ကျွန်တော်တို့ နေ့စဉ်အသုံးပြုနေတဲ့ တစ်ကိုယ်ရည်သုံး ပစ္စည်းတွေဆိုတာ ကိုယ်ပိုင်သီးသီးသန့်သန့်နဲ့ အသုံးပြုရတာမျိုးပါ။ ဘော်ဒါအပေါင်း အသင်း ၊ မိသားစုဝင်တွေနဲ့တောင် မျှဝေမသုံးသင့်တဲ့အထဲမှာ ပါပါတယ်။ ချစ်ခင်ရသူတွေနဲ့အတူ ချစ်ခြင်းမေတ္တာနဲ့ အပြုံးတွေ ဖလှယ်လို့ ရပေမယ့် အခုပြောပြမယ့် ပစ္စည်းတွေကိုတော့ ဘယ်တော့မှ မျှဝေမသုံးမိစေဖို့ သတိကြီးကြီး ပေးချင်ပါတယ်။
(၁) နားကြပ်
Photo : Unsplash
သူငယ်ချင်းတွေ ၊ မိသားစုဝင်တွေနဲ့ ဘယ်တော့ မျှဝေမသုံးသင့်တဲ့အထဲမှာ နားကြပ်တွေက ထိပ်ဆုံးက ပါပါတယ်။ အကြောင်းကတော့ နားကြပ်တွေကို မျှဝေသုံးစွဲမယ်ဆိုရင် နားပိုးဝင်တာနဲ့ ဘက်တီးရီးယားပိုးမွှားတွေ ကူးစက်နိုင်ခံရနိုင်ခြေ အလွန်များလို့ပါ။ အကယ်၍ ရော်ဘာ သို့မဟုတ် ရေမြှုပ် Cover ပါတဲ့ နားကြပ်တွေကို အသုံးပြုမယ်ဆိုရင်တော့ ရောဂါပိုးမွှားကူးစက်နိုင်ခြေနည်းမှာဖြစ်ပေမယ့် ၎င်းတို့ကို တစ်လလျှင် တစ်ကြိမ်တော့ လဲလှယ်အသုံးပြုပေးဖို့ လိုပါတယ်။
(၂) တဘက်
Photo : Best Life
CDC (Centre for Disease Control and Prevention) ရဲ့အဆိုအရ ရေစိုတဲ့အဝတ်တွေ ၊ တဘက်နဲ့ မျက်နှာသုတ်ပုဝါတွေကို မျှဝေသုံးစွဲမယ်ဆိုရင် လိင်အင်္ဂါ ပိုးဝင်ခြင်းအပါအဝင် အရေပြားဆိုင်ရာ ပြဿနာတွေ အများကြီး ဖြစ်နိုင်ခြေရှိတယ်လို့ ဆိုပါတယ်။ ဒါကြောင့်
ကိုယ်ပိုင်သုံး မျက်နှာသုတ်ပုဝါ သို့မဟုတ် တဘက်တစ်ထည် သီးသီးသန့်သန့် ထားသင့်ပြီး အနည်းဆုံး တစ်ပတ်တစ်ကြိမ် မှန်မှန်လျှော်ဖွတ် သန့်စင်ပေးဖို့လည်း လိုပါတယ်။
(၃) ဂျုတ်
Photo : Purplle
မုတ်ဆိတ်ရိတ်ဂျုတ်တွေ ၊ သင်တုန်းဓားတွေဟာ ကျွန်တော်တို့ ထင်ထားတာထက်ကို ပိုပြီး ဘက်တီးရီးယားနဲ့ ရောဂါပိုးမွှားတွေ အလွယ်တကူ ကပ်ညှိတွယ်နေနိုင်တဲ့ ပစ္စည်းတစ်ခုပါပဲ။ ဂျုတ်နဲ့ သင်တုန်းဓားတွေကို တခြားသူတွေနဲ့ အတူတူ မျှဝေသုံးစွဲမယ်ဆိုရင် ဘက်တီးရီးယား ၊ မှိုနဲ့ ဗိုင်းရပ်စ်ပိုးမွှားတွေ အလွယ်တကူ ကူးစက်ခံရနိုင်ခြေ များပါတယ်။ American Journal of Infection ရဲ့ လေ့လာမှုအရ ဂျုတ်နဲ့ သင်တုန်းဓားတွေ မျှဝေသုံးစွဲခြင်းကနေ အသည်းရောင်အသားဝါရောဂါ အပါအဝင် အရေပြားမှိုဝင်ခြင်း ၊ ပိုးဝင်ခြင်းတွေအထိ ဖြစ်နိုင်တယ်လို့ ဆိုထားပါတယ်။
