လီဗာပူးလ် ဂန္တဝင်တိုက်စစ်မှူး ဖာနန်ဒို တောရက်စ် ဟာ နည်းပြ လောကကို ပထမဆုံးခြေလှမ်း လှမ်းနိုင်ခဲ့ပြီးနောက် အနာဂတ်မှာ စပိန်လက်ရွေးစင် နည်းပြ ဖြစ်လာနိုင်တဲ့သူအဖြစ် တစ်ကြိုပေးခြင်းခံခဲ့ရပါတယ်။
Photo: Goal.com
အဲဒီလို တစ်ကြိုပေးခဲ့တဲ့သူကတော့ အက်သလက်တီကို မက်ဒရစ်နည်းပြဟောင်း အာမန်ဒို ဒယ်လာ မိုရီနာဖြစ်ပြီး ၎င်းက တောရက်စ် ဟာ ကွင်းတွင်းမှာရော၊ ကွင်းပြင်ပမှာပါ အမြဲတမ်း လေးစားစရာကောင်းတဲ့သူဖြစ်တယ်လို့ ပြောကြားခဲ့ပါတယ်။ တောရက်စ် ဟာ ၂၀၁၉ ခုနှစ်မှာ ပရော်ဖက်ရှင်နယ် ကစားသမားဘဝကနေ အနားယူခဲ့သူဖြစ်ပြီး အက်သလက်တီကို မက်ဒရစ် Juvenil A ယူ-၁၉ အသင်း နည်းပြ အဖြစ် ခန့်အပ်ခြင်းခံခဲ့ရတာ ဖြစ်ပါတယ်။
အသက် ၃၇ နှစ်အရွယ်ရှိပြီဖြစ်တဲ့ တောရက်စ် ဟာ ဗုဒ္ဓဟူးနေ့က ယူအီးအက်ဖ်အေလူငယ်လိဂ်ပြိုင်ပွဲမှာ မြို့တွင်းပြိုင်ဘက်ဖြစ်တဲ့ ရီးရဲလ်မက်ဒရစ် Juvenil A အသင်းကို ၃-၂ နဲ့ အနိုင်ရရှိအောင် စွမ်းဆောင်ပေးနိုင်ခဲ့တာဖြစ်ပါတယ်။ အက်သလက်တီကိုမက်ဒရစ် ယူ-၁၉ အသင်းဟာ ၁၆ သင်းရှုံးထွက်အဆင့်မှာ အနိုင်ရရှိခဲ့တာကြောင့် ယူအီးအက်ဖ်အေလူငယ်လိဂ်ပြိုင်ပွဲ ကွာတားဖိုင်နယ်အဆင့်ကို တက်ရောက်နိုင်ခဲ့ပြီဖြစ်ပြီး ၂၀၁၄-၂၀၁၅ နောက်ပိုင်း ပထမဆုံးအကြိမ် ပြန်လည်တက်ရောက်နိုင်ခဲ့တာဖြစ်ပါတယ်။
Photo: Sky Sports
ဒီယေဂို ဆီမြွန်နီရဲ့ လက်ရှိ စပိန်မှာ အောင်မြင်နေမှုကြောင့် ဖာနန်ဒို တောရက်စ် အနေနဲ့ သိပ်မကြာခင်အချိန်အတွင်းမှာတော့ အက်သလက်တီကို မက်ဒရစ်အသင်းရဲ့ နည်းပြဖြစ်လာနိုင်ဖွယ်မရှိပေမယ့်လည်း မိုရီနာက စပိန်လက်ရွေးစင်တိုက်စစ်မှူးဟောင်းအနေနဲ့ ၎င်းရဲ့တောက်ပတဲ့နည်းပြဘဝအတွက် မဖြစ်မနေလိုအပ်တဲ့ အခြေခိုင်အောင် လုပ်ဆောင်နေတယ်လို့ ယုံကြည်နေတာဖြစ်ပါတယ်။
“ဖာနန်ဒိုလိုမျိုး နည်းပြ တစ်ယောက်။ သူ့ရဲ့ ကစားသမားဘဝကို နည်းနည်း သိခဲ့ပြီး သူလုပ်ဆောင်ခဲ့တာတွေကိုလည်း အမြဲတမ်း လေးစားမှုရှိခဲ့ပါတယ်။ သူ့မှာ အရမ်းတော်တဲ့ နည်းပြ ဖြစ်လာနိုင်တဲ့ အနေအထားရှိပါတယ်။ သူ့ကိုယ်သူ ထုတ်ဖော်ပြသတတ်တဲ့ နည်းလမ်းကြောင့်ဖြစ်ပြီး သူ့ဆီမှာရှိနေတဲ့ ငြိမ်းချမ်းမှု၊ စိတ်အေးအေးထားနိုင်မှုကြောင့်ပါ။ ကျွန်တော် ကစားသမားတွေဆီကနေလည်း အဲဒါကို သိပါတယ်။ သူနဲ့ပတ်သက်ပြီး အံ့အားသင့်ခဲ့တဲ့အကြောင်း ကျွန်တော့်ကို ပြောခဲ့တဲ့သူတွေဆီကပေါ့။ သူ့ရဲ့ အယူအဆတွေကို ဘယ်လိုမျိုး ပေးလဲ၊ လွှင့်ထုတ်သလိုဆိုတဲ့နည်းလမ်းတွေအကြောင်းပေါ့”
Photo: Into the Calderon
“အဲဒီတော့ ကျွန်တော် သူ့ဆီမှာ ဘာမြင်နေရလဲဆိုရင် အရာအားလုံးသာ မှန်ကန်တဲ့လမ်းကြောင်းအတိုင်း သွားမယ်ဆိုရင် ကျွန်တော်တို့ စပိန်ဘောလုံးအသင်းနဲ့ အက်သလက်တီကိုအတွက် အနာဂတ်နည်းပြကို ရရှိပါလိမ့်မယ်။ လက်ရွေးစင်အသင်းအတွက်လည်း အနာဂတ်နည်းပြဖြစ်လာဖို့ မျှော်လင့်မိပါတယ်။ သူ ဘာပဲ လိုချင်ချင်ပါ။ သူက ခင်ဗျား အသက် ၁၇၊ ၁၈ လောက်ပဲရှိသေးတဲ့ ကလေးပဲဖြစ်နေရင်တောင် စကားကောင်းကောင်းပြောတတ်တဲ့သူပါ။ သူက အမြဲတမ်း ကွင်းတွင်းမှာရော ကွင်းပြင်ပမှာပါ သူ့ရဲ့ စိတ်နေစိတ်ထားနဲ့ အပြုအမူတွေကြောင့် လေးစားစရာကောင်းတဲ့သူပါ”
“နောက်ဆုံးပြောရရင် နည်းပြတစ်ယောက်ဆိုတာ ဒီလိုပဲ ဖြစ်ရမယ်။ ကွင်းတွင်းမှာရော ကွင်းပြင်ပမှာပါ စံနမူနာဖြစ်ရမယ်။ သူက အဲဒီအချက်တွေနဲ့ ကိုက်ညီနေပါတယ်”လို့ ပြောကြားခဲ့ပါတယ်။
Featured Photo: Sporbible
