ပရိုတိန်းလို ပြောလိုက်ရင် အားကစားသမားတိုင်းနဲ့ ရင်းနှီးပြီးသားပါ။ ကြွက်သားတည်ဆောက်ဖို့ နဲ့ ဝိတ်ချဖို့အတွက် ပရိုတိန်းဟာ သိပ်အရေးပါပါတယ်။ ပရိုတိန်းဟာ ဇီဝပြိုကွဲမှု ဖြစ်စဉ်ကို အရှိန်မြှင့်ပေးနိုင်ပြီး ကျန်းမာတဲ့ ကိုယ်အလေးချိန်ဖြစ်အောင် ထိန်းသိမ်းပေးနိုင်ပါတယ်။ ဒါကြောင့် ကိုယ့်ရဲ့ နေ့စဉ်အဟာရထဲမှာ ပရိုတိန်းဘယ်လောက် စားပေးသင့်သလဲဆိုတာ သိထားသင့်ပါတယ်။
တကယ်တော့ နေ့တိုင်းမှာ မျှတမှန်ကန်တဲ့ ပရိုတိန်းပမာဏစားသုံးပေးမှသာ ခန္ဓာကိုယ်အလေးချိန် ညီညွတ်မှန်ကန်ပြီး ကိုယ်လိုချင်တဲ့ ကိုယ်လုံးကိုယ်ပေါက်ရအောင် အားကစားလုပ်ရာမှာ ထိရောက်မှာ ဖြစ်ပါတယ်။ ပရိုတိန်းလိုအပ်ချက်ဆိုတာကလည်း လူရဲ့ အလေးချိန် ၊ ယောင်္ကျား/မိန်းမ မတူမှုနဲ့ ကိုယ်လက်လှုပ်ရှားတဲ့အပေါ် မူတည်ပြီး ကွဲပြားပါတယ်။
Photo: Freepik
ဆေးပညာအရ လူတစ်ယောက်ဟာ နေ့စဉ် ပရိုတိန်းအနည်းဆုံး ၅၆ ဂရမ် စားပေးဖို့ လိုအပ်တယ်လို့ သတ်မှတ်ပါတယ်။ ဒါပေမယ့်လည်း အားကစားလုပ်နေသူ ၊ ကြွက်သားတည်ဆောက်နေသူနဲ့ ဝိတ်ကစားနေသူတွေအတွက်ဆိုရင် နေ့စဉ် ပရိုတိန်းစားသုံးမှု ပိုမြင့်ဖို့ လိုမှာ ဖြစ်ပါတယ်။ အလွယ်တကူ တွက်ချက်နိုင်တဲ့ နည်းကတော့ ကိုယ်အလေးချိန်တစ်ပေါင်မှာ ၀.၃၆ နဲ့ မြှောက်လိုက်ရင် စားသုံးသင့်တဲ့ပရိုတိန်းပမာဏထွက်ပါတယ်။ ဒါကတော့ သာမန်လူတွေအတွက် ဖြစ်ပါတယ်။
အာဟာရနဲ့ အစားအသောက်ရေးရာ လေ့လာမှုအကယ်ဒမီရဲ့အဆိုအရ အားကစားသမားတွေနဲ့ အရွယ်ရောက်သူတွေဟာ ခန္ဓာကိုယ်အလေးချိန် ၁ ကီလိုဂရမ်တိုင်းမှာ ပရိုတိန်း ၁.၂ ဂရမ်ကနေ ၂ ဂရမ်အထိ စားပေးဖို့ တိုက်တွန်းထားပါတယ်။ ပေါင်နဲ့ဆိုရင် ကိုယ်အလေးချိန်တစ်ပေါင်တိုင်းမှာ ၀.၅ ဂရမ်ကနေ ၀.၉ ဂရမ်အထိ စားပေးဖို့ လိုမှာ ဖြစ်ပါတယ်။
Photo: ManofMany
ပေါင် ၁၈၀ ရှိတဲ့ အားကစားသမားတစ်ယောက်ဟာ ကျန်းမာရေးကောင်းမွန်ပြီး ကြွက်သားထုအားကောင်းဖို့ နေ့စဉ် ပရိုတိန်း ၉၀ ဂရမ်က်နေ ၁၆၂ ဂရမ်အထိ စားပေးဖို့ လိုမှာပါ။ အားကစားအာဟာရအဖွဲ့အစည်းကတော့ တစ်နေ့တာလုံး ၃ နာရီ – ၄ နာရီ ကြာတိုင်း ပရိုတိန်းဂရမ် ၂၀ ကနေ ၄၀ အထိ စားဖို့ အကြံပြုထားပါတယ်။ မအိပ်ခင်မှာ နွားနို့ပါဝင်တဲ့ Casein ပရိုတိန်း ဂရမ် ၃၀ကနေ ၄၀ စားသုံးပေးတာဟာ ကြွက်သားတည်ဆောက်မှု အားပေးသလို ကိုယ်တွင်းဇီဝဖြစ်စဉ်တွေကိုလည်း ပိုအားကောင်းစေတယ်လို့ ဆိုပါတယ်။
