အခုနှစ်ပိုင်း အတွင်းမှာ Digital Video နယ်ပယ်ဟာ အဆက်မပြတ်ကို တိုးတက်လာနေပါတယ်။ သမားရိုးကျ မီဒီယာအများစုလည်း Digital ပလက်ဖောင်းတွေ ပေါ်တက်လာကြသလို တစ်ကိုယ်ရည်တစ်ကာရ ဖန်တီးမှုစွမ်းရည်ရှိတဲ့ လူငယ်တွေအနေနဲ့လည်း Facebook ၊ Youtube တို့လို ဆိုရှယ်မီဒီယာ ပလက်ဖောင်းတွေကနေ တဆင့် ဗီဒီယိုတွေ ဖန်တီးပြီး ကိုယ်ပိုင်ဝင်ငွေ လမ်းကြောင်းတစ်ခု ဖန်တီးနေနိုင်ကြပြီ ဖြစ်ပါတယ်။ ကွီးတို့ အနေနဲ့ ဗီဒီယိုတွေ ဖန်တီးရတာ ဝါသနာပါတယ် ၊ Video Creator တစ်ယောက်အဖြစ် ဝင်ငွေရှာချင်တယ် ဆိုရင်တော့ အခုပြောပြမယ့် အချက်တွေကို မဖြစ်မနေ သိထားဖို့ လိုပါလိမ့်မယ်။

(၁) Digital ပလက်ဖောင်းတွေအကြောင်း ကောင်းကောင်း နားလည်ရမယ်

Photo : The World Economic Forum

အကယ်၍ ကွီးတို့က YouTuber တစ်ယောက် ဖြစ်ချင်တယ်ဆိုရင် YouTube ပလက်ဖောင်းနဲ့ပတ်သတ်တဲ့ အခြေခံ သဘောတရားတွေ အားလုံးကို နားလည်အောင် လေ့လာထားဖို့ အရေးကြီးပါတယ်။ YouTube ရဲ့ သတ်မှတ်ချက်တွေက ဘာတွေဖြစ်မလဲ ၊ ဝင်ငွေရအောင် ဘယ်လို လုပ်ဆောင်ရမလဲ ၊ လူတွေ စိတ်ဝင်စားမှုရှိတဲ့ ဗီဒီယိုတွေကို ဘယ်လိုဖန်တီးမှု စွမ်းရည်ကောင်းကောင်းနဲ့ တင်ဆက်ရမလဲ စသည်ဖြင့် ဒီအချက်အလက် အကြောင်းအရာတွေကို သေချာသိထားမှ ကွီးတို့ဖန်တီးမယ့် ဗီဒီယိုတွေ ၊ အကြောင်းအရာတွေကို ပိုမိုကောင်းမွန်အောင်လုပ်ဆောင်နိုင်မှာ ဖြစ်ပြီး ခိုင်မာတဲ့ဝင်ငွေလမ်းကြောင်းတစ်ခု ဖန်တီးနိုင်မှာ ဖြစ်ပါတယ်။

(၂) Content Research Skills ကောင်းရမယ်

Photo : OECD

Video Creator တစ်ယောက်အတွက် Content Research Skills ကောင်းဖို့လည်း အရေးကြီးပါတယ်။ Fine Brothers ၊ FOMO Daily ၊ Philip DeFranco တို့လို YouTube ချန်နယ်တွေဆိုရင် နေ့စဉ်နေ့တိုင်း နီးပါး အသစ်သစ်သော မတူညီတဲ့ ဗီဒီယိုတွေကို ဖန်တီးတင်ဆက်နေကြတာ ဖြစ်ပါတယ်။ ဒီလို ဗီဒီယိုအကြောင်းအရာ အသစ်တွေကို အမြဲစဉ်ဆက်မပြတ် တင်ဆက်နိုင်ဖို့ဆိုရင် Research ကောင်းကောင်း လုပ်နိုင်တဲ့ Skills ရှိမှ ဖြစ်နိုင်မှာ ဖြစ်ပါတယ်။

