အလုပ်အကိုင်ပြောင်းတယ်ဆိုတာ လွယ်တဲ့ကိစ္စတော့ မဟုတ်ပါဘူး။ အခုမှ အလုပ်သစ်ဘက် ပြောင်းမယ့်သူတွေဆို ပိုလို့တောင် မလွယ်တဲ့ကိစ္စဖြစ်ပါတယ်။ ကံအကြောင်းမလှလို့ လက်ရှိအလုပ်ကနေ အထုတ်ခံရတဲ့သူတွေအတွက်ကတော့ ပြောလို့တောင်မရအောင် ခက်ခဲကြမှာ အမှန်ပါပဲ။ ဘာကြောင့်ပဲ ဖြစ်ဖြစ် အလုပ်သစ် ပြောင်းဖို့ရှိတဲ့သူတွေအတွက် ဒီနှစ်ထဲမှာ ဘာတွေလုပ်သင့်သလဲ ဆိုတာနဲ့ပတ်သက်လို့ အကြံပြုချက်တချို့ မျှဝေပေးချင်ပါတယ်။
(၁) စွန့်စားရဲပါစေ
Photo: Unsplash
အခုခေတ်ဟာ စွန့်စားရတဲ့ခေတ်ကြီးပါပဲ။ အပြောင်းအလဲတွေ ၊ စိန်ခေါ်မှုသစ်တွေနဲ့ နပန်းလုံးနေရတဲ့ ခေတ်ကြီးမှာ ဘာကိုမှ အခိုင်အမြဲ စွဲမထားဘဲ အလိုက်သင့်ရင်ဆိုင်ဖို့ ပြင်ဆင်ထားပါ။ စွန့်စားခန်းတွေ လုပ်ဖို့ သတ္တိမွေးထားပါ။ နယ်ပယ်သစ်ထဲ ခြေစုံပစ်ဝင်တော့မယ်ဆိုရင် ကြိုတွေးထားလို့ မရနိုင်တဲ့ အတွေ့အကြုံအသစ်အဆန်းတွေကိုပါ မျှော်လင့်ထားဖို့ ပြောချင်ပါတယ်။
(၂) အဆက်အသွယ်တွေနဲ့ ချိတ်ထားပါ
Photo: Unsplash
အလုပ်သစ်ထဲ ဝင်ဖို့ စဉ်းစားထားရင် အဲ့ဒီနယ်ပယ်ဘက်ကို ရောက်နေတဲ့သူတွေနဲ့ အသိအကျွမ်းဖွဲ့ထားပါ။ ရင်းနှီးပြီးသား လူတွေရှိရင် သူတို့နဲ့ တိုင်ပင်ပါ။ အပြင်မှာရော လူမှုကွန်ရက်တွေနဲ့ အလုပ်အကိုင်ရှာဖွေရေးပလက်ဖောင်းတွေပေါ်မှာပါ မိတ်ဆွေတွေရှာပါ။ ကိုယ်ပိုင်လူမှုဆက်ဆံ ရေးကွန်ရက်တစ်ခု ဖွဲ့ထားပါ။ ကိုယ်သွားမယ့် နယ်ပယ်နဲ့ သက်ဆိုင်တဲ့သူတွေနဲ့ သိကျွမ်းခင်မင်ထားတာဟာ အလုပ်အကိုင်ကူးပြောင်းမှု ချောမွေ့လွယ်ကူစေတဲ့အကြောင်းတစ်ရပ်ပဲ ဖြစ်ပါတယ်။
(၃) အံဝင်တဲ့ ကျွမ်းကျင်မှုတွေ ဖြည့်ထားပါ
Photo: Unsplash
နောက်အလုပ်အတွက် ဘယ်လိုကျွမ်းကျင်မှုတွေ လိုအပ်သလဲဆိုတာ သိအောင်လုပ်ပြီး ပြည့်စုံအောင် ဖြည့်ဆည်းထားဖို့ လိုပါတယ်။ အလုပ်အကိုင်ဆိုင်ရာ ပညာရပ်ကျွမ်းကျင်မှုအပြင် လူမှုဆက်ဆံရေးအရည်အချင်း ၊ ဦးဆောင်မှု ၊ စကားပြောစွမ်းရည်နဲ့ ဆုံးဖြတ်ချက်ချနိုင်စွမ်း စတဲ့ Emotional Intelligence နဲ့ Soft Skills ဘက်မှာလည်း အားကောင်းအောင် ကြိုပြီး ပြင်ဆင်ထားပါလို့ အကြံပေးချင်ပါတယ်။
(၄) စိတ်ကို ပြင်ဆင်ထားပါ
Photo: Unsplash
အလုပ်ကြောင့်အပြင် COVID-19 ကပ်အတွင်း လူမှုရေး ၊ ကျန်းမာရေးနဲ့ နေ့စဉ်ဘဝပြဿနာတွေကြောင့် လူတိုင်း စိတ်ပိုင်းဆိုင်ရာ ထိခိုက်ခံစားမှုတွေ ရှိခဲ့တာ ငြင်းမရပါဘူး။ စိတ်ဖိစီးမှု ၊ စိုးရိမ်သောက နဲ့ စိတ်ဓါတ်ကျဆင်းမှုတွေဟာ ဒီဘက်နှစ်တွေမှာ အများဆုံး ကြုံနေကြတဲ့ ပြဿနာတစ်ခုဖြစ်လာပါပြီ။ အလုပ်ရှာနေချိန်မှာ ဒီပြဿနာတွေက အမြင့်ဆုံးအထိ ရောက်လာနိုင်တယ်ဆိုတာ ကြိုတွက်ထားပါ။ စိတ်ကို အကောင်းဆုံးမျှော်လင့်ချက်နဲ့ နလန်ထနိုင်အောင် ပြင်ဆင်ထားဖို့က ၂၀၂၂ မှာ အလုပ်သစ်ရှာမယ့်သူတွေ မဖြစ်မနေ ဦးစားပေးရမယ့်ထိပ်တန်းကိစ္စတစ်ခုပဲဆိုတာ မမေ့စေချင်ပါဘူး။
Featured Photo: jeda
