ကိုယ်စိတ်ဝင်စားတဲ့ ကောင်မလေးကို ချစ်ကြောင်း ကြိုက်ကြောင်းပြောပြီးသွားတဲ့အခါ ကောင်မလေးကလည်း သင့်ကို စိတ်ဝင်စားတယ်ဆိုရင် အချိန်ယူစဉ်းစားပါလိမ့်မယ်။ သင်က သူ့စိတ်ကူးထဲက မင်းသားလေးဆိုရင် သင့်ကို ချစ်ပါတယ်ဆိုတဲ့ အဖြေပြန်ပေးပြီးသွားရင် သင်တို့နှစ်ယောက်က တစ်ယောက်နဲ့တစ်ယောက် သက်ဆိုင်မှုရှိသွားတဲ့ ချစ်သူဘဝ ရောက်ရှိသွားပါပြီ။
ဒီလိုကောင်မလေးတစ်ယောက်နဲ့ ချစ်ကြိုက်နေပြီဆိုရင်လည်း ယောကျာ်းကောင်း ယောကျာ်းမြတ်တို့ ထိန်းသိမ်းစောင့်ရှောက်အပ်တဲ့ ကိုယ်ကျင့်တရားတွေကို ထိန်းသိမ်းရမှာပဲဖြစ်ပါတယ်။ ဒါမှလည်း သင့်ကောင်မလေးရဲ့ လေးစားမှု ချစ်မြတ်နိုးမှုကို ရရှိမှာပဲဖြစ်ပါတယ်။
တခြားကောင်မလေးတွနဲ့ အီစီကလီဇာတ်လမ်းတွေကို ရပ်လိုက်ပါတော့
Source: Shutterstock
သင် ရည်းစားမရသေးခင် အချိန်မှာတော့ ချောသမျှ လှသမျှကောင်မလေးတိုင်းကို လိုက်ပိုးပန်းခွင့်ရှိပါတယ်။ ဒါပေမဲ့ ကိုယ်က ရည်းစားရသွားပြီဆိုရင် ဒီတစ်ယောက်တည်းအပေါ်မှာပဲ သစ္စာစောင့်သိရပါတော့မယ်။ သစ္စာမစောင့်သိဘဲ မျက်နှာများနေမယ်ဆိုရင်တော့ ခြံခုန်တတ်တဲ့သူအဖြစ် အမည်တပ်ခံရမှာပဲဖြစ်ပါတယ်။ အခုခေတ်မှာက စနိုက်ကြော်မလေးတွေ၊ ခြံခုန်တွေ ခေတ်စားနေတဲ့ခေတ်ပါ။
ဖုန်းအသုံးပြုပြီး ကိုယ့်ရဲ့အချစ်တွေကို ခိုင်မြဲအောင် ကြိုးစားပါ
Source: Shutterstock
သင် သူမကို ပိုးပန်းတုန်းက နေ့မအား ညမနား ဖုန်းဆက်လိုက် မက်ဆေ့ချ်ပို့လိုက်နဲ့ အားကြိုးမာန်တက်လိုက်ပိုးပန်းနေမှာပါနော်။ သမီးရည်းစားဖြစ်သွားပြီဆိုတာနဲ့ ထိုအကျင့်လေးတွေကို လုပ်စရာမလိုတော့ဘူးလို့ မထင်လိုက်ပါနဲ့။ တစ်ယောက်ကိုတစ်ယောက် ကြင်နာပြရမယ်၊ ဂရုစိုက်ပြရပါမယ်။ ဒါမှ သင်တို့နှစ်ယောက်ရဲ့အချစ်က ရေရှည်တည်တံ့ခိုင်မြဲပြီး နှစ်ယောက်တစ်ဘဝအဖြစ် ရွှေလက်တွဲနိုင်မှာပဲဖြစ်ပါတယ်။
စည်းကမ်းချက်တွေ သတ်မှတ်ထားပါ
Source: Fashionbeans
စည်းကမ်းချက်တွေ သတ်မှတ်ခိုင်းတာက တစ်ယောက်ကိုတစ်ယောက် ချုပ်ခြယ်ခိုင်းတာလည်း မဟုတ်သလို ဇီဇာကြောင်ရမယ်လို့လည်း ဆိုလိုတာမဟုတ်ပါဘူး။ သင်တို့နှစ်ယောက် ချစ်ကြိုက်နေတဲ့ကာလအတွင်း တစ်ယောက်ရဲ့မကောင်းတဲ့အလေ့အကျင့်တွေကို အခြားတစ်ယောက်က တဖြည်းဖြည်းနဲ့ သိရှိလာမှာပါ။ တကယ်ချစ်ရိုးမှန်ရင် ထိုအကျင့်ဆိုးတွေကို တတ်နိုင်သမျှပြင်နိုင်အောင် နောက်ထပ်မကျူးလွန်မိအောင် မိမိကိုယ်ကို စည်းကမ်းချထားပါ။