(၄) သွားတိုက်တံ
Photo : Allure
သွားတိုက်တံတွေဆိုတာလည်း တခြားသူတွေနဲ့ လုံးဝမျှဝေမသုံးသင့်တဲ့ ပစ္စည်းတစ်ခုဖြစ်ပါတယ်။ လေ့လာမှုစစ်တမ်းတွေအရ သွားတိုက်တံ မျှဝေသုံးစွဲတဲ့ ပြဿနာဟာ ချစ်သူစုံတွဲတွေကြားမှာ အဖြစ်များတဲ့ ကိစ္စတစ်ခုလို့ ဆိုထားပါတယ်။ သွားတိုက်တံ မျှဝေသုံးခြင်းဟာ ခံတွင်းအနာ ၊ သွားဖုံးရောဂါနဲ့ ဘက်တီးရီးယားပိုးမွှား ကူးစက်ခံရနိုင်ခြင်းအပြင် အသည်းရောင်အသားဝါရောဂါကိုလည်း ဖြစ်စေနိုင်ပါတယ်။
(၅) ဆပ်ပြာ
Photo : Brickell Men’s Products
အဓိကအားဖြင့် ကိုယ်တိုက်ဆပ်ပြာတွေ ဖြစ်ပါတယ်။ ကိုယ်တိုက်ဆပ်ပြာတွေဟာ စိုထိုင်းဆများတဲ့အတွက် ဘက်တီးရီးယားနဲ့ မှိုတွေ ကပ်ညှိတွယ်နေနိုင်ခြေ ရာခိုင်နှုန်းအများကြီး ရှိနေပါတယ်။ ကိုယ်တိုက်ဆပ်ပြာတွေကို မျှဝေသုံးစွဲတာဟာ ရောဂါပိုးမွှား ကူးစက်ခံရနိုင်ခြေ အများကြီးရှိတဲ့အတွက်ကြောင့် တခြားသူတွေနဲ့ ဘယ်တော့ မျှဝေမသုံးမိစေဖို့ အကြံပေးချင်ပါတယ်။
(၆) ချွေးနံ့ပျောက်ဆေး
Photo : Rolling Stone
ချွေးနံ့ပျောက်ဆေး Roll-on တွေဟာလည်း တခြားသူတွေနဲ့ ဘယ်တော့မှ မျှမသုံးသင့်တဲ့ အထဲမှာပါပါတယ်။ Roll-on တွေရဲ့ သဘာဝအရကိုက စေးကပ်ကပ်ရှိပြီး အရေပြားနဲ့တိုက်ရိုက်ထိတွေ့ အသုံးပြုရတာ ဖြစ်တဲ့အတွက် ရောဂါပိုးမွှားတွေ အလွယ်တကူ ကူးစက်နိုင်ခြေ မြင့်မားပါတယ်။
(၇) လက်သည်းညှပ်
Photo : Footfiles
လက်သည်းညှပ်တွေဟာလည်း ထိုနည်း၎င်းပါပဲ။ လက်သည်းညှပ်တွေကို မျှဝေသုံးစွဲမယ်ဆိုရင် အသည်းရောင်အသားအဝါရောဂါ ၊ Staphylococcus Infections နဲ့ ကြွက်နို့လို အရေပြားပြဿနာတွေ အများကြီး ဖြစ်စေနိုင်ပါတယ်။ အကယ်၍ လက်သည်းညှပ်တွေကို အသုံးပြုမယ်ဆိုရင်ပါကလည်း သေချာသန့်စင်ထားတဲ့ ပစ္စည်းကို အသုံးပြုခြင်းက ရောဂါပိုးမွှား ကူးစက်ခံရနိုင်ခြေကို လျှော့ချနိုင်မှာ ဖြစ်ပါတယ်။
Featured Photo : VistaCreate
