ထိပ်တန်းတိုက်စစ်မှူးတွေထက် ဂိုးသွင်း ပိုကောင်းနေတဲ့ ဆာဂျီယိုရာမို့စ်

အသက် (၃၂)နှစ်အရွယ် ရီးရဲလ်အသင်းခေါင်းဆောင်ဟာ ပြိုင်ပွဲစုံသွင်းဂိုး (၁၆) ဂိုး (၂၀၁၈-၂၀၁၉ နိုင်ငံအသင်းပွဲစဉ်များပါ ပါဝင်) သွင်းယူထားပြီးတော့ လီဗာပူးလ်တိုက်စစ်မှူး ဖာမီနိုထက် (၂) ဂိုး၊ ဂျူဗင်တပ်စ်တိုက်စစ်မှူး ပေါ်လိုဒီဘာလာထက် (၆) ဂိုးအထိ ပိုမိုသွင်းယူထားနိုင်ခဲ့ပါတယ်။

ရီးရဲလ်မက်ဒရစ်နဲ့ စပိန်အသင်းရဲ့ နာမည်ကျော်ခံစစ်မှူး ရာမို့စ်ကတော့ လက်ရှိဘောလုံးရာသီမှာ အားလုံးအံ့အားသင့်စေအောင် စွမ်းဆောင်နိုင်မှုတစ်ခုကို ပြုလုပ်ထားနိုင်ခဲ့ပါတယ်။ အငြင်းပွားချင်စရာ အကောင်းဆုံးကစားသမားတစ်ဦးအဖြစ် ရှိနေခဲ့တဲ့ ရာမို့စ်ဟာ ချစ်သူ၊ ခင်သူ ပေါများတဲ့ ကစားသမားတစ်ဦးလည်း ဖြစ်ပါတယ်။

ခံစစ်ပိုင်းစွမ်းဆောင်ရည်မှာ ထက်မြက်သလောက် အငြင်းပွားစရာ လုပ်ရပ်တွေကိုလည်း မကြာခဏဆိုသလို လုပ်ပြတတ်တဲ့ ကစားသမားဆိုလည်း မမှားပါဘူး။ ဒါပေမယ့် ဒီရာသီမှာတော့ ရာမို့စ်ကို ချီးကျူးရမယ့် စွမ်းဆောင်ရည်တစ်ခုက ရှိနေပါတယ်။ အဲဒါကတော့ ရာမို့စ်ရဲ့ ဒီရာသီ ပြိုင်ပွဲစုံသွင်းဂိုးဟာ ထိပ်တန်းတိုက်စစ်မှူးတချို့ထက်တောင် များပြားနေတယ်ဆိုတာပါပဲ။