တစ်ယောက်အပေါ် တစ်ယောက် ရိုးသားပွင့်လင်းမှုရှိပါ
Source: Fashionbeans.com
သမီးရည်းစားဆက်ဆံရေးမှာ တစ်ယောက်ပေါ် တစ်ယောက် ယုံကြည်မှု၊ နားလည်မှုနဲ့ ရိုးသားမှုတို့က အရေးကြီးဆုံးပဲဖြစ်ပါတယ်။ ပွင့်လင်းမှုမရှိဘဲ မြုံစိစိလုပ်နေခြင်းက အချစ်တွေ ခိုင်မြဲဖို့အတွက် အနှောင့်အယှက်တစ်ခုပါပဲ။
ပြင်ပအလှအပပေါ်မှာ တွယ်ငြိမနေပါနဲ့
Source: Shutterstock
လောကမှာ ပန်းလှလှလေးတွေ အများကြီးပဲရှိပါတယ်။ ဒါပေမဲ့ သင်က ချစ်လွန်းကြိုက်လွန်းလို့ ပန်းပွင့်လေးတစ်ပွင့်ကို ဆွတ်ခူးလိုက်ပါပြီ။ ထိုပန်းလေး ဒီထက်လှလှပပနဲ့ ပွင့်လန်းဖို့အတွက်က သင့်တာဝန်ဖြစ်သွားပါပြီ။ ဒီလိုမှ မဟုတ်ပါပဲနဲ့ ခူးဆွတ်ပြီးသွားကာမှ အခြားပန်းတွေက ပိုလှတယ်ဆိုပြီး ကိုယ် ခူးထားတဲ့ ပန်းကို ပစ်စလက်ခတ် ပစ်ထားမယ်ဆိုရင် ထိုပန်းလေးက အပူရှိန်ကြောင့် အလျင်အမြန်နွမ်းသွားပါလိမ့်မယ်။
ထိုနည်းတူပါပဲ သင် ချစ်လို့ ပိုးပန်းထားတဲ့ ကောင်မလေးကို ချစ်သူဖြစ်သွားတဲ့အခါ သင့်ချစ်သူကောင်မလေး စိတ်မညစ်ရအောင် စိတ်မဆင်းရဲရအောင် ပျော်ရွှင်အောင်ထားရမှာ သင့်ရဲ့တာဝန်တစ်စိတ်တစ်ပိုင်းဖြစ်သွားပါပြီ။ တကယ်တော့ လောကမှ ရုပ်အလှထက် စိတ်အလှကသာ အရေးကြီးတာပါ။ အလှအပဆိုတာ အသက်ကြီးလာတဲ့အချိန်မှာ တဖြည်းဖြည်းကွယ်ပျောက်ပျက်စီးသွားမှာပါ။ ဒါပေမဲ့ စိတ်အလှကတော့ ရေရှည်တည်တံ့ခိုင်မြဲနေမယ့် အရာတစ်ခုပါ။
သပ်သပ်ရပ်ရပ် ဝတ်စားဆင်ယင်ပါ
Source: Fashionbeans
ကိုယ်က ကောင်မလေးရသွားပြီဆိုပြီး အပြင်သွားတဲ့အခါ ဖိုသီဖတ်သီနဲ့ ဖြစ်သလိုဝတ်သွားလို့ မရပါဘူး။ လူတော်တော်များများက ဒီအမှားက ကျူးလွန်မိကြပါတယ်။ သပ်သပ်ရပ်ရပ် ခန့်ခန့်ညားညားဝတ်စားဆင်ယင်တတ်ခြင်းက သင့်ရဲ့သွင်ပြင်ကို စတိုင်လ်ကျစေသလို မျက်နှာပွင့်စေမှာပဲဖြစ်ပါတယ်။ ဒါ့အပြင် သင်နဲ့ တွဲသွားတွဲလာလုပ်နေတဲ့ သင့်ကောင်မလေးအတွက်လည်း သူ့ချစ်သူက စတိုင်လ်ကျပါလားဆိုပြီး မျက်နှာပွင့်လန်းရမှာပဲဖြစ်ပါတယ်။
