လီဗာပူးအသင်းဟာ ပြီးခဲ့တဲ့ရာသီတွေမှာ ကစားသမားတွေနဲ့ အသင်းအဖွဲ့ဝင်တွေအားလုံးဟာ တူညီတဲ့ဦးတည်ရာဆီသွားနေကြတာကြောင့် အောင်မြင်တဲ့ရာသီတွေဖြစ်ခဲ့ပါတယ်။
နည်းပြယာဂင်ကလော့ပ်အနေနဲ့ အန်းဖီးကို စွန့်ခွာချင်နေတဲ့ ပထမအသင်းကစားသမားကိစ္စတွေနဲ့ပတ်သက်ပြီး အကြီးအကျယ်ခေါင်းခြောက်စရာကိစ္စမျိုးလည်း မရှိခဲ့ဘဲ အသင်းအောင်မြင်ဖို့ကိုသာ အဓိကအာရုံစိုက်နိုင်ခဲ့တာဖြစ်ပါတယ်။ ဒါပေမယ့် ၂၀၂၀ နှစ်ကုန်ခါနီးမှာ အဲဒီအခြေအနေတွေဟာပြောင်းလဲသွားခဲ့ပြီး မိုဟာမက်ဆာလာဟာ လီဗာပူးမှာ လုံးဝပျော်ရွှင်တော့တဲ့ပုံမပေါ်တော့တာဖြစ်ပါတယ်။
Photo: Daily Express
မိုဟာမက်ဆာလာရဲ့သူငယ်ချင်း မိုဟာမက်အဘူထရီကာဟာ လာမယ့်နွေရာသီမှာ အီဂျစ်လက်ရွေးစင်ကြယ်ပွင့်ဟာ လီဗာပူးအသင်းကို စွန့်ခွာချင်နေတယ်ဆိုတဲ့ ကောလာဟလတွေကို အစပျိုးပေးခဲ့တာဖြစ်ပါတယ်။ လီဗာပူးအသင်းအနေနဲ့ ဆာလာကို ၂၀၂၃ ခုနှစ်အထိ စာချုပ်သစ်ချုပ်ထားခဲ့တာကြောင့် အဲဒီအချိန်မှာ ဘာမှ စိတ်လှုပ်ရှားခြင်းမရှိခဲ့ပေမယ့် ပြီးခဲ့တဲ့အပတ်မှာ ဆာလာက ရီးရဲမက်ဒရစ် သို့မဟုတ် ဘာစီလိုနာအသင်းကို ပြောင်းရွှေ့နိုင်ခြေနဲ့ပတ်သက်ပြီး မေးမြန်းခဲ့ရာမှာ ငြင်းပယ်ခဲ့ခြင်းမရှိခဲ့တာကြောင့် စိုးရိမ်မှုတွေ စတင်ကြီးထွားလာခဲ့တာဖြစ်ပါတယ်။
အင်္ဂလန်လက်ရွေးစင်ကစားသမားဟောင်း စတန်ကော်လီမိုးက လီဗာပူးအသင်းကို ဆာလာရဲ့ကိစ္စနဲ့ပတ်သက်ပြီး ပြတ်ပြတ်သားသားလုပ်စေချင်နေတာဖြစ်ပြီး စာချုပ်သစ်မချုပ်ရင် အထုပ်ပြင်ထားခိုင်းဖို့ ပြောကြားခဲ့တာဖြစ်ပါတယ်။
“ကျွန်တော့်အမြင်ကတော့ အဲဒါကို ရိုးရှင်းတဲ့နည်းလမ်းတစ်ခုနဲ့ပဲ ရှင်းနိုင်ပါတယ်။ ကလော့ပ်က ဆာလာကို အဲဒီအကြောင်းနဲ့ပတ်သက်ပြီး ပြောခဲ့မယ်ဆိုတာ ကျွန်တော် သိပါတယ်။ ဒါပေမယ့် အခုအချိန်မှာ လီဗာပူးနည်းပြအနေနဲ့ ‘မို၊ မင်းက ပြီးခဲ့တဲ့ ၃ နှစ်၊ ၄ နှစ်မှာ အရမ်းကောင်းမွန်ခဲ့တယ်။ ငါတို့တွေ မင်းကို ဒီမှာ တသက်လုံးနေဖို့ အခွင့်အရေး ကမ်းလှမ်းတော့မယ်။ ဒီမှာ စာချုပ်သစ်’ဆိုတာမျိုး လုပ်ဖို့လိုနေပါပြီ”
Photo: Forbes
“အဲဒီလိုလုပ်တဲ့အချိန်မှာ ဆာလာက ခေါင်းညိတ်ပြလိုက်ရင် တံခါးဖွင့်ပေးပြီး ငါတို့တွေ ဆက်သွားကြတာပေါ့လို့ ပြောရုံပဲ။ သူက အန်းဖီးမှာ အဓိကလူမဟုတ်ပါဘူး။ ခင်ဗျား ဗန်ဒိုက်လို့၊ ဟန်ဒါဆင်လို့ ငြင်းနိုင်ပါတယ်။ စာရင်းကတော့ ရှိပြီးသားပါ။ အဲဒီတော့ သူ့ကို တစ်ပတ်လုပ်ခ ပေါင် ၂ သိန်းနဲ့ ကမ်းလှမ်းလိုက်။ ဒါမှမဟုတ် သူလိုချင်သလောက် ကမ်းလှမ်းလိုက်ပေါ့။ သူ့ကို ခေါ်ပြီးမေးလိုက်ပေါ့”
“သူ အဲဒါကို လက်မခံနိုင်ရင်တော့ သူ့ကို ရာသီကုန်ကျရင် ရောင်းမယ့်စာရင်းထဲသာ ထည့်လိုက်တော့”လို့ ပြောကြားခဲ့ပါတယ်။
