ကော်ဖီသည် ကမ္ဘာပေါ်တွင် လူကြိုက်အများဆုံး ဖျော်ရည်တစ်ခုဖြစ်ပြီး သူ့မှာပါဝင်တဲ့ Antioxidants များ အာဟာရဓာတ်များကြောင့် ကျန်းမာရေးအတွက် များစွာအကျိုးပြုနိုင်ပါတယ်။ လေ့လာတွေ့ရှိချက်များအရ ကော်ဖီသောက်သုံးခြင်းကြောင့် ရောဂါဘယများ ခံစားရခြင်းကို လျော့ပါးသက်သာစေတယ်လို့ သိရှိရပါတယ်။
ကော်ဖီသောက်သုံးခြင်းကြောင့် ခံစားရရှိမယ့် အကျိုးကျေးဇူးများကတော့ …
စွမ်းအင်တိုးမြှင့်စေခြင်း
ကော်ဖီထဲမှာပါဝင်တဲ့ ကာဖိန်းဓာတ်ကြောင့် စွမ်းအင်များကို တိုးမြှင့်စေပြီး ပင်ပန်းနွမ်းနယ်မှုကို ပြေလျော့စေပါတယ်။ လေ့လာတွေ့ရှိချက်များအရ ကော်ဖီသောက်သုံးခြင်းက ဦးနှောက်စွမ်းဆောင်ရည်ကို မြင့်မားစေပြီး စိတ်ခံစားချက်များကို ကောင်းမွန်စေတယ်လို့ သိရှိရပါတယ်။
အဆီပိုများကို လောင်ကျွမ်းစေခြင်း
ကာဖိန်းဓာတ်က အဆီပိုများကို လောင်ကျွမ်းစေပြီး ဝိတ်ချရာမှာ အကူအညီဖြစ်စေနိုင်တယ်လို့ လေ့လာချက်များအရ သိရှိရပါတယ်။ အခြားသော လေ့လာချက်တစ်ခုအရ အဝလွန်သူများအတွက် ကော်ဖီသောက်သုံးခြင်းသည် အဆီပိုလောင်ကျွမ်းမှုကို ၁၀ ရာခိုင်နှုန်းခန့် ပိုမိုမြန်ဆန်စေတယ်လို့ သိရှိရပါတယ်။
ကာယလေ့ကျင့်ခန်းများ၊ ကာယလုပ်ငန်းများကို များများပြုလုပ်နိုင်ခြင်း
ကာဖိန်းဓာတ်က အဆီပိုများကို ဖြိုကွဲပြီး လောင်စာအဖြစ် သုံးစွဲနိုင်အောင် ကူညီပေးတာကြောင့် အားကစားပြုလုပ်မယ့်သူများနှင့် ကာယလုပ်ငန်းများ မပြုလုပ်ခင်မှာ မိနစ် ၃၀ ခန့် ကြိုတင်သောက်သုံးပေးခြင်းက သင့်ရဲ့ကာယစွမ်းဆောင်ရည်ကို တိုးမြှင့်စေပါလိမ့်မယ်။
အသည်းကျန်းမာရေးအတွက် ကောင်းမွန်စေခြင်း
သင့်အသည်းသည် ခန္ဓာကိုယ်အတွက် မရှိမဖြစ်အရေးပါသော အင်္ဂါအစိတ်အပိုင်းတစ်ခုဖြစ်ပြီး အသည်းအဆီဖုံးခြင်းနှင့် အသည်းရောဂါများမှ ကာကွယ်ရန် အထူးအရေးကြီးပါတယ်။ ကော်ဖီကို တစ်နေ့လျှင် ၄ ခွက်နှင့် အထက် သောက်သုံးသူများသည် အသည်းရောဂါ ခံစားရခြင်းမှ ၈၀ ရာခိုင်နှုန်းခန့် ကြိုတင်ကာကွယ်နိုင်ပါတယ်။
စိတ်ကျရောဂါကို တိုက်ဖျက်ပေးနိုင်ခြင်း
စိတ်ဖိစီးမှုနှင့် စိတ်ကျရောဂါမှ ကာကွယ်ဖို့ရန်အတွက်လည်း ကော်ဖီက ကူညီနိုင်ပါသေးတယ်။ လူသားတိုင်း စိတ်ကျန်းမာနေမှ စိတ်သွားတိုင်း ကိုယ်ပါပြီး လုပ်ငန်းဆောင်တာများကို အကောင်းဆုံးလုပ်ဆောင်နိုင်မှာဖြစ်ပါတယ်။ လေ့လာချက်တစ်ခုအရ ကော်ဖီကို တစ်နေ့လျှင် ၄ ခွက်နှင့်အထက် သောက်သုံးသူများသည် မိမိကိုယ်ကို သတ်သေခြင်းမှ ၅၃ ရာခိုင်နှုန်းခန့် တားဆီးပေးနိုင်တယ်လို့ သိရှိရပါတယ်။
Photo Source: Freepik.com
Source: Brightside.me
