ကျန်းမာဖို့ အစားအသောက်ရွေးချယ် စားသောက်တတ်ဖို့ လိုပါတယ်။ လူ ၁၀၀ မှာ ၈၀ က အာဟာရနဲ့ပတ်သက်ပြီး တိတိပပ နားမလည်ကြဘူးလို့ နိုင်ငံတကာ အစားအသောက်သတင်းအချက်အလက်ကောင်စီ ဖောင်ဒေးရှင်းရဲ့ စစ်တမ်းက ဆိုပါတယ်။ အာဟာရနဲ့ စားသောက်နည်းစနစ်တွေပေါ် နားလည်မှုလွဲတာဟာ ထိုက်သင့်တဲ့ ကျန်းမာရေးအကျိုး ခံစားဖို့ အခွင့်အလမ်းဆုံးရှုံးစေနိုင်ပါတယ်။ ဒါကြောင့် စနစ်တကျလေ့လာထားတဲ့ ကျန်းမာရေးပညာရှင်တို့ အကြံပြုထားတဲ့ စားသောက်နည်းစနစ်လေးတွေ မျှဝေပေးချင်ပါတယ်။
(၁) အပင်ထွက်ပစ္စည်း များများစားပါ
Photo: Unsplash
သုတေသနတွေက ခိုင်ခိုင်မာမာ ထောက်ခံထားတာက အပင်ကရတဲ့ အစားအစာတွေ များများစားပေးခြင်းဟာ ကျန်းမာရေး ပိုကောင်းစေတယ်လို့ ဆိုပါတယ်။ အကျိုးကျေးဇူးအနေနဲ့ သွေးဖိအား ၊ သွေးတွင်း အဆီဓါတ် Level ၊ ဂလူးဂို့စ် နဲ့ ခါးတစ်ဝိုက်အဆီစုဝေးတာမျိုးကို လျှော့ချပေးနိုင်ပြီး ရောဂါကြီးတွေ ဖြစ်တဲ့ ဆီးချို ၊ နှလုံး စတာတွေ အဖြစ်နည်းစေပါတယ်။
သားသတ်လွတ်စားသူတွေရဲ့ ကျန်းမာရေးဟာ အကောင်းဆုံးအနေအထားမှာ ရှိပြီး အသီးအရွက်စားပြီး အသားငါးထဲက ကြက်ဥ ၊ နို့ ၊ နို့ထွက်ပစ္စည်းနဲ့ ငါး စားသူတွေက ကျန်းမာရေးအားဖြင့် ဒုတိယအကောင်းဆုံးအုပ်စုထဲမှာ ပါဝင်နေပါတယ်။
(၂) အနီရောင်နဲ့ တာရှည်ခံပြုပြင်ထားတဲ့ အသားစားသုံးမှု လျှော့ပါ
Photo: Unsplash
အသားလုံးဝ ရှောင်တာထက် အနီရောင်ရှိတဲ့ အသားစားသုံးတာ လျှော့ဖို့ နဲ့ တာရှည်ခံစားသုံးနိုင်အောင် ပြုပြင်ထားတဲ့ အသားတွေ စားတာ လျှော့ဖို့ ဆရာဝန်တွေက ပြောကြပါတယ်။ အနီရောင်အသား အလွန်အမင်းစားသုံးခြင်းအားဖြင့် ကင်ဆာနဲ့ နှလုံးရောဂါအပါအဝင် ဆိုးဝါးတဲ့ ရောဂါကြီးတွေနဲ့ အချိန်မတိုင်ခင် သေဆုံးမှု အဖြစ်များနိုင်တယ်လို့လည်း ဆရာဝန်တွေက ဆိုပါတယ်။
တာရှည်ခံအောင် ပြင်ထားတဲ့ အသားစားသုံးခြင်းက ပိုပြီး ကျန်းမာရေးအန္တရာယ်ရှိပါတယ်။ ဒီလို အသားမျိုးကို စားသုံးမှုမြင့်မားတဲ့လူတွေဟာ နာတာရှည်ဝေဒနာဖြစ်နိုင်ခြေ ပိုမြင့်မား တယ်လို့ သုတေသနတွေက ဖော်ပြထားပါတယ်။
(၃) ကျန်းမာတဲ့ အဆီနဲ့ Carbs တွေပေါ် ပိုဂရုစိုက်ပါ
Photo: Unsplash
အစားအသောက် စားရာမှာ အဆီနည်းပြီး Carbs မြင့်တဲ့ အစားအသောက် ၊ အဆီမြင့်ပြီး Carbs နည်းတဲ့ အစားအသောက်တွေကို မျှခြေကျကျ စားပေးဖို့ လိုပါတယ်။ အာလူး ၊ သစ်သီး နဲ့ ပဲ တွေလိုမျိုး သဘာဝအပင်က ရတဲ့ ကာဗွန်ဟိုက်ဒရိတ် Carbs တွေမှာ ဓါတ်တိုးဆန့်ကျင်နိုင်စွမ်း ၊ ဗိုက်တာမင် ၊ သတ္ထုဓါတ် နဲ့ အမျှင်တွေ ပါဝင်တာကြောင့် လူလုပ် ဓါတုပစ္စည်းပါ Carbsတွေထက် ပိုပြီး ကျန်းမာရေးနဲ့ ညီညွတ်ပါတယ်။
အဆီအနေနဲ့ ငါးက ရတဲ့ အဆီနဲ့ ထောပတ်လို အဆီတွေကို ရောင်ရမ်းမှု လျှော့ချပေးနိုင်တဲ့ တခြားအစားအသာက်တွေနဲ့ မှန်မှန်ကန်ကန် တွဲစားပေးနိုင်ရင် ကျန်းမာရေးအတွက် အကျိုးများပါတယ်။
(၄) စားသောက်မှုအပေါ် အာရုံထားပါ
Photo: Unsplash
ဘာကို စားသလဲက အရေးကြီးသလိုပါပဲ။ ဘယ်အချိန် စားတာလဲ ၊ ဘယ်နေရာမှာ စားတာလဲဆိုတဲ့အချက်တွေကလည်း အရေးကြီးပြန်ပါတယ်။ တချို့တွေက တီဗွီကြည့်ရင်း အစာစားတယ် ၊ တချို့က ဖုန်းပြောရင်း ၊ ကားမောင်းရင်း စာဖတ်ရင်း စားကြပါတယ်။
တကယ်တော့ ကျန်းမာတဲ့ စားသောက်မှုဆိုတာ ကိုယ်စားနေတဲ့ အစားအသောက်ပေါ် အာရုံထားတာ ဖြစ်ပါတယ်။ ဒီလို လုပ်တဲ့ အတွက် အစားအသောက်ရဲ့ အရသာကို ပိုသိမယ် ၊ စားသင့်တဲ့ အတိုင်းအတာအတိုင်း စားဖြစ်မယ် ၊ အစာမကြေတာမျိုးလည်း မဖြစ်တော့ပါဘူး။
Featured Photo:
