ပြီး ပေါ့ပေါ့ပါးပါး ဟင်းလျာတွေနဲ့ တွဲသောက်လို့ ကောင်းပါတယ်။ ဒီဝိုင်ကို ညနေစာ စားချိန်မှာ သောက်လေ့ရှိတာကြောင့် Dinner Wine အဖြစ်လည်း နာမည်ကြီးပါတယ်။ ပန်းသီးစိမ်း နဲ့ အချဉ်ပါတဲ့ အသီးတွေ ၊ ကညွှတ်လို ဟင်းသီးဟင်းရွက်ဟင်းလျာနဲ့ ကြက်ဆင်သား/ဝက်သား/ကြက်သား/ကမာ/ပုဇွန်/ဆူရှီနဲ့ အဆီများတဲ့ ငါးတွေနဲ့လည်း တွဲဖက် မြည်းရတာ ပိုအဆင်ပြေပါတယ်။
