အထီးကျန်ခြင်း ဝေဒနာဟာ မပေါ့ဆသင့်တဲ့ ကိစ္စတစ်ခုဖြစ်ပါတယ်။ ယနေ့လူအများစုဟာ စိတ်ဖိစီးခြင်းနှင့် အထီးကျန်ခြင်းတွေကို များစွာခံစားနေကြရပါတယ်။ အထီးကျန်ခြင်းဝေဒနာခံစားရတာတဲ့အခါ လူမှု့အသိုင်းအဝိုင်းနဲ့ တဖြေးဖြေးဝေးကွာလာပြီး တစ်ကိုယ်တည်းစိတ်ပိုင်းဆိုင်ရာအခြေအနေတွေကြားမှာ ရုန်းလေနစ်လေဖြစ်လာ တက်ပါတယ်။ ဒါကြောင့် အထီးကျန်တဲ့အခြေအနေမှ ရုန်းထွက်နိုင်မယ့် နည်းလမ်းကောင်းတစ်ချို့ကိုပြောပြပေးချင်ပါတယ်။
(၁) အကောင်းမြင်စိတ်မွေးပါ
တစ်ခါတစ်လေမှာ အထီးကျန်ခြင်းတွေနဲ့ အတူ စိတ်ဓာတ်ကျ အားငယ်ခြင်းတွေပါ ကပ်ပါလာတက်ပါတယ်။ ထိုအခါ တစ်ကိုယ်တည်းစိတ်ပျက်အားလျော့မှုတွေနဲ့ အထီးကျန်ခြင်းဝေဒနာက ပိုဆိုးတဲ့အခြေအနေကိုရောက်သွားနိုင်ပါတယ်။ ဒါကြောင့် ကိုယ့်ကိုယ်ကိုအကောင်းမြင်စိတ်ကိုမွေးမြူထားပါ။
လောကမှာအကောင်းနဲ့အဆိုးကဒွန်တွဲပြီး အခက်အခဲနဲ့ စိတ်ဓာတ်ကျစရာတွေက လူတိုင်းလိုလိုမှာရှိတယ်ဆိုတာကိုနားလည်ထားပါ။ ကိုယ့်ကိုယ့်ကို အားပေးနှစ်သိမ့်ပြီး အရာရာတိုင်းကို အကောင်းမြင်စိတ်ထားမယ်ဆိုရင် စိတ်ဓာတ်ကြံ့ခိုင်မှုတွေရရှိလာပြီးအထီးကျန်ခြင်းတွေပပျောက်သွားနိုင်မှာဖြစ်ပါတယ်။
(၂) လူတွေနဲ့ထိတွေ့ဆက်ဆံပါ
အထီးကျန်ပြီဆိုကတည်းက တစ်ကိုယ်တည်းသီးခြားနေနေမိတယ်ဆိုတာ ငြင်းဆိုဖွယ်မရှိပါဘူး။ လူတွေနဲ့ အဆက်အဆံမလုပ်တာကြာလာရင် လူတွေနဲ့ ပိုဝေးပြီး အထီးကျန်ခြင်းဝေဒနာက ပိုဆိုးသွားနိုင်ပါတယ်။ဒါကြောင့် အတက်နိုင်ဆုံးလူတွေနဲ့ ထိတွေ့ဆက်ဆံနိုင်မယ့်နည်းလမ်းတွေရှာကြည့်ပါ။
ဆိုရှယ်မီဒီယာပေါ်က မဟုတ်ပဲ ပြင်ပမှာလက်တွေ့လူတွေနဲ့ ထိတွေ့မှုရှိအောင်နေပါ။ သူငယ်ချင်းတွေနဲ့ တွေ့ဆုံပါ။ လူတွေနဲ့ပေါင်းသင်းဆက်ဆံရမယ့် လူမှုရေးအဖွဲ့အစည်းတွေ လှုပ်ရှားမှုတွေမှာ ပါဝင်ဖို့အကြံပြုချင်ပါတယ်။
(၃) အားကစားလုပ်ဆောင်ပါ
ကိုယ်လက်လှုပ်ရှားအားကစားလုပ်ခြင်းက ကျန်းမာရေးအကျိုးကျေးဇူးတွေများစွာရစေသလို စိတ်ဓာတ်ကျန်းမာကြံ့ခိုင်လာစေတဲ့ ကောင်းကျိုးတွေရစေပါတယ်။ အထီးကျန်ဝေဒနာခံစားရချိန်မှာ ခန္ဓာကိုယ်ကိုလှုပ်လှုပ်ရှားရှားနေပေးတာက စိတ်ဓာတ်ကျခြင်းနှင့် အထီးကျန်းတွေကို ပြေလျော့စေဖို့ ကူညီပေးနိုင်ပါတယ်။ ဒါကြောင့်ပုံမှန် Gym ကစားပါ။
မာရသွန်အပြေးပွဲတွေမှာပါဝင်ပါ။ ဒါဆိုရင်အားကစားလုပ်ခြင်းကနေတစ်ဆင့် အထီးကျန်ခြင်းကိုလျော့ကျစေမယ့်အပြင် အားကစားလုပ်ရတာကြိုက်တဲ့ ဝါသနာတူမိတ်ဆွေအသစ်တွေလည်းတိုးပွားလာစေနိုင်ပါတယ်။
Photo : Freepik