(၃) Video တည်းဖြတ်မှု Skills ကောင်းရမယ်

Photo : IGN

Video ကောင်းကောင်းတစ်ပုဒ် ဖန်တီးချင်တယ် ၊ လူတွေရဲ့ စိတ်ဝင်စားမှုရစေမယ့် Video တွေ ဖန်တီးနိုင်ချင်တယ်ဆိုရင် ဗီဒီယိုတည်းဖြတ်မှုဆိုင်ရာ ပညာရပ်လို့ခေါ်တဲ့ Video Editing Skills ကလည်း မရှိမဖြစ် အရေးပါပါတယ်။ ဗီဒီယိုတစ်ပုဒ် စိတ်ဝင်စားဖို့ ကောင်းမကောင်းဆိုတာ တင်ဆက်တဲ့ အကြောင်းအရာအပြင် ဗီဒီယိုတည်းဖြတ်မှုပိုင်းနဲ့လည်း အများကြီး ဆိုင်ပါတယ်။ ဆိုတော့ ကွီးတို့အနေနဲ့Video တည်းဖြတ်မှုပိုင်းမှာ အားနည်းနေသေးတယ်ဆိုရင် အခမဲ့လေ့လာလို့ရတဲ့ Editing Tools တွေ ၊ အွန်လိုင်းကနေ လေ့လာနိုင်မယ့် Tutorials ဗီဒီယိုတွေကို ကြည့်ရှုလေ့လာ မှတ်သားပြီး ကိုယ့်ရဲ့ Video Editing Skills ကို မြှင့်တင်ထားဖို့ လိုပါမယ်။

(၄) မတူညီတဲ့ ဆိုရှယ်မီဒီယာ ပလက်ဖောင်းတွေကို သုံးတက်ရမယ်

Photo : PR Daily

ဒီနေ့ခေတ်မှာ Video Creator လုပ်မယ်ဆိုရင် ကိုယ့်ရဲ့ ဖန်တီးတင်ဆက်မှုတွေကို လူတွေဆီ များများရောက်ဖို့ ၊ လူများများ သိနိုင်ဖို့ ဆိုရှယ်မီဒီယာပလက်ဖောင်း တစ်ခုတည်းကိုပဲ အားကိုးနေလို့ မရတော့ပါဘူး။ Facebook ၊ Youtube ၊ TikTok စသည်ဖြင့် လူသုံးများတဲ့ မတူညီတဲ့ ဆိုရှယ်မီဒီယာ ပလက်ဖောင်းတွေကို တွဲဖက်အသုံးပြုတက်ဖို့လည်း လိုပါတယ်။ ဒါမှသာ ကိုယ့်ရဲ့ ဖန်တီးတင်ဆက်မှုတွေဟာ လူတွေအများကြီးစီရောက်နိုင်မှာဖြစ်ပြီး မတူညီတဲ့ ဆိုရှယ်မီဒီယာပလက်ဖောင်း အသီးသီးကနေ ထိုးဖောက်အောင်မြင်နိုင်မှာ ဖြစ်ပါတယ်။

(၅) ကိုယ့်ရဲ့ ကျွမ်းကျင်မှုကို အသုံးချတက်ရမယ်

Photo : Emeritus

Video Creator တစ်ယောက်လုပ်မယ်ဆိုရင် ကိုယ့်ရဲ့ကျွမ်းကျင်မှုကို အရင်ဆုံးလေ့လာဖို့ လိုပါမယ်။ ကိုယ်ကဘာဝါသနာပါလဲ ၊ ဘာကျွမ်းကျင်လဲ ဆိုတာပေါ်မူတည်ပြီး ဗီဒီယိုတွေကို ဖန်တီးတင်ဆက်တာက သင့်ရဲ့ ဖန်တီးမှုစွမ်းရည်ကို ပိုမိုအားကောင်းစေမှာ ဖြစ်ပါတယ်။ ဥပမာ အားဖြင့် ကွီးတို့က ဟင်းချက်ပြမှာလား ၊ နည်းပညာပိုင်းဆိုင်ရာ သတင်းအချက်အလက်တွေ မျှဝေမှာလား ၊ Reaction ဗီဒီယိုတွေ ဖန်တီးမလား ၊ အားကစားဆိုင်ရာသတင်းတွေ တင်ဆက်ချင်လား ၊ ရှာရှာဖွေဖွေ ဗဟုသုတအကြောင်းအရာတွေ တင်ဆက်မှာလား ၊ ခရီးသွား ဗီဒီယိုတွေ ဖန်တီးမလား စသည်ဖြင့် ကိုယ်ဘာကျွမ်းကျင်လဲ ၊ ဘာစိတ်ဝင်စားလဲဆိုတာပေါ်မူတည်ပြီး Video တွေ ဖန်တီးတင်ဆက်တာက အောင်မြင်တဲ့ Video Creator တစ်ယောက် ဖြစ်စေဖို့အတွက် များစွာအကူအညီ ဖြစ်စေနိုင်ပါတယ်။

Featured Photo : Visible Music College