အကုန်အကျ အနည်းဆုံးနဲ့ ကျန်းမာရေးအတွက် အကျိုးကျေးဇူးများတဲ့ ကိုယ်လက်လေ့ကျင့်ခန်းတွေထဲမှာ ဒိုက်ထိုးခြင်းလည်း ပါဝင်ပါတယ်။ နေ့တိုင်းနီးပါး ဒိုက်ထိုးဖြစ်သူတွေဟာရင်ဘတ်ကြွက်သားအားကောင်းပြီး ဗိုက်အဆီကျတာ မြန်ပါတယ်။ ဇီဝဖြစ်စဉ်လည်း ပိုပြီး ကောင်းစေလို့ ဒိုက်ထိုးတဲ့ အလေ့အကျင့်ရှိတာ ကောင်းပါတယ်။ ဒါပေမယ့်လည်း နည်းစနစ်မှန်ကန်မှု မရှိရင်တော့ ကြိုးစားသလောက် ထိရောက်မှု ရှိမှာ မဟုတ်ပါဘူး။
Photo: Australian Fitness Academy
ဒိုက်ထိုးတာနဲ့ ပတ်သက်ပြီး သိထားသင့်တဲ့ အချက်တွေထဲမှာ အရေးကြီးဆုံးက အသက်ရှု/ထုတ်တဲ့ ပုံစံပါပဲ။ Push ups လုပ်သူတိုင်းဟာ အသက်ရှု/ထုတ်တာကို အဆင်ပြေသလိုပဲ ရှုသွင်း/ရှုထုတ်လုပ်နေကြတာ များပါတယ်။ ဒါကြောင့် ထိရောက်သင့်သလောက်လည်း မထိရောက်တာတွေ ရှိနေပါတယ်။
နာမည်ကြီး Fitness Coach တစ်ဦးဖြစ်တဲ့ ပီတာအို ရယ်လီက ဒီမှားတတ်တဲ့ အမှားကို သူ့ Instagram ကနေ ထောက်ပြထားပါတယ်။ “မှန်ကန်တဲ့ အသက်ရှုထုတ်နည်းဆိုတာ သင်အားစိုက်မှု အများဆုံး လုပ်နေချိန်မှာ လုပ်ပေးဖို့ လိုပါတယ်။ Push-up လုပ်တဲ့အခါ ခန္ဓာကိုယ်ကို အောက်နှိမ့်ချိန်မှာ လေကို ရှုသွင်းပြီး ပြန်တင်တဲ့အချိန် ရှုထုတ်ပေးရတာပါ” လို့ ပီတာအို ရယ်လီက ဆိုပါတယ်။
နောက်တစ်ခုက ခန္ဓာကိုယ်အနေအထားပါ။ မှန်ကန်တဲ့ ဒိုက်ထိုးနည်းအနေအထားမှာ ခန္ဓာကိုယ်ဟာ တစ်ဖြောင့်တည်း ရှိနေဖို့ လိုပါတယ်။ ကိုယ်ခန္ဓာ တည်ငြိမ်ပြီး မှန်ကန်တဲ့ အနေအထားရဖို့ ကျောနဲ့ ပေါင်၊ တင်ပါး ကြွက်သားတွေ တောင့်ထားမှာပါ။ လက်ကို ပုခုံအကျယ်ထက် နည်းနည်းလေး ချဲပြီး ဒိုက်ထိုးရတာ ဖြစ်ပါတယ်။
Photo: Quora
Push-up အောက်ခြေမှာ လက်တံတောင်ဟာ ၉၀ ဒီဂရီ ထောင့်မှန်ကွေးသင့်ပြီးမှ မူလအနေအထားကို ပြန်သွားရမှာပါ။ Push-up ပြန်အတင်မှာ အသက်အောင့်မထားသင့်ပါဘူး။ ဒီလို ဒိုက်ထိုးမယ်ဆိုရင် ကြွက်သားတွေမှာ အောက်ဆီဂျင် ပိုရပြီး ပင်ပန်းမှုလည်း လျော့နည်းစေမှာ ဖြစ်ပါတယ်။
