ပရော်ဖက်ရှင်နယ် တိုက်ခိုက်ရေးသမားတွေ မဟုတ်ပေမယ့် စင်ပေါ်မှာ ယှဉ်ပြိုင်ထိုးသတ်ဖို့ သဘောတူလိုက်တဲ့ နည်းပညာနယ်ပယ်ထဲက အကျော်ကြားဆုံး ဘီလီယံနာကြီး နှစ်ဦးရဲ့တွဲဆိုင်းကတော့ တော်တော်လေးကို စိတ်ဝင်စားစရာ ကောင်းနေပါတယ်။ SpaceX နဲ့ Tesla ကားကုမ္ပဏီပိုင်ရှင် သူဌေးကြီး Elon Musk က Meta ရဲ့ CEO Mark Zuckerberg ကို Cage Fight ထိုးသတ်ဖို့ သူပိုင်တဲ့ Twitter လူမှုကွန်ယက်ကနေတဆင့် စိန်ခေါ်ရေးသားလိုက်တာပါ။

Photo : BBC

တိုက်ခိုက်ရေး အားကစားနည်းတွေနဲ့ သိပ်မစိမ်းလှတဲ့ Zuckerberg ကလည်း Musk ရဲ့ စိန်ခေါ်မှုအပေါ် ” နေရာသာ ပြောလိုက်” ဆိုတဲ့စာသားအတူနဲ့ Screenshot ကြီးတွဲတင်ပြီး ပြန်လည်ချေပခဲ့ပါတယ်။

အဲ့ဒီနောက်မှာတော့ Zuckerberg ရဲ့ချေပမှုကို Elon Musk က “Vegas Octagon”လို့ တုန့်ပြန်လိုက်ပြီး အကယ်၍ သူတို့နှစ်ဦးသား အမှန်တကယ် ထိုးသတ်ဖြစ်ခဲ့မယ်ဆိုရင် အမေရိကန်နိုင်ငံ ၊ နီဗားဒါးပြည်နယ် ၊ လာ့စ်ဗီးဂတ်စ်မှာ ရှိတဲ့ Ultimate Fighting Championship (UFC) ပြိုင်ပွဲတွေကျင်းပရာ သံဇကာခတ် Cage စင်ကြီးထဲမှာ ယှဉ်ပြိုင်ထိုးသတ်သွားကြမှာ ဖြစ်ပါတယ်။

Photo : New York Post

နည်းပညာနယ်ပယ်မှာ ပခုံးချင်းယှဉ်ပြိုင်နေဆဲဖြစ်တဲ့ သူတို့နှစ်ဦးသာ အမှန်တကယ်ထိုးသတ် ဖြစ်ခဲ့မယ်ဆိုရင်တော့ တော်တော်ကြီးကို ကြည့်ကောင်းတဲ့ ပွဲတစ်ပွဲဖြစ်လာမှာ သေချာပါတယ်။ ဆိုရှယ်မီဒီယာပေါ်တွေမှာလည်း သူတို့နှစ်ဦး စိန်ခေါ်ထိုးသတ်မယ့် ပွဲအကြောင်းက လုံးဝကို ဟိုးလေးတကျော်ကျော် ဖြစ်နေပြီး ဘယ်သူအနိုင်ရမလဲဆိုတဲ့ ငြင်းခုံသံတွေ ကျယ်ကျယ်လောင်လောင် ထွက်ပေါ်နေသလို သူတို့နှစ်ဦးရဲ့ ရယ်စရာ ပိုစတာတွေ ၊ Memes ပုံတွေလည်း ပလူပြန်အောင် တင်နေကြပါတယ်။

Elon Musk နဲ့ Zuckerberg တို့ရဲ့ ဝိတ်တန်းအနေအထားကို ချိန်ဆကြည့်တဲ့အခါ Elon Musk က Zuckerberg ထက် ဘော်ဒီပိုတောင့်ပြီး အရပ်အားဖြင့်လည်း ၆ ပေစွန်းစွန်းမှာ ရှိနေပါတယ်။ Zuckerberg ကတော့ အရပ် ၅ပေ ၇ လက်မ ဝန်းကျင်မှာသာရှိပြီး လူကောင်ကလည်း Musk နဲ့ ယှဉ်ရင်တော့ ပိုသေးပါတယ်။

ဝိတ်တန်းနဲ့ အရပ် အနေအထားအရ ကွာဟနေတယ်ဆိုပေမယ့် အသက် ၃၉ နှစ်သာရှိသေးတဲ့ Zuckerberg က Elon Musk ထက်စာရင် အသက် ၁၂ နှစ်ကျော် ပိုငယ်တာကြောင့် သက်လုံပိုင်းမှာ အားသာချက်ရှိနေတာက တစ်ကြောင်း ၊ ဘက်စုံကိုယ်ခံပညာ Mixed Martial Arts (MMA) ကို လေ့ကျင့်ထားပြီး မကြာသေးကလည်း Brazilian Jiu-jitsu ပြိုင်ပွဲတွေမှာ အနိုင်ရထားဖူးတဲ့ ပြိုင်ပွဲအတွေ့အကြုံတွေ ရှိနေတာက တစ်ကြောင်းဆိုတော့ Zuckerberg ကလည်း ခေသူတစ်ယောက်တော့ မဟုတ်ဘူးလို့ ပြောရမှာပါ။ ကလေးထိန်းတာကလွဲရင် အားကစားမလုပ်ဖြစ်ဘူးလို့ ဝန်ခံထားဖူးတဲ့ Elon Musk အတွက် Zuckerberg ဟာ တကယ်ကိုပဲ ခက်ခဲတဲ့ တိုက်ခိုက်ရေး ပြိုင်ဘက်တစ်ယောက် ဖြစ်နေမှာ သေချာပါတယ်။

Photo : Evening Standard

ဒါပေမယ့်လည်း Elon Musk ရဲ့နောက်ကြောင်းကို တစ်ချက်လေးပြန်ကြည့်မယ်ဆိုရင် လူမှုကွန်ယက် စာမျက်နှာပေါ်မှာ သူရေးသားခဲ့တဲ့ ကြေငြာချက်တွေထဲမှာ အမှန်တကယ်လက်တွေ့ ဖြစ်မလာခဲ့တဲ့ ရာဇဝင်တွေ ရှိနေခဲ့ဖူးပါတယ်။ ဒီတစ်ကြိမ်မှာရော လူမှုကွန်ယက်ပေါ်မှာ အပျော်သဘောသပ်သပ် ပရိသတ် စိတ်ဝင်စားမှုရအောင် Attention ရှာတာလား ၊ အမှန်တကယ်ပဲ Cage စင်ကြီးထဲမှာ နည်းပညာ ဘီလီယံနာနှစ်ယောက် ယှဉ်ပြိုင်ထိုးသတ်သွားကြမလား ဆိုတာတော့ ဆက်လက်စောင့်ကြည့် ရဦးမှာပါ။

ဒီနှစ်ယောက် အမှန်တကယ် ထိုးသတ်ဖြစ်ခဲ့ရင် Zuckerberg ကပဲ Elon Musk ကို အမှောက်သိပ်မလား ? Elon Musk ကပဲ Zuckerberg ကို အလဲထိုးနိုင်မလား ? ကွီးတို့ရဲ့ သုံးသပ်ချက် အမြင်လေးတွေကိုလည်း ကွန်းမန့်မှာ မျှဝေပေးခဲ့ပါဦး။

Featured Photo : MarketWatch