ဘဝအတွေ့အကြုံရင့်ကျက်ပြီး အတွေ့အကြုံကနေ ပညာယူတတ်သူတို့က နောင်လာနောက်သားတွေဘဝ ကြီးပွားတက်မြင့်ရေးအတွက် မှတ်သားဖွယ်ရာတွေ ထားတတ်စမြဲပါ။ ဘဝတစ်ခု တိုးတက်ကြီးမြင့်ဖို့ဆိုရင် သင်ယူစရာ အသိပညာတွေအပြင် လိုက်နာစရာ ကျင့်ဝတ်တွေလည်း အများကြီး ရှိပါတယ်။ ဒီလို ကျင့်ဝတ်ဆိုင်ရာ သိကောင်းစရာတွေထဲကမှ အောင်မြင်တဲ့ဘဝနေနည်းအတွက် မသိမဖြစ် သိစရာကျင့်ဝတ်တချို့အကြောင်း မျှဝေပေးချင်ပါတယ်။
(၁) မပြောခင် အရင်နားထောင်ပါ
Photo: Unsplash
အောင်မြင်တဲ့ဘဝပိုင်ရှင်တွေဟာ စကားပြောကောင်းသူတွေလည်း ဖြစ်သလို သူတစ်ပါးရဲ့ ပြောကြားချက်တွေကိုလည်း သေချာနားထောင်ပေးတတ်သူတွေ ဖြစ်ပါတယ်။ စကားပြောကောင်းခြင်းဟာ အတတ်ပညာဆိုရင် တခြားသူတွေရဲ့ အမြင်နဲ့ ခံစားချက်ကို တကယ်နားလည်အောင် နားထောင်တတ်ခြင်းကလည်း အရည်အချင်းတစ်ရပ်ပဲလို့ ဆိုချင်ပါတယ်။ အောင်မြင်ချင်ရင် နားထောင်တတ်ဖို့ မဖြစ်မနေ လိုအပ်တာ အမှန်ပါပဲ။
(၂) မသုံးခင် အရင်ရအောင် ရှာပါ
Photo: Unsplash
ပိုက်ဆံသုံးတယ်ဆိုတာ လူတိုင်း လုပ်တတ်တဲ့ ကိစ္စပါ။ ငွေရှာတဲ့အလုပ်ကတော့ လူတိုင်း ကျင်လည်တဲ့ အလုပ်မဟုတ်ပါဘူး။ အခုခေတ်လို ငွေရှာရမလွယ်သလောက် အသုံးအဖြုန်းလွယ်လှတဲ့ ခေတ်ကြီးမှာ ငွေကို ဉာဏ်ပါပါ သုံးတတ်စွဲတတ် ထိန်းသိမ်းစီမံတတ်ဖို့ လိုပါတယ်။ ပိုက်ဆံမသုံးခင် ကိုယ်သုံးမယ့် ငွေထက် အဆပေါင်းများစွာ မပူမပင် ရှာနိုင်အောင် အရင်လုပ်ကြဖို့ အကြံပြုချင်ပါတယ်။
(၃) မရေးခင် အရင်စဉ်းစားပါ
Photo: Unsplash
စဉ်းစားဆင်ခြင်ဉာဏ်ရှေ့ထားပြီး အလုပ်လုပ်တာ အမှားနည်းစေပါတယ်။ စာပဲရေးရေး ၊ စကားပဲ ပြောပြော အလုပ်မလုပ်ခင် အရင် စဉ်းစားပြီးမှ လုပ်သင့်ပါတယ်။ ဒီလို ပြောလို့လည်း တစ်နေ့လုံး စဉ်းစားပြီးမှ ပြော/ရေး/လုပ်ရမယ်လို့ မဆိုလိုပါဘူး။ ကိုယ့်အသိဉာဏ် ၊ အတွေ့အကြုံနဲ့ လက်ရှိအခြေအနေတွေပေါ် ဆက်စပ်စဉ်းစားချိန်ဆပြီး ဆုံးဖြတ်လုပ်ကိုင်ဖို့ ပြောခြင်းသာ ဖြစ်ပါတယ်။
(၄) လက်မလျှော့ခင် အရင်ကြိုးစားပါ
Photo: Unsplash
ဖြစ်နိုင်မှာ မဟုတ်ပါဘူးလို့ လက်မလျှော့လိုက်ခင် နောက်ဆုံးတစ်ကြိမ်ဖြစ်ဖြစ် ကြိုးစားကြည့်သင့်ပါတယ်။ ကြီးမြတ်တဲ့ အောင်မြင်မှုတွေဟာ အကြိမ်ကြိမ် ရှုံးနိမ့်လဲပြိုပြီးမှ မလျှော့တမ်းဇွဲကြောင့် အောင်မြင်မှုပန်းတိုင်ကို ရောက်ခဲ့ရတာ ဖြစ်ပါတယ်။ အက်ဒီဆင်တစ်ယောက် လျှပ်စစ်မီးမထုတ်ခင် စမ်းသပ်မှု အကြိမ်ပေါင်း ၁၀၀၀၀ မအောင်မြင်ခဲ့တာကို သတိရစေချင်ပါတယ်။
(၅) မသေခင် ရှင်သန်နေပါ
Photo: Unsplash
အသက်မသေသေးသရွေ့တော့ ရှင်သန်နေကြတာပါပဲ။ သက်ဝင်ရှင်သန်မှုပါတဲ့ ရှင်သန်မှုမျိုး ဖြစ်ဖို့တော့ လိုပါတယ်။ အသက်ပါတဲ့ ရှင်သန်မှုဆိုတာ မျှော်လင့်ချက်တွေ ၊ ယုံကြည်ရင်ခုန်ခြင်းတွေနဲ့ အခက်အခဲတွေ ၊ စိန်ခေါ်မှုတွေကို ရင်ဆိုင်ဖြတ်ကျော်ခြင်းမျိုးကို ဆိုလိုတာ ဖြစ်ပါတယ်။ ဘဝတိုတိုလေးအတွင်းမှာ အဆင်မပြေခြင်းတွေရော အဆင်ပြေခြင်းတွေရော အစုံအစုံ ကြုံဆုံရဦးမှာပါ။ ဒါတွေကို ရင်ဆိုင်ဖို့ စိတ်ရောလူပါ ပြင်ဆင်ထားပါ။ အကောင်းမြင်တဲ့စိတ်နဲ့ ဘဝကို ပျော်ရွှင်လေးနက်စွာ သက်ဝင်ရှင်သန်သွားမှ ထိုက်တန်တဲ့ဘဝ အောင်မြင်တဲ့ဘဝလို့ ဆိုနိုင်မှာ မဟုတ်လား။
Featured Photo: tecnicasreunidas
