ယမကာချစ်သူတိုင်းအတွက် နိုင်ငံအလိုက် ထွက်ရှိတဲ့ ဝီစကီတွေ

ဂဲလစ်စကားအရ Whiskey ဆိုတာ အသက်ရေ Water Of Life လို့ အဓိပ္ပါယ်ရပါတယ်။ ဝီစကီလို့ ပြောကြရင် စကော့တွေကို အရင် ပြေးမြင်ကြပေမယ့် Scotch Whisky တွေပဲ နာမည်ကြီးတာ မဟုတ်ဘဲ နိုင်ငံအလိုက် ထွက်ရှိတဲ့ ဝီစကီအမျိုးအသားတွေလည်း အများကြီးပါပဲ။ ကမ္ဘာတစ်လွှားမှာ ဝီစကီအမျိုးမျိုး သောက်သုံးနေကြပြီး ဒီထဲကမှ ထင်ရှားကျော်ကြားတဲ့ ဝီစကီ ၅ မျိုးအကြောင်း မိတ်ဆက်ပေးချင်ပါတယ်။

(၁) Scotch

Photo: robbreport

Scotch ဝီစကီတွေဟာ နာမည်အတိုင်း စကော့တလန်က ထွက်ပါတယ်။ စကော့ဝီစကီတွေကို အခြေခံအားဖြင့် Single-Malt နဲ့ Blends ဆိုပြီး ခွဲပြောကြပါတယ်။ Single Malt တွေက ဘာလီစေ့နဲ့ပဲ စက်ရုံတစ်ရုံတည်းမှာ ထုတ်လုပ်ပြီး ဝက်သစ်ချစည်ထဲ အနည်းဆုံး ၃ နှစ် ထားပါတယ်။ Blends တွေကတော့ မုယောနဲ့ ဂျုံစတဲ့ အစေ့အဆံ နှစ်မျိုး သုံးမျိုးမက ရောထုတ်ထားတာပါ။ ပထမဆုံး Blended Whisky ကို ၁၈၆၀ ခုနှစ်က Green Stripe နာမည်နဲ့ ထုတ်ပါတယ်။ Malt နဲ့ Grain စေ့တဲ့ ရောစပ်ပြီး ထုတ်တာ ဖြစ်ပါတယ်။

(၂) Bourbon

Photo: thespruceeats

အမေရိကန်ဝီစကီတွေထဲမှာမှ လူကြိုက်အများဆုံး ဝီစကီက Bourbon ဝီစကီ ဖြစ်ပါတယ်။ Bourbon ဝီစကီတွေကတော့ အမေရိကန်တောင်ပိုင်းထွက် ဝီစကီတွေ ဖြစ်ပါတယ်။ အမေရိကန်မှာ ထုတ်မှ Bourbon လို့ ခေါ်ပြီး Bourbon မှာ အနည်းဆုံး ပြောင်းဖူး ၅၁% နဲ့ ချက်လုပ်ပြီး ဝက်သစ်ချစည်သစ်မှာ အနည်းဆုံး ၂ နှစ်ကျော် သိုလှောင်ထားရပါတယ်။ ကစော်ဖောက်ဖို့ သုံးတဲ့ အစေ့အဆံနဲ့ ထည့်တဲ့စည်ပေါ်လိုက်ပြီးမှ ဝီစကီအမျိုးအစား ထပ်ကွဲသွားတာပါ။

(၃) Irish Whiskey

Photo: Fortune

Irish Whiskey တွေဟာ အိုင်ယာလန်မှာ ထုတ်လုပ်တဲ့ ဝီစကီဖြစ်ပြီး စကော့တလန်က Single-Malt တွေလိုပဲ ချက်လုပ်တာ ဖြစ်ပါတယ်။ Scotch တွေက အညှောင့်ဖောက်ထားတဲ့ ဘာလီတစ်မျိုးတည်း သုံးပေမယ့် Irish Whiskey တွေက အညှောင့်မဖောက်ထားတဲ့ ဘာလီနဲ့ အညှောင့်ဖောက်ထားတဲ့ ဘာီတွေပါ ရောသုံးပါတယ်။ ဒါကြောင့် ဘာလီနံ့သင်းပျံ့တာက ထူးခြားမှု ဖြစ်စေပြီး ကမ္ဘာ့ဝီစကီလောကမှာ အဝင်ညက်ညောလို့ နာမည်ကြီးပါတယ်။

(၄) Canadian Whiskey

Photo: Whisky Advocate

ကနေဒါနိုင်ငံထုတ် Canadian Whiskey တွေကို ရိုင်းဝီစကီတွေလို့လည်း ခေါ်ကြပါတယ်။ တကယ်တမ်းတော့ ရိုင်းဂျုံပမာဏ နည်းနည်းပဲ သုံးထားပြီး ပြောင်းဖူး ၊ ဂျုံစတဲ့ အစေ့အဆံတွေကို အများဆုံး သုံးထားတာပါ။ Canadian Whiskey တွေကို သစ်သားစည်ငယ်ထဲမှာ ၃ နှစ်ထက် မပိုအောင် သိုလှောင်ထားတတ်ကြပါတယ်။ Canadian Whiskey တွေက တခြား ဝီစကီအမျိုးအစားတွေလောက် အနံ့သိပ်မပြင်းဘဲ ချိုမြမြအရသာပေးပါတယ်။

(၅) Japanese Whisky

Photo: hearstapps

ယမကာနဲ့ ပတ်သက်လာရင် ဂျပန်နိုင်ငံက ဆာကေးလို ဆန်အရက်လောက် နာမည်ကြီးတာမဟတု်ပါဘူး။ ဂျပန်ဝီစကီတွေကလည်း ကမ္ဘာ့ဈေးကွက်မှာ မျက်နှာပန်းလှနေပါတယ်။ တကယ်တော့ ဂျပန်ဝီစကီထုတ်လုပ်မှုကလည်း Scotch နဲ့ အတော်လေး ဆင်ပါတယ်။ ထူးခြားတာက ဂျပန်မှာပဲ ပေါက်ရောက်တဲ့ Mizunara ဝက်သစ်ချသားနံ့ ပါရှိတာ ဖြစ်ပါတယ်။ ဂျပန်ဝီစကီတွေ သစ်သီးနံ့ ၊ ပန်းနံ့သင်းပြီး တမူထူးခြားတဲ့ ခံစားမှုကို ပေးစွမ်းနိုင်ပါတယ်။