ကျွန်တော်တို့အားလုံးမှာ တိုးတက်ရေးလမ်းပိတ်အောင် လုပ်နေမိတဲ့ အကျင့်ဆိုးတချို့ ရှိကြစမြဲပါ။ အကျင့်ဆိုးတွေဆိုတာ နေရာတကာမှာ ရှိနိုင်တာ ဖြစ်လို့ အလုပ်ခွင်မှာလည်း ဒီအတိုင်းပါပဲ။ အလုပ်ခွင်မှာ လုပ်နေမိတတ်တဲ့ အကျင့်ဆိုးတွေ အများကြီး ရှိတဲ့အထဲက ယေဘုယျအကျဆုံးအကျင့်ဆုံး ၃ မျိုးနဲ့ ဒီအကျင့်ဆိုးတွေကို ဘယ်လို ဖျောက်ဖျက်ရမလဲဆိုတဲ့အပေါ် မျှဝေပေးချင်ပါတယ်။
(၁) အလုပ်နောက်ကျခြင်း
Photo: Freepik
မနက်ဆို ရုံးတက်နောက်ကျတာ ၊ အလုပ်တွေ Deadlines ကပ်ခါမှ အပြေးအလွှား တွန်းလုပ်တာမျိုးက အကျင့်ဆိုးပါပဲ။ အချိန်ရွှေ့ဆိုင်းခြင်းဟာ အချိန်ကို မလေးစားခြင်းပဲ ဖြစ်ပါတယ်။ ရေရှည်မှာ ကိုယ့်ဘဝတက်လမ်းကိုပါ ထိခိုက်နိုင်ပါတယ်။
ဒီအကျင့်ကို ပြောင်းနိုင်ဖို့ အလုပ်နဲ့မဆိုင်တဲ့ ဖုန်းခေါ်ဆိုမှုတွေ လုပ်တာ ၊ Break Time ကြာကြာယူတာတွေ လျှော့ပါ။ အလုပ်ကို လေးလေးစားစား လုပ်ပါ။
(၂) အလုပ်မှာ ခေါင်းရှောင်ခြင်း
Photo: Freepik
ဟိုဟာမလုပ်ချင်ဘူး ဒီဟာမလုပ်ချင်ဘူးဆိုပြီး အလုပ်မှာ ခေါင်းသိပ်ရှောင်လွန်းရင် အရင်ဆုံး အလုပ်က အထုတ်ခံရမယ့်သူက ကိုယ်ဖြစ်သွားနိုင်ပါတယ်။ ဒီအလုပ်မှာ အလုပ်တာဝန်ဝတ္တရားတွေကို ကျေပွန်လိမ့်မယ်ဆိုပြီး မျှော်လင့်ထားတဲ့ အလုပ်ခန့်သူကိုပါ တနည်းနည်းနဲ့ စော်ကားလိုက်တာပါပဲ။
အလုပ်မှာ အဆင်မပြေရင် ထွက်လို့ ရပါတယ်။ အသစ်ရှာလို့ ရပါတယ်။ ဒါပေမယ့် ဘယ်အလုပ်ပဲ လုပ်လုပ် ကိုယ့်အလုပ်ကို ရိုသေဖို့ လိုပါတယ်။ အလုပ်ကို တလေးတစား စေတနာအပြည့်နဲ့ လုပ်ပါ။ ဘယ်လိုအခြေအနေပဲ ဖြစ်ဖြစ် လုပ်ငန်းခွင်ကျင့်ဝတ်နဲ့ ပရော်ဖက်ရှင်နယ် ပီသမှုကို ထိန်းသိမ်းထားဖို့ တိုက်တွန်းချင်ပါတယ်။
(၃) အတင်းပြောခြင်း
Photo; Freepik
လုပ်ငန်းခွင်ဆိုတာ လောကအငယ်စားတစ်မျိုး ဖြစ်ပါတယ်။ သင့်အိမ်နီးနားချင်းကို သဘောမကျခွင့်ရှိပါတယ်။ ဒါပေမယ့် မကောင်းအတင်းပြောတာမျိုးကတော့ မလုပ်ထိုက်တဲ့အရာ ဖြစ်ပါတယ်။ အလုပ်ထဲမှာဆိုရင် အချင်းချင်း အတင်းပြောခြင်းမျိုးက မကောင်းမှုလို ရှောင်ကြဉ်ရမယ့်အရာပါ။
ကိုယ်အတင်းပြောထားတဲ့ လူတစ်ယောက်ကို ရိုးရိုးသားသား ဆက်ဆံဖို့ဆိုတာ ဘယ်လိုမှ မဖြစ်နိုင်ပါဘူး။ လုပ်ဖော်ကိုင်ဖက်တွေအကြားမှာ ကြုံလာတဲ့အဖုအထစ်ကို နောက်ကွယ်မှာ အတင်းပြောမယ့်အစား ရိုးရိုးသားသား တည့်ဖြေရှင်းလိုက်တာ ပိုကောင်းပါတယ်။ ပွင့်လင်းရိုးစင်းမှုဟာ မရိုးဖြောင့်ကွေ့ကောက်မှုထက်တော့ အလုပ်ဖြစ်ပါလိမ့်မယ်။
