ဘွဲ့နေရပြီး အလုပ်လျှောက်ပြီး အင်တာဗျူးဖြေ၊ အလုပ်ရပြီးတဲ့နောက်မှာတော့ နောက်ထပ်စိတ်ပူစရာတစ်ခုကတော့ မိမိအလုပ်မှာ ဘယ်လိုအောင်မြင်အောင် ကြိုးစားရမလဲဆိုတာက စိတ်ပူစရာပါပဲ။ အပြိုင်အဆိုင်တွေများတဲ့ လောကကြီးထဲမှာ ကြိုးစားမှုမရှိရင် အများနောက်ကောက်ကျ ကျန်ခဲ့မှာဖြစ်တဲ့အတွက်ကြောင့် လုပ်ငန်းခွင်မှာ အောင်မြင်ခြင်းသည် အရင်ကထက်ပိုပြီး အရေးကြီးလာပါတယ်။
အောင်မြင်ဖို့အတွက် စိတ်အားထက်သန်မှုနှင့် အကောင်းဆုံးလုပ်ဆောင်နိုင်ဖို့အတွက် ပြင်းပြတဲ့စိတ်ဓာတ်ရှိဖို့က အဓိကပါပဲ။ ထိုအရာများကို ပိုင်ဆိုင်ထားပါက လှေကားပေါ်က အလွယ်တကူ တက်လိုက်ရုံပါပဲ။ လုပ်ငန်းခွင်မှာ အောင်မြင်တိုးတက်ပြီး အများက လေးစားအားကျရဖို့အတွက် ဘယ်လိုနည်းလမ်းတွေကို ကျင့်သုံးရမလဲ။
တီထွင်ကြံဆမှုရှိပါ
ယနေ့ခေတ်မှာ တီထွင်ဖန်တီးနိုင်စွမ်းက အထူးလိုအပ်ပါတယ်။ အထူးသဖြင့် ပရောဂျက်အသစ်တွေ ဖန်တီးရတဲ့အခါမျိုးမှာ အများနဲ့မတူအောင် အိုင်ဒီယာအသစ်အဆန်းများ ဖန်တီးဖို့ လိုအပ်ပါတယ်။ တီထွင်ဖန်တီးမှု မြင့်မားလေ အောင်မြင်မှုအတွက် အခွင့်အလမ်းပိုများလေပါပဲ။
လေ့လာသင်ယူလိုစိတ် ပြင်းပြပါ
မိမိလုပ်ငန်းခွင်မှာ အောင်မြင်ဖို့ဆိုရင် အမြဲတစေ လေ့လာသင်ယူလိုစိတ် ပြင်းပြဖို့ လိုအပ်ပါတယ်။ အထက်အရာရှိများ၊ စီနီယာလုပ်ဖော်ကိုင်ဖက်များရဲ့ အကြံပြုချက်ကိုလည်း လက်ခံဖို့လိုအပ်ပါတယ်။ သင်က ဘယ်အဆင့်မြင့်တက္ကသိုလ်က အဆင့်ဘယ်လောက်နဲ့ပဲ အောင်မြင်ခဲ့ပါစေ တကယ့်လုပ်ငန်းခွင်လက်တွေ့ဘဝကတော့ တက္ကသိုလ်ကျောင်းသားဘဝနဲ့ တူညီမှာမဟုတ်ပါဘူး။ ဒါ့ကြောင့် မိမိအလုပ်မှာ အာရုံစူးစိုက်ပြီး အမြဲတမ်းလေ့လာသင်ယူဖို့ လိုအပ်ပါတယ်။
ဆက်ဆံရေး ပြေပြစ်ကောင်းမွန်ပါစေ
ဆက်ဆံရေးကောင်းမွန်ခြင်းသည် မိမိရဲ့အဖွဲ့အစည်း၊ မိမိရဲ့လုပ်ငန်းအောင်မြင်မှုအတွက် အဓိကသော့ချက်ပဲဖြစ်ပါတယ်။ လုပ်ဖော်ကိုင်ဖက်အချင်းချင်း ဆက်ဆံရေးကောင်းမွန်ခြင်းမှသည် စည်းလုံးညီညွှတ်မှုရှိအောင် ကူညီပေးနိုင်ပြီး အဖွဲ့လိုက် လုပ်ဆောင်ရသောပရောဂျက်များအတွက်လည်း အဆင်ပြေအောင်မြင်မှာဖြစ်ပါတယ်။
ယုံကြည်မှုရယူပါ
အလုပ်ထဲ ဝင်ဝင်ချင်း ကိုယ့်အလုပ်ရှင်ရဲ့ယုံကြည်မှုကို မြန်မြန်ရလိုက်ခြင်းသည် သင့်အတွက် အကျိုးကျေးဇူးများစွာ ရရှိပါတယ်။ သင့်ကို ယုံကြည်စိတ်ချရခြင်းကြောင့် အလုပ်တာဝန်တွေ များများအပ်နှင်းပါလိမ့်မယ်။ ထိုအခါ အလုပ်တွေအများကြီး လုပ်ရလို့ဆိုပြီး စိတ်မညစ်လိုက်ပါနဲ့။ သင် ငယ်ရွယ်တုန်းမှာ အလုပ်များများလုပ်ထားမှ အသက်ကြီးပြီး အိုမင်းလာတဲ့အခါမှာ သက်သောင့်သက်သာနေရမှာဖြစ်ပါတယ်။
Source: Au.topresume.com
